Zirvədə növbəti yerdəyişmə: “Qarabağ”ın hədiyyəsi, yoxsa?..

Premyer Liqaya intriqa qayıtdı. “Neftçi”nin bu mövsüm ikinci dəfə səfər oyununda “Qarabağ”ı məğlub etməsi ilə zirvə döyüşü yeni rəng aldı.

Bu matçda “Qarabağ”ın qələbəsi çempionun titulunu qoruması yolunda böyük addım olacaqdı. Hətta heç-heçə də ağdamlılara psixoloji üstünlükdə olması və əsas rəqibini özündən geridə saxlaması üçün yetərliydi. Amma başqasına ümidli qalmamaq üçün “Neftçi”nin fərqli planı var idi, onu yerinə yetirərək mərkəzi oyunun geniş müzakirə olunmasına imkan yaratdı.

Matçdan öncə “Qarabağ” favorit sayılırdı. Komplektləşmiş heyəti olan çempion zirvədə qərarlaşmışdı, rəqibini qəbul edirdi, eyni zamanda ikinci dövrədəki 6:0 hesablı qələbədən sonra psixoloji cəhətdən üstün görünürdü. “Neftçi”nin kubokla vidalaşması bakılıların düşərgəsində gərginliyi bir az da artırmışdı.

Lakin “Qarabağ”ın oyuna düzgün yanaşmaması həlledici oldu. Qonaqların əzmkarlığı, daha istəkli olması öz yerində, məhz ağdamlıların mərkəzi oyuna düzgün köklənməməsi nəticəni müəyyənləşdirdi. Digər rəqiblərlə oyunda amansız təsir bağışlayan ağdamlılar bu rəqiblə matçlarda daim təzyiq altında olur, qorxaq təsir bağışlayır.

“Qarabağ” rəqibdən çəkinməyib, ilk dəqiqələrdən hücum futbolu sərgiləsəydi, bəlkə də fasiləyədək işi bitirərdi. Amma Qurban Qurbanov ehtiyatlı oyun tərzi seçdi, topa daha çox sahib olmaqla “Neftçi”nin səhv edəcəyi anı gözləməyə başladı. Ağdamlıların baş məşqçisi bu üsulla arzuladıqları qolu vuracaqlarına, ən azı heç-heçəyə nail olacaqlarına ümid edirdi.

Ömər Buludov yersiz hərəkətlə qırmızı vərəqə alanda meydan sahiblərinin işi bir qədər də asanlaşdı. Lakin Samir Abasov əks-hücum futbolunu ən yaxşı tətbiq edən mütəxəssislərdəndi. Xüsusilə favorit komandalarla iki nömrə kimi oynadığı matçlarda bu, onda yaxşı alınır. Dünən də istisna olmadı. Namiq Ələsgərov Emin Mahmudovun müdafiənin arxasına atdığı topa vaxtında yetişib hesabı açdı. Maksim Medvedev və Bədavi Hüseynov sürətdə uduzdu, Şahruddin Məhəmmədəliyev isə bir anlıq “çərçivə”ni itirdi və paraşüt zərbəsindən sonra topu tordan çıxardı.

“Qarabağ”ın oyununun alınmamasının bir səbəbi də komandanın böyük ölçüdə asılı olduğu Abdulla Zubirin kilidlənməsi idi. Abasov sol cinahda oynayan bu futbolçunu qarşılamağı müdafiəçilərə tapşırmışdı – onlar fransıza hərəkət imkanı vermir, Zubiri mərkəzə yönəlməyə məcbur edirdi. Belə olduqda isə Mamadu Kane Abdullanın qarşısını kəsir, epizodlar içində ona qarşı fərdi oynayırdı.

“Neftçi”nin taktiki anlamda düşündüyü bu üsul ona görə effekt verirdi ki, digər cinah iflic olmuşdu. “Qarabağ”  sağ tərəfdən demək olar, hücum etmirdi. Bunu görən Qurbanov fasilədə iki əvəzləmə etdi, Xayme Romeronun meydana daxil olması, Maksim Medvedevin isə ənənəvi mövqeyinə çəkilməsi gedişatı dəyişdi. Təsadüfi deyil, ikinci hissənin əvvəlində “Qarabağ” əsl oyununu oynamağa başladı, bərabərlik qolunu vurdu. Sağ cinahın fəallaşmasından sonra “Neftçi” yarımmüdafiəsinin işi artdı, nəzarətdən daha çox yayınan Zubirin əl-qolu açıldı. Abdulla bir neçə dəfə cərimə meydançasına daxil olaraq təhlükə yaratdı.

