“Zirə” – “Neftçi” yerdəyişməsi və oyunun taleyini dəyişən qərar

Misli Premyer Liqasının XX turu uzun müddətdir turnir cədvəlində 2-ci pillədə qərarlaşan “Zirə”nin mövqeyini itirməsi ilə nəticələndi. Bunadək 4-cü olan “Neftçi” Rəşad Sadıqovun komandasının xal itkisindən faydalanaraq, qələbə sayəsində 2-ci pilləyə yüksəldi. “Sumqayıt”ın da aktivinə xal yazdırması “Zirə”nin 4-cü yerə yuvarlanmasına səbəb oldu. Beləliklə, tur “Zirə” – “Neftçi” yerdəyişməsi ilə yadda qaldı.

Tovuzda “Səbail”dən alınan revanş

İkinci yarıya Qərb derbisindəki məğlubiyyətlə başlayan “Turan Tovuz”un bu matçadək “Səbail” sindromu var idi. Təsadüfi deyil ki, cari mövsümün ilk 2 qarşılaşmasında “dənizçilər” 3:1 və 2:1 hesablı qələbə qazanmışdılar. Ayxan Abbasovun yetirmələri revanş almaqla həm “Səbail” önündəki uğursuz seriyaya son qoymaq, həm də ötən turdakı məğlubiyyəti unutdurmaq istəyində idilər. Öz növbəsində “Səbail” də Tovuz səfərinə xal və ya xallar qazanmaq üçün yollanmışdı.

“Turan Tovuz” 24-cü dəqiqədə qol istəyinə çatdı. Ayxan Quseynov ötən tur olduğu kimi, bu dəfə də adını tabloya yazdırmağı bacardı. Fasiləyə hesabda geridə yollanan “Səbail”in baş məşqçisi Şahin Diniyev ikinci hissəyə 2 əvəzetmə ilə başladı. Cabir Əmirli və yeni transfer Ayub Masikanı meydana buraxan mütəxəssis oyunun axarını dəyişməyə cəhd etdi. Ancaq onun cəhdi fayda vermədi. 73-cü dəqiqədə künc zərbəsindən sonra “Səbail”in qapısı qarşısındakı qarışıqlıqdan Luis Paçu səmərəli istifadə etdi.

Bir qədər sonra “Turan Tovuz”un müdafiəçisi Bruno Qonçalvesin kobud səhvindən sonra topu ələ keçirən Pedro Nuno dəqiq zərbə ilə fərqi azaltsa da, qonaqların bundan artığına gücü çatmadı. Əvəzində Paçu yenidən səhnəyə çıxaraq “Səbail”in üzvü Adi Mehremiçin səhvini bağışlamadı və oyunda yekun hesabı müəyyənləşdirdi.

Beləliklə, “Turan Tovuz” vacib qələbə qazanaraq həm “Səbail”dən revanş aldı, həm də avrokubok zonasına düşmək uğrunda mübarizədən uzaqlaşmadı. “Səbail”in isə heyətlə bağlı itkiləri davam etməkdədir. Diniyevin ixtiyarındakı sağlam futbolçuların sayı artdıqdan sonra paytaxt təmsilçisi daha inamlı çıxış etməyə başlayacaq.

Juninyo iş başında, 10 nəfərlə gələn qələbə qolu

Mövsümün ikinci hissəsinə əzəli rəqibi “Turan Tovuz” üzərindəki qələbə ilə başlayan “Kəpəz” çempionatın lideri “Qarabağ”la Qəbələdəki oyunda da güclü rəqibə müqavimət göstərdi. Düzdür, nominal qonaqlar ilk dəqiqələrdən üstünlüyü ələ keçirdilər. “Qarabağ”ın ifasında ardıcıl hücumlar, zərbələr fasiləyədək qolla nəticələnmədi.

Ağdamlılar ikinci hissənin ilk 15 dəqiqəsində iki dəfə qol vurmağa yaxın olsalar da, Hamidu Keyta və Redon Cica əllərinə düşən fürsətdən yararlana bilmədilər. Hesabdan narazı qalan “Qarabağ”ın baş məşqçisi Qurban Qurbanov 63-cü dəqiqədə birdən-birə 4 əvəzetməyə əl atdı. Bəhlul Mustafazadə, Elvin Cəfərquliyev, Abdullar Zubir və çempionatın bombardiri Olavio Juninyonu meydana buraxan mütəxəssis komandasından qol tələb etsə də, əksi oldu. 72-ci dəqiqədə Bəhlul Mustafazadənin başla uzaqlaşdırdığı topu “Kəpəz”in futbolçusu Olavale Onanuqa cərimə meydançası həndəvərindən dəqiq zərbə ilə tora qovuşdurdu.

