Tovuzda “sehrli” dəqiqə, Rəhmandan Mutuya dərs

Misli Premyer Liqasının XV turu “Qarabağ”, “Neftçi” və “Sabah”ın xeyrinə işlədi. Digərlərinin xal itirdikləri turda yalnız bu 3 komanda maksimumu bacardı. Nəticədə “Qarabağ” turnir cədvəlində izləyicilərindən bir qədər uzaqlaşmaq, “Neftçi” və “Sabah” isə onlardan öndə olanlara yaxınlaşmaq imkanı əldə etdilər.

Turun antiqəhrəmanı

Tura şənbə günü “Araz-Naxçıvan” – “Səbail” oyunu ilə start verildi. Görüşün ev sahiblərinin üstünlüyü şəraitində keçdiyini desək, yanılmarıq. Oyuna yaxşı başlayan naxçıvanlılar 18-ci dəqiqədə Mohammed Kadirinin fərdi ustalığı sayəsində vurduğu baxımlı qolla önə keçdi.

Sonrakı dəqiqələrdə hər iki komandanın təhlükəli hücumları olsa da, uzun müddət tablodakı rəqəmlər dəyişmədi. “Araz-Naxçıvan”ın heyətində Vadim Abdullayev həmişəki kimi, canfəşanlığı ilə seçilirdi. Ümumiyyətlə, bu futbolçu Naxçıvan klubunun heyətində çox iş görür. Həm dağıdıcı, həm də yaradıcı futbolçu olması Vadimin oyun ərzində diqqət mərkəzinə düşməsinə şərait yaradır. Bunun fonunda “Səbail”də əsas qol ümidi olan Aleksandr Ramalinqom son turlarda özünə bənzəmir. “90 nömrə”nin ön xətdə dişsizlik göstərməsi “Səbail”in qol vurmaq potensialını azaldır.

Artıq hər kəsin hakimin final fitini gözlədiyi bir məqamda – oyuna əlavə edilən 3-cü dəqiqədə “Araz-Naxçıvan” üçün kuryoz hadisə yaşandı. Numan Kurdiç topu uzaqlaşdırmaq istəyərkən tərs toxunuşla onu öz qapısına göndərdi və oyunun antiqəhrəmanı oldu. Bununla Kurdiç “Araz-Naxçıvan”ın tarixinə Premyer Liqada avtoqol müəllifi olan ilk futbolçu kimi düşdü.

Turun geridönüşü

Son vaxtlar özünə bənzəməyən “Turan Tovuz”la yaxşı formada olan “Sumqayıt”ın dueli maraqla gözlənilirdi. Əvvəlki turlarla müqayisədə tovuzluların baş məşqçisi Ayxan Abbasov qapı xəttində dəyişiklik etmişdi, Kamal Bayramovu çempionatın cari mövsümündə ilk dəfə meydana buraxmışdı. Bu da əbəs yerə deyildi. Son oyunlarda Aydın Bayramov və Tərlan Əhmədlinin etibarsız oyunu gənc mütəxəssisi bu cür addım atmağa vadar etmişdi.

Oyuna sürətli başlayan ev sahibləri erkən qol vurmağa çalışsalar da, özləri eyni aqibətlə üzləşdilər. 6-cı dəqiqədə qonaqlar cərimə zərbəsindən sonra hesabı açdılar. Səbuhi Abdullazadənin əla ötürməsindən sonra müdafiəçilərin arxasından çıxan Elvin Bədəlov topu tora qovuşdurdu. “Sumqayıt”ın uğurlu ev tapşırığından sonra “Turan Tovuz” hesabı bərabərləşdirmək üçün irəli atıldı. Lakin bu dəfə də qol vuran meydan sahibləri yox, qonaqlar oldular. Roi Kehatın qolu “Turan Tovuz” üçün “soyuq duş” oldu.

Ayxan Abbasovun fasilədə dəyişikliyə əl atacağı gözlənilən idi. O, ikinci hissəyə 2 əvəzetmə ilə başladı. Ayxan Quseynov və Otto Conun meydana buraxılması işə yaradı, hər iki əvəzetmə özünü doğrultdu. İkinci hissəyə fırtına kimi başlayan tovuzluların geridönüş etmələri üçün cəmi 8 dəqiqə bəs etdi. Ayxan Quseynov ilk qolun təşkilatçısı olaraq adaşının üzünü ağartdı. İkinci qol isə meydana ikinci hissədə daxil olan Otto Conun aktivinə yazıldı.

Oyuna əla müdaxilələr edən Abbasov vəziyyəti dəyişməyi bacardı. “Turan Tovuz” hesabı bərabərləşdirməklə kifayətlənmək istəmir, 3-cü qolu axtarırdı. Ancaq epizodların birində Mehdi Cənnətov əvvəlcə Ayxanın zərbəsini, ardınca isə Conun təkrar həmləsini dəf etdi. Qələbə qolu üçün irəli atılan Tovuz təmsilçisini 3 epizodda qonaqlar cəzalandıra bilərdilər. Amma bu epizodlarda Kamal Bayramov yaxşı oynayaraq, qapıdakı yerini möhləmləndirdi.

