Müsahibə
Elvin Məmmədov: "Klub rəhbərliyi qarşımıza 3-4 mərhələ keçmək vəzifəsini qoyub"
"İnter"in yarımmüdafiəçisi Elvin Məmmədovun…
"İnter"in yarımmüdafiəçisi Elvin Məmmədovun futbolinfo.az saytına müsahibəsi
– Sabah komandanız "Tiraspol"la cavab matçına çıxacaq. Moldovalılara qarşı oyun öncəsi fikirlərinizi bilmək maraqlı olardı…
– Qələbə qazanaraq növbəti mərhələyə adlamaq istəyirik. Baxmayaraq ki, istənilən hesablı heç-heçə də bizə bəs edir.
– Necə düşünürsüz, 3:2 hesablı nəticədən sonra komandanız meyndanda hansı taktika ilə çıxış etməlidi?
– Vallah, bunu baş məşqçi daha yaxşı bilər. Kaxaber Sxadadze hansı taktikanı desə, komanda da ona uyğun oyun sərgiləyəcək. Bu, yeni mövsümdə "Şəfa" stadionunda ilk oyunumuzdu. Baş məşqçimiz də çox gözəl bilir ki, ilk oyunda qələbə qazanmaq lazımdı.
– "İnter"in indidən İsveç “Elfsborq”u ilə oyunu düşündüyünü demək olar?
– Xeyr. Çünki cavab qarşılaşmasında şanslarımız bərabərdi. O qədər belə oyunlar olub ki. Elə komandalar var ki, evdə 3:0 udub, səfərdə isə 0:4 hesabı ilə məğlub olur. Bunu siz də yaxşı bilirsiz. Futbolda hər şey mümkündü. İnşallah, bu şansdan maksimum yararlanarıq.
– Cavab matçında iştirak etməmək sizin üçün ağır olamayacaq?
– Əlbəttə, bu, mənim üçün çətin olacaq. Formada ola-ola komandaya kömək edə bilməmək futbolçuya pis təsir edir. Nə etmək olar? Heç kim zədədən sığortalanmayıb. Mən də yeni mövsümdə "Şəfa"da baş tutan ilk oyunumuzda komandama kömək etmək istəyirdim. Amma olmadı. Əsas odu ki, komandamız qələbə qazansın.
– Uzun müddət idi ki, biz əsl Elvin Məmmədovun oyununu izləyə bilmirdik. "Bakı"da çıxış edəndə oyununuz alınmırdı, yoxsa başqa bir səbəbi var idi?
– Köhnə mövzulara qayıtmaq istəmirəm. Hər şey geridə qaldı. Bundan sonra nəyisə geri qaytara bilmərik. "İnter"ə gəlişim uğurulu alındı. Təlim-məşq toplanışından yaxşı istifadə etdik. Baş məşqçimiz sağ olsun ki, hər dəqiqə bizi kənara çəkib, söhbət edirdi. Yeri gələndə qışqırır, normal başa salırdı. Bu komanda oyunudu. Sırf Elvinin tək gördüyü iş deyil. Oyunumuzun uğurlu alınmasına, qol vurduğuma görə sevinirəm. İnşallah, bunun davamı gələr.
– Necə düşünürsüz, "İnter"in hazırkı durumu neçə mərhələ adlamağa imkan verir?
– Bunu zaman göstərər. Biz ilk növbədə "Tiraspol" səddini aşmalıyıq. Sonra isə digər oyunları analiz etməyə imkanımız olacaq. Klub rəhbərliyi də qarşımıza 3-4 mərhələ keçmək vəzifəsini qoyub. Buna gücümüzün nə qədər çatacağını isə zaman göstərəcək.
– Yəqin ki, dünən Dünya Çempionatının yarımfinal mərhələsi çərçivəsində Braziliya və Almaniya milliləri arasında baş tutan qarşılaşmaya baxdız…
– Bəli, matça mən də baxdım. İnanırsız, şokda idim. Düzdü, favoritim Almaniya idi. Ancaq belə bir hesab gözləmirdim. 5-ci qoldan sonra yatdım. Bildim ki, Braziliya artıq geri dönüş edə bilməz. Ev sahibləri matça yaxşı başlasa da, qapılarında gördükləri qollar onları yıxdı.
– Jurnalist olsaydız, bu matça hansı sərlövhəni qoyardız?
– (gülür) Mən bunu "Braziliyanın fiaskosu" kimi qeyd edərdim. Bu biabırcı hesab onların tarixinə qara hərflərlə yazıldı. Onların belə bir hesabla məğlub olduqlarına inana bilmirəm.
– Sonuncu dəfə 1954-cü ildə keçirilən DÇ-də Macarıstandan 4 qol buraxmışdı…
– Deyirəm də, bu hesabla uduzduqları yadıma gəlmir. Azarkeşlərə də diqqət yetirirdim. Braziliyanın qapısından hər keçən qoldan sonra onlar da ağlayırdı.
– Azərbaycan millisinin oyunları yadınıza düşmədi ki?
– (gülür) Almaniyaya 1:6 hesabı ilə uduzanda mən yox idim. Ancaq hesabı bilirdim. Həqiqətən də almanlara qarşı oynamaq çətindi. Onlarda kiməsə acıma duyğusu yoxdu. Demək olar ki, dünən ev sahibləri meydanda yox idi. Bu qədər səviyyəli futbolçuların bir yerə toplandığı millidən belə oyun görmək həqiqətən də xoş deyil.
– Argentina – Hollandiya yarımfinalı ilə bağlı fikirləriniz necədi?
– Fikrimcə, Argentina finala vəsiqə qazanacaq. Çünki orada Messi və Di Mariya amili var. Ancaq hər şey ola bilər. Argentinanın finala vəsiqə qazanacağı təqdirdə Almaniyaya asan yem olacağını düşünmürəm. Futbolçular hər oyuna başqa bir motivasiya ilə meydana çıxırlar. Mənim fovaritim yenə də Almaniyadı.
EMİN SƏFƏROV