Tovuz olayının pərdəarxası: bacıoğlusunu alqışladan Əhmədov

Misli Premyer Liqasının son turunda Tovuzda başverənlər heç də xoş görüntülər deyildi. Bir qrup yerli azarkeşin meydan sahiblərinin baş məşqçisi Ayxan Abbasovu istefaya səsləməsi həm də gözlənilməz sayılmalıdır.

Söhbət imkanlarına görə heç də yaxşı səviyyədə olmayan, bununla belə, debüt mövsümündə normal nəticələrə imza atan komandadan gedir. Daha zəngin heyəti və maliyyə imkanları olan komandaları üstələyən “Turan Tovuz”un ölkə kubokunun yarımfinalına vəsiqə qazandığını nəzərə alsaq, azarkeşlərin narazılığı, ümumiyyətlə, başadüşülən deyil.

Təbii ki, hadisələri böyütməmək də olardı. Klub rəhbərliyi məsələyə bu qədər reaksiya verməməli, etirazçıları gündəmə gətirməməliydi. Abbasovun özü də həmin vaxt azarkeşlərə yaxınlaşmaqla emosional səhvə yol verdi. Düzdü, onun söyüşlərə görə sakit dayana bilmədiyi deyilir, hətta bu vəziyyətdə də təmkini qorumaq mütləqdir.

Lakin indi bəlli olur ki, başverənlər sıradan hadisə deyilmiş. Komandanın səfərdə daha yaxşı oynamasını, evdə daha az xal toplamasını, son oyunlarda ardıcıl xal itkilərini bəhanəyə çevirənlər bir qrup şəslər imiş. Və onlar məhz “Şamaxı” ilə oyunu bilərəkdən seçiblər.

Belə ki, vaxtilə Tovuz klublarına rəhbərlik etmiş Vidadi Əhmədov bu mövsümün əvvəlində yenidən klubun düşərgəsinə tez-tez baş çəkirmiş. Rəhbərlikdə təmsil olunmağa çalışan bu şəxs hətta maliyyə yardımı da vəd edibmiş, sonradan niyyəti üzə çıxıb, bundan boyun qaçırıb. Maliyyənin AFFA vasitəsi ilə dövlət tərəfindən ayrılmasını fürsət bilən funksioner, klub prezidenti olacağını gözləyirmiş.

Lakin onu və ətrafındakıları idarəetməyə yaxın qoymadılar, üstəlik, yeni sponsorun gəlişi ilə Əhmədovun ofsaydda qalacağı aydınlaşdı. Belədə Tovuzda Vidadi bəyin müxalif dəstəsi formalaşmağa başladı. Onlar uğursuzluq üçün fürsət gözləyirdi.

Məhz “Şamaxı” ilə oyunda ilk təxribatın törədilməsi isə bu klubda təmsil olunan tovuzlulara görə idi. Qonaqları heyətində yayda daha yaxşı pul qazanmağı üstün tutub “Turan Tovuz”a gəlməkdən boyun qaçıran futbolçular var idi. Eyni zamanda “Şamaxı”nın İdarə Heyətinin sədri məhz Əhmədovun bacısı oğlu Elçin Usubdur. Bu, həmin Elçin bəydir ki, Azərbaycan futboluna məhz Əhmədovun AFFA-da çalışdığı dönəmdə “düşüb”, tapşırıqla vəzifə pilləkənlərini dırmaşıb, “vizitka” paylaya-paylaya rəhbər vəzifələrə dartılıb.

Kəsəsi, “Turan Tovuz” – “Şamaxı” matçında başverənlər təsadüfi hadisə deyildi. “İstefa” şüarları Əhmədovun etirazının nümayişi idisə, daha acınacaqlı durumda olan “Şamaxı”nın alqışlanması Usubu şərəfləndirmək üçün düşünülmüşdü.

Ümid edirik, tovuzlular baş verən bu olay barədə soyuq başla düşünəcək. Komandadan narazı qalmaq, etiraz etmək olar, lakin bunu xüsusi aksiya kimi göstərmək yaxşı heç nə vəd etmir. Qonşu Gəncədə başverənlər həqiqi azarkeşlərə dərs olmalıdır. “Kəpəz”in daxilində və ətrafında da belə bir “virus” var – həm işləyir, həm də olayları öz mənafeyinə uyğun idarə edir. Daimi söz-söhbətlər, problemlər də klubu tərk etmir. “Turan Tovuz”u da eyni burulğanda görmək istəməzdik. Yaxşı işlər görməyə gələn və bunu ilk addımları ilə göstərən yeni sponsorları küsdürmək olmaz. Komandaya yeganə çempionluğu futbolla yox, silah, qol gücü ilə qazandırdığı unudulmayan Vidadi Əhmədova görə dəyməz…

FƏRİD