Turun qolu

Adil Şükürovun gəlişindən sonra ölkə kubokunda qələbə qazanan, keçən tur isə “Səbail”lə qolsuz heç-heçə edən “Kəpəz” “Sabah” önünə də ümidli çıxmışdı. Ancaq qonaqlar ilk dövrədə 2:2 etdikləri gəncəlilərə bu dəfə xal vermədilər.

Maraqlıdır ki, Tovuz şəhər stadionu ardıcıl 2-ci gündə 6-cı dəqiqədə qola şahidlik etdi. Anatoli Nuriyev uzaq məsafədən möhtəşəm zərbə ilə hesabı açdı. Topun qapı tirinə dəyərək qapıdan keçməsi onun gözəlliyini bir qədər də artırdı. Odur ki, bu qolu turun qolu adlandırmaq olar.

“Kəpəz” sonrakı dəqiqələrdə məğlubiyyətdən xilas olmaq üçün irəli atılsa da, 15-ci dəqiqədə ikinci dəfə mərkəzə dəvət edildi və “Sabah” Tovuzu 3 xalla tərk etdi.

Turun oyunçusu

“Neftçi” – “Zirə” matçının ilk dəqiqələri göstərdi ki, oyunun taleyini 1 qol həll edəcək. Meydanda daha çox fiziki mübarizənin şahidi olduq. “Ağ-qaralar”ın baş məşqçisi Adrian Mutu qapı xəttində Rza Cəfərova şans vermişdi. Yeri gəlmişkən, bu, 20 yaşlı qolkiperin çempionatın cari mövsümündə 4-cü oyunu idi. Diqqət çəkən digər məqamlar Eddi İsrafilovun uzun müddətdən sonra əsas heyətdə yer alması idi.

İlk hissədən narazı qalan Mutu fasilədə 2 dəyişikliyə əl atdı. Mirzov və Şinyaşikini oyundan alan rumın çalışdırıcı Rəhman Hacıyev və Filip Ozobiçi meydana buraxdı. Bu dəyişikliklərdən sonra “Neftçi”nin oyununda canlanma yarandı. Və çox keçmədi ki, hesab açıldı. 60-cı dəqiqədə Kilan Lebonun sol cinahdan ötürməsindən sonra məhz fasilədə meydana buraxılan Rəhman Hacıyev bəstə boyuna rəğmən, rəqib müdafiəçiləri qabaqlayaraq topu başla qapıdan keçirdi. Bununla Hacıyev Mutuya əsas heyətdə oynamağa layiq olduğunu bir daha isbatladı.

Hesabda geri düşən “Zirə”nin baş məşqçisi Rəşad Sadıqov dərhal üçlü əvəzləməyə əl atdı və Rəhim Sadıxov, Salifu Suma, Eldar Quliyevi meydana buraxdı. Onun müdaxilələrindən sonra “Zirə” hücumda daha kəsərli olmağa başladı. Ancaq Rza Cəfərovun inamlı oyunu və “Zirə”li futbolçuların qeyri-dəqiqliyi hesabın dəyişməsinə mane oldu. Epizodların birində isə Çantakiasın başla zərbəsindən sonra top dirəkdən qayıtdı. Bu, “Zirə”nin cari mövsümdə 3-cü məğlubiyyəti oldu. Komandasına vacib qələbə qazandıran Rəhmanı turun oyunçusu hesab etmək olar.

Onu da qeyd edək ki, “Neftçi”nin heyətində Ervin Koffi digər oyunlarla müqayisədə bu dəfə yaxşı təsir bağışladı. Son dəqiqələrdə rəqibin sürətli əks-hücumu zamanı məhz o, cəld tərpənərək Eldar Quliyevin qol vurmasını əngəllədi, bununla formaya düşdüyünü göstərdi.

Turun darmadağını

Tura lider – autsayder dueli, “Qarabağ” – “Qəbələ” matçı ilə yekun vuruldu. Ağdam klubunun bu görüşdə çətinlik çəkməyəcəyi gözlənilirdi, elə də oldu. “Qarabağ” meydana ehtiyat qüvvə ilə çıxmasına baxmayaraq, rəqibinə futbol dərsi keçdi. Qonaqların qapıçısı Rəşad Əzizli olmasaydı, hesab 3:0-dan da böyük ola bilərdi.

Bu qələbə sayəsində Qurban Qurbanovun komandası liderliyini möhkəmləndirdi. Hazırda “Qarabağ”ı ən yaxın izləyicisi “Zirə”dən 4 xal ayırır. 9-cu pillədən tərpənməyən “Qəbələ” isə indiki halda ancaq “Kəpəz”i qabaqladığına görə öyünə bilər.

Bu görüşdə fərqlənən Hamidu Keyta göstərdi ki, meydanda daha çox olmağı haqq edir. “Qarabağ”ın heyətində hazırda ən yaxşı formada olan futbolçulardan biri isə Olavio Juninyodur. Bu matçda da qol vuran Juninyo ağdamlıların hücum xəttinin lideridir.

ABBAS