Ölkə futbolu
“Bakı”da həlledici toplantı: Bütün suallara son qoyuldu
“Bakı”nın ətrafında gəzən söz-söhbətlər …
“Bakı”nın ətrafında gəzən söz-söhbətlər bitdi, klubun başının üstünü alan təhlükə aradan qalxdı. Komandanın icraçı direktiru Yaşar Seyidovun dediyinə görə, artıq paytaxt təmsilçisi ilə bağlı bütün tərəddüdlərə son qoyulub və “Bakı”nın növbəti mövsümdə iştirakı üçün əngəl qalmayıb.
Seyidovun Futbolinfo.az-a dediyinə görə, şənbə günü “Bakı”nın prezidenti Hafiz Məmmədovun rəhbərliyi ilə klubdaxili iclas olub və bütün aktual məsələlər həllini tapıb. Klubun strategiyası bir daha dəqiqləşdirilib və eyni qüvvəylə irəliləmək qərara alınıb: “Klubumuzda problemdə maraqlı olan bədxahları təəssüfləndirməli olacam. “Bakı”nı istəməyən qüvvələrin arzuları doğrulmadı və yolumuza, işimizə, ölkə futboluna xirmət etmək amalımıza davam edəcəyik”.
Yaşar bəyin dediyinə görə, komanda ilə bağlı bütün məsələlər dəqiqləşib. Yeni mövsümə hazırlıq ayın sonuna kimi başlayacaq: “Sabahdan fiziki hazırlıq üzrə məşqçimiz futbolçuları bir araya yığıb onların durumuna baxacaq. Bundan başqa hamı tibbi baxışdan keçəcək və iyunun 28-də baş məşqçi Milinko Pantiç ilk toplanışa start verəndə oyunçuların hansı durumda olmasıyla bağlı konkret bilgi sahibi olacaq. Heyətdəki bütün oyunçularla bağlı yekun qərarı da baş məşqçi verəcək. Müqaviləsi bitən oyunçularla vidalaşmışıq, anlaşması davam edənlərlə isə yola davam edəcəyik. Yalnız məşqçinin təqdimatı və bundan sonra Hafiz müəllimin qərarı ilə bəzi oyunçularla vidalaşa bilərik. Hələlik hamı heyətdə qalır və kimsəni buraxmaq niyyətində deyilik”.
Heyətdə əsasən klubun akademiyasının yetirmələrinə üstünlük veriləcəyini söyləyən Yaşar bəyin dediyinə görə, başqa klubların maraqlandığı aparıcı oyunçularla bağlı qərarı da Məmmədov verəcək: “Bundan sonra bütün transferlərə Hafiz müəllim nəzarət edəcək. Məşqçi istəyən oyunçular heyətdə qalacaq, vidalaşacağımız futbolçulara görə isə onlarla maraqlanan klublardan rəsmi müraciət gözləyəcəyik. Menecerlər, bəzi işbazlar bilsin ki, bəzi futbolçularımızın ağlını qarışdırmaq lazım deyil. Onların kimlərəsə verdiyi vədlərin mənası yoxdu. Yaxşı olardı ki, oyunçularımızı istəyən klublar da birbaşa kluba müraciət etsinlər. Çünki Hafiz Məmmədovun razılığı olmadan heç bir oyunçunu heyətlərinə qata bilməyəcəklər”.
İcraçı direktor klubla bağlı bütün suallara dünənki görüşdə son qoyulduğunu dedi: “Bir sıra məsələlərlə bağlı problemlərimiz var idi. Ancaq artıq hər şey dəqiqləşdi. Futbolçulara maaşların ödənilməsi ilə bağlı çətinliklərimiz mövcud idi, indi isə hər hansı əngəl yoxdu. Yeni mövsüm start götürənə kimi heç kimə hər hansı borcumuz olmayacaq. “Bakı”nın Premyer Liqada çıxışını dayandırması da mümkün və müzakirə mövzusu deyil. Heyətdə olan təcrübəli oyunçulardan, müqaviləsi davam edən əcnəbilərdən və öz akademiyamızın yetirməsi olan çoxsaylı istedadlardan qurulan bir komanda ilə yenə iddiamızı ortaya qoyacağıq. Bizdən şikayət edən bəzi əcnəbi oyunçularla bağlı problemlər də yaxın günlərdə həllini tapacaq. Prezident FİFA-nın qoyduğu müddət bitənə kimi problemin tərəfimizdən həll edilməsi üçün lazım olan işlərin görülməsi üçün tapşırıqlarını verib”.
Gənclərin ağırlıq təşkil etdiyi heyətlə komandanın iddiasını davam etdirməsi çətin görünsə də, Yaşar bəy müsbət sonluğa inanır: “Ölkə futboluna töhfə vermək üçün yerli gənclərin inkişafında maraqlıyıq. Bu baxımdan akademiyamızda neçə illərdi yetişən gənclərin imkanlarından istifadə etməliyik. Ola bilsin ki, avrokuboklara vəsiqə qazana bilməyəcəyik. Əslində, yaxın 2 ildə belə bir hədəfimiz də yoxdu. Amma bu uşaqların daha da inkişaf edib təkmilləşməsindən sonra növbəti illərdə qitə arenasına daha güclü, daimi uğur qazanan komada ilə çıxacağıq. Bu gün iki oyunçumuzu qitə klubları istəyir. Türkiyənin aşağı dəstə komandaları yox, İspaniya, Fransa klubları… Namiq Ələsgərovu bir La Liqa klubu heyətinə cəlb etmək niyyətində idi. Eləcə də akademiyamızın yetirməsi olan gənclərdən birini fransızlar istəyir. Qeyd edim ki, bunlar “Atletiko” və “Lans” deyil, tamam başqa klublardı. Amma baş məşqçimiz Milinko Pantiç onların gedişinə razı olmadı. Onlar qarşıdakı illərdə səviyyəsini daha da artırıb, daha yaxşı klublara gedəcək”.
CAVAD
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…