“Qarabağ”ın da oyuna xüsusi yanaşması var idi. Mərkəz müdafiəçiəri Voislav Stankoviç və Mamadu Mbodj oyunu başlamaqda, ilk ötürməni etməkdə məharətli deyil. Bu səbəbdən top bu oyunçulara gəlincə “Qarabağ”ın oyunçuları pressinq edir, onların rahatlığını əlində alırdı. Nəticədə “Neftçi” ciddi hücum qura bilmirdi. Bakılıların iki qol vurmasına baxmayın, onlar matç ərzində ağdamlıların qapısı önündə cəmi bir real təhlükə yaratdı.

Matçın ədalətli nəticəsi heç-heçə idi. Hətta bu qədər səhlənkar oyuna rəğmən, ağdamlılar daha yaxşı görünürdü. Lakin rəqib “Neftçi”yə qələbəni hədiyyə etməyi lazım bildi. Kevin Medina kimi təcrübəli müdafiəçinin təxribata getməsi, Kaneylə münaqişəyə girməsi matçın axarını dəyişdi. Hər şey çempionun istədiyi kimi getdiyi bir zamanda yersiz qırmızı vərəqə, eyni zamanda penalti kolumbiyalının “Qarabağ”a edə biləcəyi ən böyük pislik idi. Düzdü, Kane də ikinci sarı vərəqəylə meydandan qovuldu, lakin Namiq penaltini dəqiq yerinə yetirib növbəti dəfə azlıqda olduqları halda komandasını önə keçirdi.

Son dəqiqələrdə “Neftçi”nin daha bir oyunçusu meydandan qovuldu. Lakin “Qarabağ” iki nəfər üstünlükdə ikən də oyununu nizama sala bilmədi, çempionluq yarışında 6 xallıq oyunda ciddi zərbə aldı. Oyuna uduzmamaq niyyəti ilə çıxan, qorxaq futbol sərgiləyən komanda belə aqibətə layiq idi. Qurbanovun futbolçularından narazı qalması əbəs deyil, dünən onun yetirmələri imkanlarından xeyli aşağı futbol sərgilədi.

Maraqlıdı ki, “Qarabağ” Qəbələdə də eyni aqibəti yaşamışdı. Yerli komanda azlıqda qaldıqdan sonra bərabərlik qolunu vurmuş, çempionu büdrətmişdi.

Təbii ki, çempionluq mübarizəsi bitməyib, “Qarabağ”ın bu rəqibi ilə daha bir oyunu var. Ağdamlılar heyətin genişliyi, oyunçuların keyfiyyəti baxımından üstündü, eyni səhvlər təkrarlanmasa, yenidən zirvəyə qayıdacaqlar. Dünənki məğlubiyyət bəlkə də silkələnmək üçün əla dərs oldu.

“Neftçi”yə gəlincə, bu gün komandanın ən böyük düşməni eyforiyadı. İstək, əzmkarlıq öz yerində, ancaq son qələbə daha çox rəqibin səhvlərinin nəticəsi idi. Qarşıdakı oyunlarda reallaşacaq istənilən sürpriz bu uğurun önəmini azalda bilər. Bakılılar digər matçlarda favorit kimi görünməyə öyrəşməlidi.

Artıq hər xalın ciddi önəmi var. Turnur cədvəli iki hissəyə bölünüb, ilk “dördlük”də qərarlaşanlar öz aralarındakı oyunlarda xallar itirəcək, əsas olan autsayderlərlə matçlarda büdrəməməkdi. Bu baxımdan dünən “Sumqayıt” vacib addım atdı. “Kimyaçılar” kubokdan uzaqlaşdırdıqları “Səbail”i darmadağın etməklə avrokuboklara yollanmaq istəklərin bir daha sübut etdilər.

Sumqayıtdakı matç kubokda başverənlərin təsadüf olmadığını isbatladı. Düzdü, hakimlər Bayılda “Səbail”in qəniminə çevrilmişdi. Amma dünənki matç da göstərdi ki, oyun planında “kimyaçılar” daha yaxşıdı, sadəcə, hakimlər ümumi axarı korlamışdı. Aftandil Hacıyev bəhanələrin arxasında gizlənməməli, komandasının oyununu düzəltməlidi. Heyətdəki legionerlər qovulan gənclərdən heç də yaxşı deyil, onları necə seçdiklərini, hansı üstünlüklərinə görə bu əcnəbilərə qucaq açdıqlarını izah etsin. Komanda hər yeni transferdən sonra bir qədər də zəifləyir. 0:3 biabırçı gedişin son həddi olmayacaq, növbəti turlar daha biabırçı nəticələri özüylə gətirəcək.

FƏRİD