Ölkə futbolu
Qəbələlilərdən AFFA-ya əyani dərs
Ötən həftə daha bir turnirə yekun vuruldu. Artıq 3-cü d…
Ötən həftə daha bir turnirə yekun vuruldu. Artıq 3-cü dəfə baş tutan "Qəbələ kuboku" öz qalibini müəyyənləşdirdi və "Anderlext" kuboku muzeyinə aparmağı bacardı.
Lakin bu turnir başqa bir məsələni də göz önünə gətirdi. Qəbələdə keçirilən yarışla eyni vaxtda 4-cü "Caspian Cup" turniri də başlamışdı ki, bu yarış hələ də davam edir. Düzdü, bu yarışlar arasında fərq böyükdü. Qəbələdə keçirilən turnirdə azyaşlılar iştirak edirdisə, Bakıda daha böyük nəsil mübarizə aparırdı. Qəbələdə klublar kubok qazanmağa çalışırdısa, Bakıda millilər ən güclü adını qazanmaq istəyir. Ancaq maraqlı bir məqam var. Hər iki turnirin eyni vaxtda başlaması birinin kölgədə qalması demək idi. Belə də oldu. Qəbələdə keçirilən yarışdan fərqli olaraq "Xəzər kuboku" kölgədə qaldı, lazımı diqqəti toplaya bilmədi. Əhəmiyyət baxımından Bakıda keçirilən yarış daha üstün olsa da, elə kölgə də qalanda millilərin görüşü oldu.
Bəs qələm əhli necə düşünür? Hansı yarış diqqətdən yayındı?
Kənan Məstəliyev (Rekord.az): "Xəzər Kuboku" mənim üçün yalnız Azərbaycanın Əfqanıstanı yenməsiylə yadda qaldı. Biabırçılıqdı vallah. AFFA "Qəbələ"dən qorxaraq bu kuboku bilərəkdən "Qəbələ Kuboku" ilə eyni vaxta saldı ki, diqqəti öz üzərinə çəksinlər. Paxıllıq ancaq bu qədər olar. Mənim üçün "Xəzər Kuboku"nun heç bir əhəmiyyəti yoxdu. Düşünmürəm ki, süni örtüklü meydançalarda taciklər və əfqanlara qarşı oyunlar hansısa əhəmiyyət daşısın, futbolumuzun gələcəyinə xeyir versin. "Qəbələ Kuboku"nda isə şəxsən şahidi olduğum əla təşkilatçılıq və şərait vardı. AFFA-dakılar qəbələdəkilərin yanına kursa yazılıb həftədə 3 dəfə – tək və ya cüt gün olmasını özləri seçsinlər – öyrənsinlər ki, uşaqlar üçün turnir necə təşkil olunur".
Rəşad Ergün (Komanda): "Təbliğat baxımından, turnirdə iştirak edən komandaların səviyyəsi baxımından Qəbələ kuboku AFFA-nın keçirdiyi turniri çox geridə qoydu. Qəbələdə turnir təşkil olunduğunu bəlkə də ölkənin yarısı bildi. Amma Xəzər kubokunun varlığından yəqin ki, bir ovuc adamın xəbəri oldu. Bu cür turnirlərdə təbliğat çox vacib faktordu. Və "Qəbələ" rəhbərliyi bu yöndə AFFA rəsmilərinə əyani dərs verdi".
Həbib Aslanov (Futbol+): "Təbii ki, "Qəbələ kuboku" daha baxımlı və diqqət mərkəzində olanı idi. Bunun isə bir neçə səbəbi var. 1. Turnir bölgədə keçirilirdi və buna görə də Qəbələdə futbola hansı marağın olduğunu açıb-ağartmaq yersizdi. İlk növbədə azarkeş sayındakı aşkar üstələmə öz sözünü dedi. 2. İstənilən idman növündə ad və imic əsas rol oynayır. Məncə, Əfqanıstan, Qırğızıstan, Özbəkıstanla müqayisədə "Anderlext", "Rapid" və "Fənərbaxça" adları daha cəlbedicidi. 3. "Qəbələ" rəhbərliyi baş məşqçi problemini yoluna qoya bilməsə də, bütün diqqətini turnirə ayırmışdı. Bildiyim qədər təşkilatçılıq yüksək səviyyədə olub. AFFA-nın başı isə öncə yığmanın ABŞ-la, daha sonra U-21-in Norveçlə oyunlarına qarışdığından "Caspian Cup" kölgədə qaldı. Bir də ki, Bakıda nə turnir? Bu tipli turnirlər Qəbələ, Lənkəran, Zaqatala, Gəncə kimi bölgələrdə keçirilməlidi”.
Elgiz Abbasov (Futbol11.az): "Ümumiyyətlə, aşağı yaş qrupları üzrə keçirilən bütün yarışları alqışlamaq lazımdır. Həmin yarışlar ən azından futbolçuların meydançaya, topa, böyük səhnəyə alışması üçün stimuldur. Amma bunu normal şəkildə keçirmək lazımdır. 2-ci "Qəbələ kuboku" başa çatdıqdan sonra "Qəbələ" 3-cü yarışın hazırlığına başladı, bu barədə mütəmadi məlumat verdi. "Caspian Cup"dan isə bu ölkədə çox az adamın xəbəri var. Qəbələdəki yarışın təbliğinə çox böyük önəm verildi ki, bu da işi zənginləşdirdi, turnirin əhatə dairəsini genişləndirdi. Düşünürəm ki, AFFA bu mənada Qəbələ təmsilçisindən örnək götürməlidir. Bundan əlavə, mütləq şəkildə turnirlər eyni vaxtda yox, fərqli vaxtda keçirilməlidir. Bundan qazanan AFFA olar".
İdman jurnalistləri də "Caspian Cup"ın kölgədə qaldığını düşünür. Bunun üçün çıxış yolu tapmaq lazımdı. Ən sadə yol isə turnirlərin eyni vaxtda keçirilməməsidi. Təbii ki, əgər AFFA istər təşkilatçılıq, istər diqqət baxımından "Qəbələ kuboku"ndan geri qalmaq istəmirsə, növbəti dəfə yarış üçün tam fərqli bir zaman seçməlidi. Bu, həm də Azərbaycan futboluna olan diqqətin bir az da artmasına gətirib çıxarar. Ancaq ən önəmli olan təşkilatçılıqdı. Yalnız AFFA-nın baş katibi Elxan Məmmədovun qohumlarının direktoru olduğu arenalarda oyun keçirməklə "Caspian Cup"I bir neçə yerə parçaladılar, Mərdəkan – Bayıl – Sumqayıt üçbucağı yarıça az-çox maraq göstərənləri də dilemma qarşısında qoydu. Bu səbəbdən də vaxt amili ilə yanaşı təşkilatçılığın bərbad olması da Bakıdakı yarışı “Qəbələ kuboku”nun kölgəsinə atdı.
RÖVŞƏN ƏHLİMANOĞLU