Ölkə futbolu
Bokonyano: "İlk dəfə idi ki, hakimdən belə qərar görürdüm"
Bakı “İnter”inin fransalı müdafiəçisi Yoha…
Bakı “İnter”inin fransalı müdafiəçisi Yohan Bokonyanonun Avropa Liqasının ikinci təsnifat mərhələsindəki “Elfsborq” məğlubiyyətindən (0:1, penaltilər – 3:4) sonra futbolinfo.az saytına müsahibəsi
– 120 dəqiqəlik gərgin mübarizədən sonra meydandan məğlub ayrıldınız…
– Bilmirəm nə baş verdi. Onu deyə bilərəm ki, çox yaxşı oyun göstərdik. Amma 10 nəfərlə 11 nəfərə qarşı oynamaq çox çətindi. Hamımız çox çalışdıq. Penaltilər seriyasında məyus olduq.
– Güclü müdafiə oyunu ilə seçilən “İnter” necə oldu ki, 45+2-ci dəqiqədə qapısından top buraxdı?
– İlk yarının son dəqiqələrində rəqib küncdən zərbəni yerinə yetirərkən bir anlıq fikirimiz yayındı və qapımıza qol vuruldu.
– Yəqin ki, siz də hakimlikdən narazı qaldınız?
– Bəli, elə oldu. Amma artıq o barədə danışmaq çox gecdi. Hər şey olub, bitib. Açığı, başa düşmədim ki, hakim o epizodda niyə qırmızı vərəqə çıxardı. Çünki oyunun start fitindən 2-3 dəqiqə keçmiş qırmızı vərəqə çıxarılmasının ilk dəfəydi ki şahidi olurdum.
– Deyəsən, azlıqda qaldıqdan sonra penaltilər seriyasına daha çox ümid bağladız?
– Başqa nə edə bilərdik ki? Təbii ki, azlıqda qalandan sonra mübarizə aparmaq çox çətindi. Düzdü, müdafiəyə çox fikir verdik, amma çoxlu qol epizodları da yarada bildik. Çox təəssüf ki, həmin epizodlardan yararlana bilmədik.
– Səfərdəki ilk oyunda çoxlu qol epizodları yaratdız və 1 cavabsız qolla meydandan qalib ayrıldız. Bəs evdəki matçın necə keçəcəyinə ümid edirdiz?
– Düşünürdüm ki, cavab matçında çox epizodlar yaradıb, çox qol vuracağıq. Amma alınmadı. Artıq nə etmək olar? Növbəti mövsüm üçün çalışacağıq.
– Stadionunuzda hər vaxt bu qədər çox azarkeş olmur. Dolu tribunalar qarşısında oynamaq sizə necə təsir bağışladı?
– Həqiqətən də azarkeşlər bizə çox dəstək verdi. Hamısına minnətdaram. Çox sağolsunlar ki, bizi tək buraxmadılar. Həmişə arzulayırdım ki, “Şəfa”da dolu tribunalar qarşısında oynayam. Deyə bilərəm ki, bu oyunda istədiyim ab-havanı yaşadım.
ELMAR VƏLİYEV