Müsahibə
Ülvi “Qəbələ”nin tarixinə düşmək istəyir: “Bizdə əsas heyət anlayışı yoxdur”
“Qəbələ”nin hücumçusu Ülvi İsgəndərovun futbolinfo.az saytına müsahibəsi
– Premyer Liqanın XXIX turunda “Zirə”ni evdə 2:1 hesabı ilə məğlub edərək, turnir cədvəlində 2-ci pilləyə yüksəldiniz. Bunu sizin üçün ən kritik oyun saymaq olardı?
– Əlbəttə, bizim üçün çox vacib matç idi. Düzdür, birinci hissədə hər iki komanda risk etmək istəmirdi. Bu da normaldır. Vaxt keçdikcə komandalar irəli atılmağa başladılar.
– Finişə 7 tur qalmış turnir cədvəlinin 4-cü pilləsində qərarlaşmısınız. Bu amil üzərinizdə əlavə təzyiq yaratmır?
– 4-cü yerə yüksəlməyimiz o demək deyil ki, hər şeyi həll etmişik. Son tura qədər bu yeri qoruyub saxlamalıyıq.
– Eyni zamanda Azərbaycan Kubokunun da yarımfinalında yolunuza davam edirsiniz. Demək olar ki, avrokuboklara vəsiqə üçün hər şey öz əlinizdədir?
– Razıyam, hər şey öz əlimizdədir. Yaxşı kollektivimiz var. İnanıram ki, həm kubokda finala çıxacağıq, həm də çempionatda mövsümü 4-cü yerdə tamamlayacağıq.
– Heyətinizin zəngin olmaması mövsümün sonlarında sizə əlavə problem yaratmayacaq?
– Mən belə düşünmürəm. Zədəli futbolçularımız var. Onlar da tezliklə sağalıb bizə kömək edəcəklər. Baş məşqçimiz Elmar Baxşıyev elə kollektiv qurub ki, burada əsas heyət anlayışı yoxdur. Kim oynayırsa, ən yaxşısını etmək məcburiyyətindədir.
– Təzyiq və gərginliyin daha çox olacağını nəzərə alsaq, bu heyətin hər iki cəbhədə sona qədər mübarizə aparmağa gücü çatacaq?
– İndiki məqamda bütün komandalarda gərginlik var. Çünki mövsümün sonuna yaxınlaşırıq. Hər bir klubunun öz planı, hədəfi var. Bundan sonra hər xal qızıla bərabər olacaq.
– “Qəbələ”nin heyətində çempionatda 90-cı oyununuzu keçirdiniz. Bu say az deyil?
– Düzdür, yetərli deyil. Bundan da çox oyunlarda iştirak etmək istəyirəm. Bunun üçün əlimdən gələni edirəm.
– “Qəbələ”nin ən çox oyun keçirən futbolçu olmaq kimi arzun varmı? Yoxsa karyeranı daha böyük klubda davam etdirməyi planlaşdırırsan?
– Mən “Qəbələ” akademiyasının yetirməsiyəm. Əbəttə ki, “Qəbələ”nin tarixinə düşmək istəyirəm. Amma bunun baş verib-verməyəcəyini zaman göstərəcək.
– Növbəti turdakı rəqibiniz “Neftçi” avrokuboklara vəsiqəni təmin edib. Bu amili sizin üçün üstünlük saymaq olar?
– Əminəm ki, bizi ağır oyun gözləyir. Rəqibdə hansısa rahatlığın yaranacağına inanmıram. Çünki “Neftçi” də ikinci yer uğrunda mübarizə aparır. Rəqibin kimliyindən, turnir cədvəlindəki mövqeyindən asılı olmayaraq, hər matça qələbə üçün cıxırıq. “Neftçi” önündə də hədəfimiz qalibiyyət olacaq.
– “Qəbələ”dən yeni müqavilə təklifi almısınız. Ümumiyyətlə, gələn mövsümlə bağlı hədəfləriniz nələrdir?
– Klubdan hələlik yeni müqavilə təklifi almamışam. Çünki indiki məqamda mənim kimi hamının düşündüyü tək şey Konfrans Liqasına vəsiqə qazanmaqdır. Ondan sonra fikirləşmək üçün çox vaxtım olacaq. Təbii ki, legioner həyatı yaşamaq istərdim. Əgər ölkə xaricindən yaxşı təklif olsa, dəyərləndirəcəyəm.
FƏRİD
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”
- Ölkə futbolu2024-05-14 08:00
İcraiyyə Komitəsinin gözlənilən qərarları