Ölkə futbolu
Yol verin “yolaverən”ə
Ötən mövsüm futbol üzrə Azərbaycan çempi…
Ötən mövsüm futbol üzrə Azərbaycan çempionatının birinci divizionunu zirvədə başa vurub, elitaya vəsiqə qazanan “Araz Naxçıvan”ın Premyer Liqada hansı hədəf üçün yarışacağını hamı maraqla gözləyir. Çünki uzun fasilədən sonra muxtar respublika da futbol elitamızda təmsil olunacaq və AFFA bunun üçün çox güzəştlər etdi. Digər divizion klublarının Naxçıvana səfər xərclərini qarşılayan futbol qurumu bununla bir növ “Araz”ı ofsayddan qurtardı.
Amma deyəsən, heç gözləməyə də dəyməz. Çünki muxtar respublika təmsilçisi gücləndirmək üçün lazımi işlər görmür. Komandada hələ də aşağı liqaya hazırlaşma ab-havası var. Sanki “Araz” yenə gənclərin üstünlük təşkil etdiyi, elita komandalarına lazımsız futbolçuların yığışdığı yarımpeşəkar klublarla oynayacaq. Halbuki Əsgər Abdullayevin yetirmələrini çox çətin mübarizə gözləyir.
Təcrübə göstərir ki, yüksək liqaya vəsiqə qazanan komanda (özü də ilk dəfə) “gəlişi möhtəşəm olsun” deyə, heyətə daha güclü futbolçular cəlb edir, hazırlığa ciddi fikir verir. Amma “Araz Naxçıvan” elə gəldiyi kimi də getmək istəyənə oxşayır. Digər Premyer Liqa klublarına lazım olmayanların, yaxud komandasız qalan futbolçuların “Araz Naxçıvan”da nə edəcəyi çox maraqlıdı. Deyəsən, bu komanda elitada da Abdullayevin məşqçi bacarığı sayəsində hamıya meydan oxuyacağını düşünür.
Komandanın baş məşqçisi Əsgər Abdullayev mətbuata açıqlamalarında deyib ki, yerlilərdən ibarət komanda quracaq. Bəs görəsən, ölkəmizdə yerli futbolçuya ən çox tələbat olan vaxtda yüksək liqaya yeni vəsiqə qazanmış kluba hansı güclü futbolçumuz üz tutacaq? Hazırda futbolçularımız iddialı klublarımızda çıxış etmək fikrindədi. Həmin klublardan ümidini üzən də üz tutur Türkiyə PTT 1-ci Liqasına. İndi görəsən, Əsgər müəllim bu rəqabət şəraitində, özü də əksər futbolçuların paytaxtda yaşamaq istəyi varkən komandaya yeni nəfəs gətirmək potensialı olan hansı yerli oyunçumuzu Naxçıvana apara biləcək? Yerlilər bir yana, ən azından baş məşqçi komandaya kömək edə biləcək bir neçə legioner gətirməli deyil? Amma hələ də hansısa əcnəbinin adı “Araz Naxçıvan”la hallanmayıb.
Premyer Liqada çıxış edən və “çempionatı yola verən” bəzi klublarımız mətbuatda tez-tez tənqid olunurlar. Onlar tənqid olunsalar belə, hansısa yerlisi, yaxud legioneri iddialı klublarımızın transfer hədəfində olur. Yaxud da yaxşı yerli futbolçu ala bilməsələr belə, komandanı bəzən çiyinlərində daşıya biləcək legionerlər alırlar. Amma artıq digər klublar transferlərini yekunlaşdırmaq üzrə olsalar da, “Araz Naxçıvan” tərpənmir. Hesab etmirik ki, klubun ən azından 1-2 səviyyəli əcnəbi futbolçu almağa gücü çatmasın. Hər halda, Əsgər müəllim də yaxşı bilir ki, çempionat uzun marafondu və bu mübarizədə heç kim heç kimə güzəşt etmək fikrində deyil. Görəsən, iddialı olmayan klubumuza lazım olmayan və bir neçə ildə çıxışı ilə diqqət çəkməyən həmin 3-4 futbolçu ilə bağlı baş məşqçinin hansı planları var ki, onları komandaya gətirib? Onlardan güclü rəqiblərə qarşı necə istifadə edəcək?
Təbii ki, Abdullayev də güclü heyət qurmağı arzulayır. Veteranlarla və hələ ciddi elita təcrübəsi olmayanlarla işləmək onun da ürəyincə deyil. Sadəcə, Əsgər bəyə lazımi büdcə ayrılmır. Bu isə onu göstərir ki, muxtar respublika təmsilçisi elitaya baş qatmağa və çətinə düşəndə umduğu hansısa güzəştlərlə burada duruş gətirməyə gəlib. Belə komanda isə iddialı ola bilməz. Yəqin ki, naxçıvanlılar Premyer Liqada yalnız iştirak xatirinə iştirak edəcək. Görünür Naxçıvandan çıxan iş adamları üçün Bakı klublarına himayədarlıq etmək daha sərfəlidi, yerli komanda isə yerli hakimiyyət nümayəndələrinin ümidinə qalacaq. Onlar isə cibindən çıxardığı pulu 5 dəfə sayıb xərcləyir ki, birdən ziyana düşərlər.
- Premyer-liqa2024-05-17 22:21
“Qarabağ” “Turan Tovuz”a qalib gəldi
- Ölkə futbolu2024-05-17 11:12
Vaqner Silva: “Avropada “Qarabağ”dan qorxurlar”
- Ölkə futbolu2024-05-17 13:38
“Avropanı şoka salmalarına dəqiqələr çatmadı”
- Premyer-liqa2024-05-17 23:50
“Əcnəbi hakimlərinin dəvət olunmasını xoş qarşılamadım” – Qurban Qurbanov