Müsahibə
Əli Yavaş: "Bu, "Qəbələ" üçün böyük reklamdı"
Ötən gün Qəbələdə 15 yaşadək futbolçulardan ib…
Ötən gün Qəbələdə 15 yaşadək futbolçulardan ibarət yığmalar arasında startı verilən "Qəbələ Kuboku"nu izləyənlər arasında türkiyəli Əli Yavaş da var. Futbolinfo.az xəbər verir ki, vaxtilə "Qəbələ" Futbol Akademiyasının direktoru vəzifəsində çalışmış mütəxəssislə elə "Qəbələ" – "Fənərbağça" matçının gedişində söhbətləşdik. Türkiyəli mütəxəssis saytımıza müsahibəsində həm turnirin təşkilatçılığından, həm "Qəbələ"dən, həm də öz işlərindən danışdı.
– Səfəriniz sırf "Qəbələ Kuboku" ilə bağlıdı?
– Bəli. Məni bu turnirə fəxri qonaq kimi dəvət ediblər. Bu üzdən sizin vasitənizlə öncə təşkilatçılara, "Qəbələ" klubuna təşəkkürümü bildirmək istəyirəm.
– Turnir barədə fikirləriniz maraqlı olardı…
– Bu, sayca üçüncü "Qəbələ Kuboku" turniridi. Hər il bu turnirin daha yüksək səviyyədə keçirildiyinin şahidi oluruq. Bu il də əla bir təşkilatçılığın şahidi olmaqdayıq. Heç bir əskik yoxdu. Buraya önəmli komandalar dəvət olunub. Bu, "Qəbələ" üçün böyük bir reklamdı. Klubu, onun bütün işçilərini ürəkdən təbrik edirəm.
– "Qəbələ" sizin keçmiş klubunuz, "Fənərbağça" ölkənizin təmsilçisidi. Hansına azarkeşlik edirsiz?
– Mən hazırda bu komandalardan kiməsə azarkeşlik etdiyimi deməzdim. Sadəcə, meydanda yaxşı oyun, mübarizə görmək istəyirəm. Bu yaşda futbolçuların oyunlarında nəticə o qədər də önəmli deyil. Belə deyim – "Qəbələ"nin daha yaxşı oynamasının şahidi olmağıma daha çox sevinərdim.
– Vaxtilə siz də bu klubun futbol akademiyasında çalışmısız. O dövrlə müqayisədə nəsə dəyişiklik var?
– Mən mütəmadi olaraq akademiyanın məşqçiləri ilə əlaqə saxlayıram, danışıram. Xüsusilə də Halim Ficiçi ilə. Hər dəfə də mənə çox yaxşı xəbərlər çatdırırlar. "Qəbələ"nin aşağı yaş qrupları üzrə komandalarında sürətli inkişafın olduğunu deyə bilərəm. Amma bir az daha səbr etmək lazımdı. Bu işlər birdən-birə nəticə vermir. Bir neçə il sonra hər şeyin daha yaxşı olacağına inanıram. Amma indi də çox böyük inkişafın olduğunu demək lazımdı.
– "Qəbələ" bu il ilk dəfə avrokuboklara vəsiqə qazandı və Azərbaycanı Avropa Liqasında təmsil edəcək. Ümumiyyətlə, keçmiş klubunuzun çıxışı, uğurları ilə maraqlanırsız?
– Təbii ki. Komandanın avrokuboklara vəsiqə qazanması da çox önəmli uğurdu. Bu il Premyer Liqada üçüncü oldular. İnşallah, gələn il çempion olarlar. "Qəbələ"nin kubokun finalında qarşılaşdığı "Neftçi" ilə oyununu da Türkiyədə canlı izlədim. Düzdü, finalda uduzdular. Amma komandanın bura qədər irəliləməsi də bir uğurdu. Fikrimcə, həmin yenilgiyə görə çox üzülməmək lazımdı.
– "Qəbələ"dən ayrıldıqdan sonra sizin "Qalatasaray"a gedəcəyiniz gözlənilirdi. Hazırda işləriniz necədi?
– Bəli, o vaxt "Qalatasaray"a getməyim gündəmdə idi. Amma son anda alınmadı. Bildiyiniz kimi, Fatih Terim bizim "hoca"mızdı. O, klubdan ayrılınca, mən də "Qalatasaray"a gedəsi olmadım. Yaxın günlərdə yeni təklif almışam. Türkiyə millisində çalışacağam. Ora da Fatih Terimin dəvəti ilə gedirəm. Çünki biz bir kollektivik. Fatih hoca hara getsə, biz də onunla birgə olmağa çalışırıq. Millidə baş koordinator vəzifəsini yerinə yetirəcəm.
PƏRVİZ ELTÜRK, Qəbələ