Ölkə futbolu
Cavid Hüseynov: "4 aydı maaş almırıq, yaşamaq çox çətindi"
Futbolinfo.az sizi “Bakı” klubunun futbolçusu Cavi…
Futbolinfo.az sizi “Bakı” klubunun futbolçusu Cavid Hüseynovun müsahibəsi ilə tanış edir.
– Adınız son günlər müxtəlif komandalarla birgə çəkilir. Konkret “Xəzər Lənkəran” və “İnter”in xidmətinizdə maraqlı olduğu deyilir. Bu klublardan təklif almısız?
– Adımın müxtəlif klublarla birgə çəkilməsinin, xidmətimdə daha çox komandanın maraqlı olması sevindirici haldı. Amma hələlik “Bakı”ya məxsusam – 2016-cı ilin qışına qədər müqaviləm var. Bu səbəbdən fikir bildirməyim düzgün olmazdı.
– Müqavilənizin olmasına rəğmən, özünüzə başqa komanda tapmaq haqda düşünürsünüzmü?
– Yaxın günlərdə klubdadaxili iclas olacaq. Həmin toplantıda bütün suallara aydınlıq gətiriləcək.
– Toplantı nə vaxt keçiriləcək?
– Dəqiq tarix deyə bilməyəcəm. Çünki çempionat başa çatdıqdan sonra bütün futbolçular istirahətə buraxıldı. O gündən indiyədək bizimlə əlaqə saxlayan olmayıb. Oturmuşuq evdə, heç nədən xəbərimiz yoxdu.
– Bəs hazırlıq nə vaxt başlayacaq?
– Komanda iyunun 25-də toplaşmalıdı. Hər halda, istirahətə çıxmazdan öncə bizə belə deyilmişdi.
– “Bakı”nın futbolçularının bankdakı pullarının “oğurlanması” barədə xəbərlər yayılıb…
– Mən banka pul qoymuram.
– Maaşlarınız bankdakı hesabınıza köçürülür, yoxsa nağd alırsız?
– Bankdakı hesabımıza köçürülür.
– Klubdan futbolçulara olan borcla bağlı nə deyirlər?
– Fikrimcə, müvəqqəti sıxıntıdı. Klub prezidenti Hafiz Məmmədovun bu problemləri yoluna qoyacağına inanıram. Düzdü, 4 aydı maaş almırıq, yaşamaq çox çətindi. Əlavə qazanc yerimiz də yoxdu. Hər birimiz ailə sahibiyik. Bu üzdən də çətinlik çəkirik. Ümid edirik ki, yaxın vaxtlarda problem həllini tapacaq.
– Fasilə zamanı dincəlmək üçün hansısa məkana üz tutdunuzmu?
– Xeyr, heç yerə getmədik. Bu il təəssüf ki, istirahətimizi evdə keçirməli olduq.
– Səbəbini deyə bilərsinizmi?
– Xaricə getməməyimizin müxtəlif səbəbləri var. Təbii ki, bura maddi problemləri də əlavə etməliyik.
– Hafiz Məmmədov müsahibələrinin birində yeni mövsümdə gənclərə daha çox şans veriləcəyini bildirmişdi. Bu addım komandanın məqsədinə təsir edəcəkmi?
– “Bakı”nın gənc yetirmələri də sözünü demiş futbolçulardı. Çempionat ərzində onlar müxtəlif oyunlarda meydana çıxdılar. Hamısı perspektivli uşaqlardı. Baş məşqçi şans verdiyi 4-5 futbolçu özünü yaxşı tərəfdən göstərdi. Onlar təcrübə qazandıqca daha çox fayda verəcəklər. Yaxşı olacağını düşünürəm.
– Həmin gəncləri birdən birə yox, tədricən “bişmələr”inə şərait yaratmaq daha effektli olmazdımı?
– Bu, klub rəhbərliyi səviyyəsində verilmiş qərardı. Onlar belə məsləhət biliblərsə, o cür də davam edəcək. (apasport.az)