Ölkə futbolu
Vidadi Əhmədov narazıdır: “Belə adamları ifşa etməliyik”
“Turan Tovuz”un yaradıcılarından olan, uzun müddət klubun prezidenti olmuş Vidadi Əhmədov narazıdır. O, son turda “Şamaxı” ilə matçda azarkeşlərin “İstefa” şüarlarında rolu olması barədə yazılanarla razılaşmır.
Redaksiyamızla əlaqə saxlayan Əhmədov bu kimi xəbərlərin həqiqəti əks etdirmədiyini bildirdi. O, böyük hörmət bəslədiyi baş məşqçi Ayxan Abbasovun istefasını arzulamadığını və stadionda səsləndirilən şüarları dəstəkləmədiyini söylədi: “Biz hamımız futbolun inkişafını istəyiriksə, belə adamları ifşa etməliyik. Mənim klub prezidenti olmaq kimi niyyətim yoxdur. Dəfələrlə mənə təklif olunub, qəbul etməmişəm. AFFA-dan ayrılan maliyyə ilə klub saxlamaq olmaz. Əgər indi imkanım çatsaydı, ən azı bir o qədər də maliyyəni mən büdcəyə əlavə edə bilsəydim, məmnuniyyətlə klub prezidenti olardım”.
Vidadi bəy indi də oyunlara, tədbirlərə rayon rəhbərliyinin dəvəti ilə getdiyini bildirdi: “Kluba böyük kömək etmək imkanım yoxdur. Müəyyən yardımlarımız indi də olur və bacardığımı etmişəm. Zatən həyatım boyu bütün var-dövlətimi futbolun inkişafı üçün sərf etmişəm. Bunu hamı bilir. Müəyyən xidmətlərimiz olub, nəyəsə nail olmuşuq, nələrsə alınmayıb. Amma hər zaman yalnız futbolun inkişafını istəmişəm. İndi kluba böyük yardımlar etməyə imkanım çatmasa da, Tovuz futbolunun yüksəlişinin arzusundayam. “İstefa” şüarlarına gəlincə, sizə verilən informasiya yanlışdır, birlikdə həqiqi səbəbkarları tapıb ifşa etmək lazımdır”.
Vidadi Əhmədovun etirazını anlayışla qarşılayırıq. Bu məsələni növbəti dəfə araşdıracağıq. “İstefa” şüarlarını kimin təşkil etdiyini dəqiqləşdirmək bizim üçün də maraqlıdır.
- Ölkə futbolu2024-05-13 08:32
“Qarabağ” – postsovet məkanının ən yaxşı komandası
- Ölkə futbolu2024-05-13 10:15
İK gündəmi: Premyer Liqada say dəyişməyəcək?!
- Ölkə futbolu2024-05-13 19:32
Rövşən Nəcəf: “Premyer Liqada iştirak edəcək klubların sayında artım olmayacaq”
- Ölkə futbolu2024-05-14 08:00
İcraiyyə Komitəsinin gözlənilən qərarları