“Soyuq duş”dan sonra dərhal ayılan “Qarabağ” Yassin Benzianın da meydana daxil olmasından sonra hesabı bərabərləşdirdi. Toral Bayramovun qapı xəttinə doğru hava ötürməsindən sonra məhz o başla topu boş mövqedə dayanan Juninyoya göndərdi. Sonuncu isə topu boş qapıdan keçirərək, Premyer Liqadakı 14-cü qoluna imza atdı. Ancaq bu qol “Kəpəz”in qapıçısının Benzianı zədələməsi ilə nəticələndi. Təcrübəli yarımmüdafiəçi oyunu davam etdirə bilmədi və 5 əvəzetmənin hamısından istifadə etmiş “Qarabağ” son dəqiqələri 10 nəfərlə keçirmək məcburiyyətində qaldı.

Ağdam klubunun say azlığından “Kəpəz” istifadə edə bilmədi. Əksinə, ikinci qolu vurmaq üçün irəli atılan “Qarabağ” bunun bəhrəsini gördü. Meydana ikinci hissədə daxil olan və hesabı bərabərləşdirən Juninyo bu dəfə komandasına penalti qazandırdı və matçın qəhrəmanı oldu. Ağ nöqtəyə yaxınlaşan Toral Bayramov isə rəqib qapıçıya şans vermədi. Nəticədə “atlılar” çətin Qəbələ səfərindən vacib 3 xalla qayıtdılar.

“Zirə”nin uğursuz seriyası və hakim dərdi

Turun ən səsli-küylü oyunu “Zirə” və “Sabah” arasında keçirildi. Səs-küyə isə növbəti hakim səhvi səbəb oldu. “Zirə”nin çalışdırıcısı Rəşad Sadıqov oyundan sonra yenə hakim idarəçiliyindən narazılığını bildirdi və komandasının əvvəlki illərdə olduğu kimi, bu mövsüm də fit sahiblərinin ədalətsiz qərarlarının qurbanı olduğunu dilə gətirdi.

Bu turadək 6 oyun idi qələbə qazana bilməyən “Zirə” uğursuz seriyaya “Sabah”la görüşdə son qoymaq istəyirdi. 16-cı dəqiqədə Vladislav Kulaç meydan sahiblərini hesabda önə keçirə bilsəydi, bəlkə də oyunun gedişatı fərqli olacaqdı. Ancaq Kulaçın əlverişli mövqedən zərbəsində azacıq dəqiqlik çatışmadı.

İlk hissəni “Zirə”nin aktivinə yazmaq olar. Meydan sahibləri rəqibdən üstün oyun nümayiş etdirərək, bir neçə təhlükəli hücum yaratdılar. “Zirə”nin heyətində xüsusən sabiq komandasına qarşı oynayan Ceyhun Nuriyev fəal idi.

33-cü dəqiqədə meydan sahibləri topu rəqib qapısından keçirsələr də, VAR-ın müdaxiləsindən sonra Eldar Quliyevin oyundankənar vəziyyətdən fərqləndiyi əsas gətirilərək, qol ləğv edildi. İlk hissənin növbəti yadda qalan hadisəsi “Sabah”ın meydanda azlıqda qalması oldu. Elvin Camalov rəqib futbolçuya qarşı kobud oynadığı üçün ikinci sari vərəqə ilə cəzalandırıldı. Hissəyə əlavə olunmuş dəqiqələrdə Ceyhunun keçmiş komandasını cəzalandırmasına isə “Sabah”ın qapıçısı Nicat Mehbalıyev imkan vermədi.

“Zirə” ikinci hissəyə də istəkli başladı. 55-ci dəqiqədə Ceyhunun uzaq məsafədən zərbəsinin qarşısını bu dəfə dirək kəsdi. Bir qədər sonra Rəşad Sadıqov iki əvəzetmə edərək, Rəhim Sadıxov və Rafael Utziqi meydana buraxdı, bununla komandasından qol tələb etdiyini göstərdi. Rəqibin azlıqda qalmasından istifadə etməyə çalışan “Zirə” ikinci hissədə də üstün tərəf idi. “Sabah” isə əks-hücumlara bel bağlayır, imkan düşəndə rəqib qapısına zərbə endirməyə çalışırdı.

Və o an… Matçın əsas vaxtına əlavə olunmuş sonuncu – 4-cü dəqiqədə “Zirə” küncdən zərbə yerinə yetirir. Ötürmənin davamında top Amin Seydiyevdən çıxsa da, referi Rauf Cabbarov yanlış qərar qəbul edərək qapıdan zərbə təyin edir. Artıq əlavə olunmuş vaxtın da bitdiyini nəzərə alsaq, hakim final fitini çalmalı olduğu halda, “Sabah”ın yeni hücum başlamasına şərait yaradır, beləcə az öncə buraxdığı səhvin daha böyük vüsət almasına səbəb olur. Belə ki, Nicatın qapıdan zərbəsindən sonra Marqarita rəqib qolkiperlə üz-üzə qalır və Tyaqo Silvanın kobud oyunu sayəsində yerdə qalır. VAR-ın müdaxiləsindən sonra “Zirə”nin qapısına penalti təyin edilir, qonaqlar isə Sofian Çaklanın dəqiq zərbəsi sayəsində meydandan qələbə ilə ayrılan tərəf olurlar. Beləcə Rauf Cabbarovun kobud səhvi birbaşa matçın nəticəsinə təsir edir, oyunun taleyini dəyişir.

