Ölkə futbolu
“Neftçi” Avropa Liqasına hazır deyil
Ötən mövsüm “Skenderbeu” “Neft&ccedi…
Ötən mövsüm “Skenderbeu” “Neftçi”ni necə nokauta salıbsa, bakılılar hələ də özünə gələ bilməyib. Bu sarsıdıcı zərbənin təsiri ilə bir il boyunca başı hərlənən komanda ölkə çempionatında ilk “üçlük”dən kənar qaldı, rəhbərlik qovulacaqları günü gözləyə-gözləyə tikan üstdə oturdu. Qorxuram Albaniya klubunun vurduğu yaranın qaysağını indi də “Koper” qopara…
“Neftçi” bu həftə Avropa Liqasının yeni mövsümündə ilk oyununa çıxacaq. Ancaq çətin ki, bunu idman mətbuatını izləməyənlər bilmiş olsun. Çünki dövlət büdcəsindən maliyyələşsə də, əsas vəzifələrindən biri ölkədə futbolun kütləviliyinə töhfə vermək olsa da, paytaxt klubunun rəhbərliyi öz məsuliyyətini anlamır. Komanda bir yana, heç rəhbərlik də bu yarışa hazır deyil. Başı “sağ olsun Sadıq müəllim” deməyə qarışanlar bir də ayılacaq ki, oyun günü çatıb, amma ortada heç nə yoxdu.
İki gündən sonra “Koper”lə görüş reallaçacaq. Amma hələ də oyunla bağlı hər hansı afişaya, təbliğata yönəlik nəyəsə rast gəlmirik. Heç oyunun biletləri də bugünə kimi satışa çıxarılmayıb. Hətta ölkə kubokunda aşağı dəstə təmsilçisi ilə matça da belə yanaşma olmur. Ya “Neftçi” Sloveniya klubunun ilkin mərhələdə rəqibinə 9 qol vurması üzündən altını batırıb mümkün biabırçılığı səssiz-səmirsiz həzm etmək istəyir, ya da klub prezidenti Sadıq Sadıqovun təbliğat xarakterli işləri yoluna qoymaq üçün təşkilatçılıq bacarığına güvənəcəyi kadrı yoxdu.
Belə baxanda sonuncu variant daha inandırıcıdı. Çünki klubda üzünü kimə tərəf tutursansa, şefin qohumu çıxır. Onlara isə maaş gördükləri işə görə deyil, kresloda əyləşdikləri üçün verilir. Halbuki elə prezidentin öz oğluna çatan aylıq konvertin hesabına Bakının yarısını stadiona yığmağa kifayət edəcək qədər iş görmək olar. Ancaq bu, “Neftçi”yə lazımdımı? Yəqin ki, yox.
Baş məşqçi Böyükağa Hacıyevin də səsi gəlmir. Həmişə iddialı danışan çalışdırıcı sanki daş atılmış qurbağa gölünün kənarında əcəlini gözləyir. Albanlarla oyundan öncə iddialı danışdı, bu isə ona postu hesabına başa gəldi. Bir də geri qayıtmaq üçün Tərlan Əhmədovla Nazim Süleymanovun torbasını tikmək üçün aylarından keçdi. Son çempionatın gedişində də “çempion ola bilməsək, gedəcəm” demişdi. Amma klub prezidenti Sadıq Sadıqov da eyni vədi verdiyindən məşqçi qurtuldu. Rəhbəri vədinə xilaf çıxandan sonra Hacıyevin verdiyi sözü unutmasına nə var ki? “Koper”sə artıq gözləri qorxudub, ona görə də Böyükağa bəy ağzına su alıb oturub ki, uda bilməyəcəyi loxmanı ağzına qoymasın.
Ümumiyyətlə, “Neftçi”nin təbliğat işlərinə, “Qəbələ” ilə ölkə kubokunun finalında dərs aldığı təşkilatçılığa belə laqeyidliyə əsas səbəb qorxaqlığdı. Çünki Sloveniya klubu ilə oyun nə qədər az adamın gözü önündə reallaşsa, bir o qədər yaxşıdı. İnanın, ictimai qınaq olmasaydı, hətta matçın yayımına da razılıq verməzdilər. Çünki komandanın hazırlığından, güclənmə planlarından görünür ki, rəhbərliyi, idarəçiləri kimi futbolçu və məşqçi heyəti də bu matça hazır deyil. Daha bir “Skenderbeu” faciəsi qapıdadı…
FƏRİD