Ölkə futbolu
"Bu sözdən "Qarabağ" Ağdamın deyil" mənasını çıxarmağa ehtiyac yoxdu"
Azərbaycan çempionu "Qarabağ"ın Malta "Vallet…
Azərbaycan çempionu "Qarabağ"ın Malta "Valletta"sı ilə cavab qarşılaşmasından sonra Ağdam klubun prezidenti Abdulbari Gözəlin bəzi açıqlamaları futbol ictimaiyyətində geniş müzakirələrə səbəb olub. Futbolinfo.az xəbər verir ki, "Azərsun Holdinq"in rəhbərinin qalmaqallı açıqlaması klubun sadiq azarkeşlərini də ciddi narahat edib. Ancaq sonradan azarkeşlərin klub rəhbərliyi ilə görüşü zamanı məlum olub ki, heç də hər şey göründüyü kimi deyil. Abdulbari bəyin futbol terminlərini bir o qədər də güclü bilməməsi yalnış anlaşılmaya səbəb olub.
Saytımıza açıqlama verən sözügedən komandanın "İmarət" fan-klubunun idarə heyətinin üzvü Qabil Hüseyn məsələnin heç də düşünüldüyü kimi olmadığını təsdiqləyib. O, klub rəhbərliyinin "Qarabağ"ın Ağdama məxsus olduğunu və bu həqiqətləri dəstəklədiklərini bildirib:
"Biz "Qarabağ"ın prezidenti Abdulbari Gözəlin videomüsahibəsinə telefon vasitəsi ilə baxdıq. Fan-klubun mövqeyi belə oldu ki, klub prezidenti Ağdam camaatını, "Qarabağ" azarkeşlərini təhqir edib. Ancaq dəfələrlə həmin müsahibəyə baxdıqdan və klub rəhbərliyi ilə görüşdük. Abdulbari bəyin əvvəlki çıxışlarına da fikir versəz, futbol terminlərini bir o qədər də yaxşı bilmədiyini anlamış olarsız. Onun futbola marağının olmadığını özü də bildirib. Buna görə də fikrini tam çatdıra bilməyib. O, Ağdama gedə biləcəklərini vurğulayıb. Bakıda yaxşı şərait yaradıldığından, Quzanlıya gedib-gəlməyin klubun uğurlarına təsir etdiyini vurğulayıb. Hazırda komanda Avropa səviyyəli futbol nümayiş etdirirsə, sərhəd zonasında eyni güclə oynaya bilməz. Səhv etmirəmsə, Abdulbari bəyin Ağdam camaatının futbolsuz qalmaması üçün orada bir futbol klubu yaratmaq fikiri də var. Klub prezidenti buna dəstək verməyə də hazırdı. Ancaq bundan "Qarabağ" Ağdamın deyil" mənasını çıxarmağa ehtiyac yoxdu. "Qarabağ" Ağdamındı. "Qarabağ" rəhbərliyi də bu həqiqətləri bilir və buna dəstək verir. Emosional azarkeşlər əmin ola bilər ki, bu baxımdan heç bir problem yoxdu. Bundan başqa cür istifadə edib, təxribat yaratmaq lazım deyil. Ağdam Qarabağındı, Qarabağ da Azərbaycanın! Biz komandamıza dəstək olmalıyıq".
"Qarabağ"ın icraçı direktoru Əmrah Çəlikəl də Abdulbari bəyin fikirlərinin yalnış yozulduğu bəyan edib. O, klub prezidenti haqqında səsləndirilən fikirlərin heç bir həqiqəti əks etdirmədiyini vurğulayıb:
"Bu gün qəzetlərdə, saytlarda gördüyümüz xəbərlər bizi çox üzdü. 14, bəlkə də daha artıq ildi ki, Ağdam şəhərinin təmsilçisi olan "Qarabağ"ı təmənnasız saxlayan klub prezidenti haqqında səslənən fikirlərin heç biri həqiqəti əks etdirmir. Abdulbari bəy dünən açıqlamasında Qarabağın Azərbaycanın, Ağdamın da onun bir hissəsi olduğunu bildirib. Bakı, Quba kimi Ağdam da Azərbaycanın bir hissəsidi. Biz Azərbaycan adından çıxış edirik. Klub prezidentinin açıqlamasına hansı niyyətlə qulaq asmaqdan da çox şey asılıdı. "Qarabağ" Ağdamı təmsil edir. Ancaq dünən söhbət beynəlxalq arenadakı çıxışdan gedirdi. Onun fikirləri əsas komandanın oyunlarının Bakıda keçirilməsi ilə bağlı idi. Uzun müddətdi ki, bununla bağlı fikirlər səsləndirilir. Abdulbari Gözəlin açıqlaması bu məsələyə nöqtə qoymaqla bağlı idi. İnşallah, bazamız hazır olanda komandamız ev oyunlarını Suraxanıda, ona qədər isə Tofiq Bəhramov adına Respulika stadionunda keçirəcək. Allahın izni ilə ən tez vaxtda Ağdamımıza qovuşanda oradakı şəraitimizdən, imkanlarımızdan istifadə edəcəyik".