Qələbəsizlik seriyası 7-yə çatan “Zirə”nin hücum xəttindəki “dişsizlik” davam edir. Bu cür davam etsə, qəsəbə təmsilçisi turnir cədvəlindəki hazırkı mövqeyini də itirə bilər.

“Araz-Naxçıvan” “Sumqayıt”a qalib gələ bilmir

“Araz-Naxçıvan” – “Sumqayıt” matçının qarşılıqlı hücumlar şəraitində keçəcəyi gözlənilən idi. Bu komandaların ilk dövrədəki duelində heç-heçə (1:1) qeydə alınmış, ikinci dövrədə isə “Sumqayıt” 2:0 hesablı qələbəyə sevinmişdi.

İlk hissə qol vəziyyətləri baxımından kasad oldu. Bununla belə, fasiləyədək hesab açıldı. İlk yarının sonuncu dəqiqəsində “Sumqayıt”da faydalı iş əmsalına görə ən yaxşılardan olan Rövlan Muradovun kornerdən ötürməsini İsa Suliman dəqiq baş zərbəsi ilə tamamladı. Bu qolda “Araz-Naxçıvan”ın qapıçısı Kristian Avramın çıxışda səhvə yol verməsi də rol oynadı.

İkinci hissə daha maraqlı keçdi. 59-cu dəqiqədə qapıçıların çıxışda səhv etmək növbəsi “Sumqayıt”ın qolkiperi Mehdi Cənnətova çatdı. Nəticədə Miço Kuzmanoviçin ötürməsindən sonra Vanderson Melo topu başla qapıdan keçirdi.

Sonrakı dəqiqələrdə Naxçıvan klubu daha üstün oyun nümayiş etdirdi, ancaq heç cür hesabı dəyişə bilmədi. Fasilədən sonra “Sumqayıt”ın ən yaddaqalan qol epizodu isə əsas vaxta əlavə olunmuş 1-ci dəqiqədə yaşandı. Təhlükəli əks-hücumu Erik Sorqa dəqiq zərbə ilə tamamlaya bilmədi. Beləliklə, “Araz-Naxçıvan”ın “Sumqayıt”la oyunlardakı qələbəsizlik seriyası davam etdi.

Bojoviçin “Neftçi”də ilk qalibiyyəti

“Qəbələ”ni qəbul edən “Neftçi”nin qələbə qazanacağı gözlənilən idi. Yeni baş məşqçi Miodraq Bojoviç “ağ-qaralar”dakı ilk rəsmi qalibiyyətini məhz bu görüşdə əldə etdi. Oyunun start heyətində yer almalı olan İvan Brkiçin matçöncəsi məşqdə əzələsi dartıldığı üçün xorvatiyalı qolkiperi “11-lik”də Rza Cəfərov əvəzləmişdi.

İlk hissədə hər iki tərəfin cəhdlərinə rəğmən, hesab açılmadı. Fasilədən sonra “Neftçi” təzyiqi artırdı. 59-cu dəqiqədə qonaqlar ikiqat zərbə aldılar. Rəqibi aşkar qol imkanından məhrum etdiyinə görə Zurab Oçiqava qırmızı vərəqə görərək meydandan kənarlaşdırıldı və “Qəbələ”nin qapısına penalti təyin edildi. Topa yaxınlaşan Emin Mahmudov isə adəti üzrə şansı qaçırmadı.

Meydan sahibləri qonaqların azlıqda qalmasından dərhal yararlandı. 67-ci dəqiqədə Dieqo Valdezin ötürməyəbənzər zərbəsindən sonra “Qəbələ”nin qolkiperi Kristof Atanqana topu qapıdan çıxarmalı oldu.

“Qəbələ” oyunun sonlarında bir qədər fəallaşdı. Əvvəlcə Rauf Hüseynlinin yerinə yetirdiyi cərimə zərbəsindən sonra qapı tiri “Neftçi”nin köməyinə çatdı. 87-ci dəqiqədə isə Emil Səfərov qapıçıdan qayıdan topu təkrar zərbə ilə tora qovuşdurdu. Ancaq “qırmızı-qaralar”ın bundan artığına gücü çatmadı. Əvəzində Bojoviçin 78-ci dəqiqədə meydana buraxdığı və meydanda olduğu dəqiqələrdə inamlı təsir bağışlayan yeni transfer Brayan Moreno qarşılaşmada son nöqtəni qoydu. O, cərimə meydançası kənarından başla aşırma zərbəsi ilə “Qəbələ”ni cəzalandırdı.

“Neftçi” ilk 2 dövrədə olduğu kimi, yenə Elmar Baxşıyevin komandasını xalsız qoydu və bu qələbə sayəsində turnir cədvəlində 2-ci pilləyə yüksəldi. “Qəbələ” isə düşdüyü uçurumdan çıxmaqda hələ də acizdir.

CAVAD