Müsahibə
Sertan özündən narazıdır: “Daha yaxşısını edə biləcəyimi düşünürəm”
Türkiyənin 1-ci liqasında çıxış edən “Manisa” klubunun futbolçusu Sertan Taşkının futbolinfo.az saytına müsahibəsi
– Artıq 3 aydır ki, karyeranızı Türkiyədə davam etdirirsiniz? 1-ci liqaya tam uyğunlaşmısınız? Oradakı performansınız özünüzü qane edir?
– Adaptasiya baxımından çox çətinlik çəkmədim. Bu da komanda yoldaşlarım və məşqçilərimizin məni çox yaxşı qarşılamaları ilə bağlı oldu. Onların sayəsində tez bir zamanda “Manisa”ya, 1-ci liqaya uyğunlaşdım. Açığı, göstərdiyim oyun məni tam qane etmir. Bu, Türkiyə ilə bağlı olan bir şey deyil, mənim özümlə bağlıdır. Həmişə daha yaxşısını edə biləcəyimi düşünürəm.
– Superliqaya vəsiqəni təmin etmiş “Eyüpspor”la oyunda 2:2 hesablı heç-heçə etdiniz. Matçın gedişində 0:2 hesabı ilə geridə olsanız da, yekunda 1 xal qazana bildiniz…
– “Eyüpspor”la matçda 7 real qol imkanımız oldu. Amma bunlardan cəmi ikisini qola çevirə bildik. Qaçırdığımız penalti oldu. Buna görə də qazandığımız 1 xala sevinmədik, itirdiyimiz 2 xala görə çox məyus olduq.
– Türkiyə 1-ci liqası ilə Azərbaycan Premyer Liqası arasında nə kimi fərqlər var? Hansı məqamlara görə Türkiyə 1-ci liqası üstündür, hansı məqamlara görə Misli Premyer Liqası?
– Türkiyə 1-ci liqasının üstünlüyü komanda sayının çoxluğunda və azarkeş sayındadır. Azərbaycan Premyer Liqası ilə müqayisədə burada 1 komanda ilə mövsüm ərzində 2 dəfə qarşılaşırsan. Türkiyə 1-ci liqasında təkcə bir problem var. O da hakimlərin təmaslı oyuna çox icazə verməməsidir.
– “Manisa” liqada qalmaq uğrunda oynayır, hazırda 33 xalla 14-cü yerdəsiniz. Komandanız liqadakı yerini qoruya biləcək?
– Bu vəziyyətə düşməyi istəməzdik. Keçmiş oyunlara baxanda itirdiyimiz xallara görə məyus oluruq. Amma bundan sonra əlimizdən gələni edəcəyik ki, liqadakı yerimizi qoruyaq. Qarşıdakı oyunlarda maksimum nəticə qazanmağa çalışacağıq.
– Növbəti tur çərçivəsində bu gün səfərdə “Altay” ilə qarşılaşacaqsız. Rəqibin heç bir iddiası qalmayıb, liqanı tərk edəcəyi dəqiqləşib, sizin üçün isə 3 xal qazanmaq çox vacibdir. Qalib gələrək azarkeşlərinizi sevindirə biləcəksiniz?
– İnşallah, əlimizdən gələni edəcəyik. Bu görüş bizim üçün böyük önəm kəsb edir. Azarkeşlərimizi sevindirməyə çalışacağıq.
– Coşqun Diniyev və Bəxtiyar Həsənalızadə ötən yaydan Türkiyə 1-ci liqasında oynayır, Ramil Şeydayev, Vüsal İsgəndərli və siz isə qışdan etibarən bu liqada çıxış edirsiniz. Adıçəkilən azərbaycanlı futbolçularla tez-tez danışıb söhbətləşirsiniz?
– Əlbəttə, danışırıq, bir-birimizlə əlaqə saxlayırıq. Hər birimiz çalışırıq ki, komandalarımıza kömək edək.
– Yanvarda “Manisa” ilə 1,5 illik müqavilə imzalamışdınız. Sözləşmənizin sonunadək bu klubda qalmaq fikrindəsiniz, yoxsa yayda Türkiyədə daha iddialı kluba keçmək istərdiniz?
– “Manisa” ilə qüvvədə olan müqaviləm var. Gələcək haqda hələ düşünməmişəm. Hazırda bütün fikrimi komandamın çətin vəziyyətdən çıxmasına yönəltmişəm.
– Sabiq komandanız “Turan Tovuz”un nəticələrini diqqətdə saxlayırsınız? Necə düşünürsünüz, Tovuz klubu avrokuboklara vəsiqə qazana biləcək?
– Əlbəttə, “Turan Tovuz”un oyunlarını, nəticələrini izləyirəm. Komanda yaxşı çıxış edir. Onlara uğurlar arzulayıram. İnanıram ki, avrokuboklara vəsiqə qazana biləcəklər.
FƏRİD
- Ölkə futbolu2024-04-17 17:17
Kadiri yeni məşqçiyə uyğunlaşır: “Zamana ehtiyacımız var”
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Müsahibə2024-04-17 16:07
Sekidika çempionatın səviyyəsindən razıdır: “İstənilən komandanı məğlub etmək olar”
- I Liqa2024-04-17 17:34
Apellyasiya Arbitraj Tribunalı AFFA İntizam Komitəsinin qərarını dəyişdi