Ölkə futbolu
Naxçıvan biabırçılığı: debütant çempionatdan imtina edir
Ötən mövsüm səs-küylə Premyer Liqaya vəsiqə q…
Ötən mövsüm səs-küylə Premyer Liqaya vəsiqə qazanan "Araz Naxçıvan"ın elitada uğurlu çıxış edəcəyi inandırıcı görünmür. Uğurlu çıxış bir yana, deyəsən, bu komanda güclülər arasına biabırçılıqların səbəbkarı olmaq üçün gəlib.
Naxçıvan təmsilçisi "siftə"sini kor olmaması üçün nə uğurlu transfer edir, nə də buna cəhd göstərir. Komandanın heyətinə cəlb olunmuş qocaman futbolçular belə debutant klubda qalmır. Yeni müqavilə imzalamış futbolçular Muxtar Respublikaya uyğunlaşmamağı, paytaxt Bakıdan uzaq düşmələrini bəhanə gətirərək "Araz Naxçıvan"dan ayrılır. Fərid Quliyev, Cahangir Həsənzadənin ardınca "Bakı'dan ayrılaraq Naxçıvan klubuna yollanan Elvin Əliyev də komandanın düşərgəsindən qaçıb.
Sözsüz ki, burada bir sıra maraqlı məqamlar var. Azərbaycanda böyüyüb, boya-başa çatmış futbolçular Əsgər Abdullayevin çalışdırdığı klubun Naxçıvanı təmsil etdiyindən xəbərdar idi. Müqavilə imzalayıb, sonradan komandadan qaçlblarsa, deməli, səbəbi başqadı. Daha Həsənzadənin dediyi kimi Bakıdan uzaqda qala bilməmələri yox…
Əldə etdiyimiz məlumata görə, klub öz oyunu ilə yox, hay-küyü, təzyiq vasitələri ilə elitada ağalıq etmək istəyir. Belə ki, komanda startına az qalmış çempionatda əvəzedici heyətsiz çıxış etmək niyyətindədi. Onlar bu fikirdə qalmaqda israrlıdı. Və bunu ölkə futbolunun başbilənlərinə qəbul etdirmək istəyirlər. Sözsüz ki, ölkə futbolunun inkişafını nəzərə alaraq, AFFA və PFL-in bu inad qarşısında güc göstərəcəyi şübhəsizdi. Çünki əvəzedicilər arasında çempionat futbolun inkişafına hesablanan əsas layihələrdən biridi, burada əsas komandada heyətə düşə bilməyən neçə-neçə gənc yetişir, forma yığır.
Görünür, ümumi xərci bir o qədər də ciddi məbləğ tələb etməyən əvəzedici komandanı yaratmaq "Araz Naxçıvan" üçün böyük problemdi. Belə olmasaydı, bu problemi çoxdan aradan qaldırardılar. Sözsüz ki, uzun illərdən sonra hər hansı bir klubun aşağı diviziondan elitaya yüksəlməsi müsbət haldı. Görünür, buna qədər ölkə futbolunun baş bilənləri elə bu problemə görə hər hansı bir komandanın Premyer Liqaya yüksəlməsi məqsədəuyğun hesab etmirdi. “Araz Naxçıvan”ın da maliyyə durumu digər divizion klubları kimi bərbaddı, bu üzdən də onlar əvəzedicilərin yarışını mənasız sayaraq çempionatda bunsuz keçinmək istəyirlər. Buna görə də mövsümün startına 10 gün qalsa da, nə komanda, nə də baş məşqçi var.
Danışanda hər kəs futbolun inkişafı üçün çalışdıqlarını bildirir. Görəsən, debüt ilində əvəzedici komandasız çıxış etmək istəyən Naxçıvan klubu bu biabırçılığa hansı donu geyindirəcək? Ölkə futbolunun inkişafı üçün gənc oyunçulara ehtiyac olması birmənalıdı. Komanda əgər gənclərə ehtiyac duymursa, əvəzedici komandası olmasını istəmirsə, deməli, burada başqa maraq var. Klub elitada ya bir ili birtəhər yola vermək istəyir, ya da komandanın Premyer Liqaya vəsiqə qazanacağı son anda qərarlaşdırılıb. Ancaq hazırkı durumda birinci variant daha inandırıcı görsənir. Digər 9 klubun rəhbərliyi və futbolçuları indidən sambo, boks, güləş fəndlərini öyrənsə, daha yaxşı olar. Çünki belə təfəkkürlü klub rəhbərliyinin ən azı ev oyunlarında hər vasitəyə əl atacağı şübhəsizdi.
EMİN SƏFƏROV