Müsahibə
“Vuruşmalıyıq, başqa şansımız yoxdur”
“Qəbələ”nin müdafiəçisi İlkin Qırtımovun futbolinfo.az saytına müsahibəsi
– “Qəbələ”nin qış fasiləsindən sonrakı nəticələrini necə qiymətləndirmək olar?
– Əslində, mövsümün ikinci yarısına yaxşı başlamadıq. Çünki hələ qələbə qazanmamışıq. Amma digər tərəfdən “Kəpəz”, “Zirə” və “Neftçi” ilə matçlarda məğlub olmadıq. Eyni zamanda “Zirə”nin xal itirməsi də bizə əlavə şansdır.
– 2023-cü ildə keçirdiyiniz 4 görüşün 3-də heç-heçə etmisiniz, 1-də uduzmusunuz. Qələbə qazanmağınıza nə mane olur: qış toplanışı yaxşı keçmədi, yoxsa transfer az oldu?
– Təlim-məşq toplanışında hər şey yaxşı idi, uğurlu hazırlıq keçdik. Oyunçu sayında kasadlıq olmasını bəlkə səbəb kimi göstərmək olar. Məncə, yeni transferlər edilsəydi, daha yaxşı olardı. Çünki rəqiblərimizin hamısı yeni oyunçular aldılar. Təbii ki, heyətin zəngin olması daha yaxşıdır. Düzdür, yaxşı futbolçu heyətinə malikik. Amma kimsə zədələnəndə onun boşluğunu dolduracaq oyunçu azdır.
– Məhz heyətdəki itkilərə görə, çempionatın ötən turunda “Neftçi” (0:0) ilə görüşdə müdafiənin mərkəzində çıxış etdiniz. Özünüzü o mövqedə yad hiss etmirdiniz?
– Sağ cinah müdafiəçisi olsam da, “Keşlə”də (indiki “Şamaxı”) hərdən mərkəzdə oynamışam. Əlbəttə, sağ cinahda oynamaq mənə daha rahatdır. Ancaq mərkəzdə oynamaq da böyük fərq eləmir.
– “Neftçi” ilə oyunda 2 xal itirən tərəf siz, yoxsa rəqib oldu?
– Qələbə qazanmaq üçün çox imkanlarımız oldu. Düzdür, rəqib də şanslar yaratdı. Amma bizdə fərqlənmək imkanı daha çox idi. Təəssüf ki, dəyərləndirə bilmədik. Qol vəziyyətləri yaratmaq bizi sevindirir. Elə oyunlar olur ki, kənardan baxan sıxılır. Ancaq bizim keçirdiyimiz görüşlərdə qol vəziyyətləri çox olur.
– “Neftçi”nin baş məşqçisi Lautentsiu Regekampf oyundan sonra hakimlikdən şikayətləndi. Necə düşünürsünüz, hakim sizin lehinizə qərarlar verirdi?
– Ümumilikdə hakim idarəçiliyi pis deyildi. Məncə, 1-2 dəfə zədə səbəbindən oyun dayandığı üçün əlavə vaxtı bir az da artırmaq olardı. Rəqibin baş məşqçisinin də özünə görə haqlı tərəfləri var. Kənardan başqa cür görünə bilər.
– Lehinizə təyin edilən penalti VAR-a baxdıqdan sonra ləğv olundu. Yəqin ki, epizoda baxmısınız.
– Bəli, baxmışıq. Həmin epizod bizim qapımız qarşısında olsaydı, hakim 90 faiz penalti verəcəkdi. Heç VAR-a getməyəcəkdilər. Deyirlər ki, Rövlan Muradov orada yıxılmağa meyilli idi. Həmin kobudluq meydanın mərkəzində olsaydı, cərimə veriləcəkdi. Deməli, yüzfaizlik penaltidir. Müdafiəçi yerdən qalxıb düz Rövlanın qarşısına tullanır, ona mane olur.
– Bu mövsüm hakimliklə bağlı narazılıqlar artıb. Bəlkə hakimlərimiz VAR-a uyğunlaşa bilmirlər?
– Düşünürdüm ki, VAR-ın tətbiqindən sonra hakimlərin işi daha rahat olacaq. Bu sistem referilərin rahatlığına hesablanıb. Referi doğru qərar vermədikdə təkrara baxaraq, səhvini düzəldir. Ancaq bilmirəm hakimlər VAR-ın əleyhinə gedirlər, baş açmıram. Bizim oyunu qoyuram bir kənara. “Sabah”la oyunda top “Qarabağ”ın oyunçusunun əlinə dəydi. Orada penaltidən başqa bir variant yoxdur.
– 4-cü yer uğrunda mübarizədəki rəqibiniz “Zirə” qış fasiləsində heyətini gücləndirdi. Onlarla rəqabət çətin olmayacaq?
– Ümumiyyətlə, çempionatda asan komanda yoxdur. Avrokuboka vəsiqə qazanmaq heç kimə rahat olmayacaq. Buna görə də vuruşmalıyıq. Başqa şansımız yoxdur.
– Ölkə kubokunun da yarımfinalındasınız. Bu turnirdə nəyə ümid edirsiniz?
– Avrokuboka getmək üçün kubok daha qısa yoldur. Yarımfinaldakı rəqibimiz “Səbail”in çempionatın aşağı sıralarında yer alması bizi rahatlaşdıra bilməz. İlk növbədə bu komandanı keçməliyik, ondan sonra kuboku qazanmaq barədə düşünmək olar.
– Əsas diqqəti kuboka yönəltmək daha doğru olar, yoxsa çempionatda 4-cü yer uğrunda mübarizəyə?
– Təkcə kuboka arxayınlaşmaq olmaz. Hər iki cəbhədə vuruşmalıyıq.
– Premyer Liqanın 23-cü turunda “Sumqayıt”la qarşılaşacaqsınız. Əsas rəqibiniz “Zirə” isə lider “Qarabağ”la qarşılaşacaq. 4 xallıq fərqi azaltmaq baxımından bunu şans saymaq olar?
– Bu tur bizim üçün daha ümidvericidir. Biz istədiyimiz kimi getsə, xal fərqi 1-ə düşər. Belə olsa, motivasiyamız daha da artacaq.
CAVAD
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…