Ölkə futbolu
Daha bir mövsümə bir quş
“Xəzər Lənkəran”ın daha bir ilinə bir quş. Cənublu…
“Xəzər Lənkəran”ın daha bir ilinə bir quş. Cənublu azarkeş yeni mövsümdə də iddiasız, əzəmətsiz, səndələyən komanda görəcək.
Lənkəranda nə baş verdiyini bilmirəm, amma o dəqiqdi ki, klubun Türkiyədəki idarəçiləri güc gəlir. Con Toşaka, Mustafa Dənizliyə görə Mübariz Mənsimova milyonlar xərclədən ətrafı indi də Oğuz Çətini “Xəzər Lənkəran”da taxta oturda bildi. İndi onun vasitəsi ilə Gökhan Güləc timsalında neçə-neçə karyerası qürub etmiş türk futbolçu ölkəmizə gələcək, daha nə qədər məğlubiyyətlər reallaşacaq və bir də mövsümün sonunda yenidən Mirça Rednikin, Ağasəlim Mircavadovun adı “ağ-yaşıllar”la yanaşı çəkiləcək.
Çətinin təyinatına qiymət vermək üçün heç də gec deyil. O, Dənizlini əvəz etdiyi vaxtlarda komanda hər nə qədər uduzmayıb uğurlu nəticələr göstərsə də, “Xəzər Lənkəran” onluq deyil. Ümumiyyətlə, məşqçilik karyerasına baxsaq, Oğuzun hansısa komandaya rəhbərlik edəcək səviyyədə olmadığını qətiyyətlə deyə bilərik. Sadəcə, bu təyinat Dənizlinin, eləcə də özünün kompensasiya yırtığına vurulan yamaqdı. Yamaq isə heç vaxt təzə geyim, toy-büsat paltarı ola bilməz, onu yalnız ev içində geymək olar. Çətin də Lənkərana komanda yaratmağa, heyət qurmağa yox, hansısa bir müddəti yola verməyə gətirilib.
Lənkəranda növbəti şou mövsümü başlayır. Əslində, şou Dənizlinin baş məşqçi ola-ola komandadan ayrı qaldığı, Oğuzun oyunlara çıxdığı vaxtlar başlamışdı. İndi isə bu proses davam edir. Mustafa hocadan xeyir-dua alıb-almadığını bilmirəm, lakin müəlliminin tövsiyyələri də çovğunlu havaya başıaçıq çıxmış sabiq “Fənərbaxça” kapitanına çətin ki, kömək olsun.
“Xəzər Lənkəran”da heç nə bəlli deyil. Dənizlinin klubda hansısa vəzifəyə qayıdıb-qayıtmayacağı, məşqçilər korpusunun necə formalaşacağı, ümumiyyətlə, transfer bazarında işləri kimin görəcəyi – heç nə bəlli deyil. Sadəcə, tələm-tələsik baş məşqçi təyin edildi ki, Çətin indiki durumda mənə Yusif Sərracı xatırladır. Nə olacaqsa, onun başında çatlamalıdı. Ancaq “Xəzər Lənkəran”ın həm buradakı rəhbərliyi, həm də böyük Mənsimovun Türkiyədəki ətrafı anlamalıdı ki, olan komandaya, onun göstərdikləri dəstəyin qarşılığını görməyən azarkeşlərinə olacaq.
Mən bildiyim qədər Toşakın təyinatından başlayaraq sonrakı bütün işlərdə komanda birbaşa Türkiyədən idarə olunur, buradakı rəhbərlik sadəcə, icraçı səlahiyyətlərini yerinə yetirir. Çətinin təyinatı da bu silsilənin davamıdı. Onun uğursuzluğa son qoyan adam olacağına şəxsən inanmır, amma ümid edirəm. Bunu isə dəqiq bilirəm ki, Oğuzun təyinatı klub üçün kosmetik dəyişiklikdi, o, simanı cilalaya biləcək adam deyil. Ona görə də “Xəzər Lənkəran”ın daha bir ilinə bir quş.