Ölkə futbolu
Ay-hay…
“Bakcell Arena”da həyəcandan və əsəbdən özü…
“Bakcell Arena”da həyəcandan və əsəbdən özümə yer tapa bilmədiyim vaxtda mətbuat lojasında gəzişən, özünü ciddi işlə məşğul olurmuş kimi göstərən polis zabiti üzünü mənə tutub “aşağı otur” dedi. Cavabında “babasilim var, otura bilmirəm” eşidincə üz-gözünü turşutdu.
Əlbəttə, ona verdiyim cavab həqiqəti əks etdirmirdi, amma beləsiylə çənə-boğaz olmaq da əlavə enerji itkisidi.
Futbol da bir mədəniyyətdi, dostlar. Bir ölkənin futbolunun inkişafı üçün isə təkcə bahalı legionerləri gətirib oynatmaq yetərli deyil. Həmin ölkənin futbolçusu da, klub prezidenti də, məşqçisi də, azarkeşi də, elə polisi də mədəni olmalı, inkişaf etməlidi. Bəs, bizdə nə baş verir?
Qarşılaşma bitən kimi mətbuat konfransına yollandım. Böyükağa Hacıyev ağzını açan kimi rəqibə açıq futbol təklif etdiklərindən danışdı. Təəccübləndim. Görəsən, çox hörmətli Hacıyev “açıq futbol” deyəndə nəyi nəzərdə tutur? Klub prezidentinin ürəyi açıq, səxavətli adam olmasını, yoxsa “Neftçi”nin legionerlərinin ruhsuz və istəksiz oyununu görəndən sonra bizim ağzımızın açıq qalmasını?
Adam meydana cəmisi bir hücumçu buraxıb, onun da varlığıyla-yoxluğu bəlli deyil. Bəlkə siz deyəsiz, Nfor meydanda olduğu müddət ərzində Maksim Kvilitayanın qoruduğu qapıya doğru düz-əməlli bir zərbə vura bildi? Arxasını güclə sürüyən Vobay idimi açıq futbol oynayan? “Neftçi”nin 10 nömrəsi cərimə meydançasına daxil olan kimi qorxaq uşaqlar sayağı özünü itirir, ya topu hara gəldi vurur, ya da üzünü döndərib geri qayıdırdı. Bütün bunlar açıq futbolun gizli elementləridi, yoxsa?
Bəlkə, cənab Hacıyev Kauenin birinci hissədə rəqibin qapısı qarşısında əlverişli mövqedən topu göyə uçurmasını, Flavinionun 1-2 metrdən “çərçivə”ni nişan ala bilməməsini nəzərdə tutub? O qədər ehtimallar var ki.
Çoxdandı belə ruhsuz və qürursuz “Neftçi” izləməmişdik. Yadınızdadısa, ötən il “Şkenderbeu” ilə oyundan sonra Böyükağa bəy eyni özündən razılıqla mətbuat konfransında rəqibin qapanmasından, “Neftçi”nin açıq futbol təklifindən danışmışdı. İnsan yaşa dolduqca müdrükləşər, başına gələnlərdən başmaqçı olar. Məgər, “Bursaspor”un başına oyun açan “Çixura”nın Bakıda belə oynayacağını bilmirdiz? Bunun adına taktika deyirlər, a bəy. Səfərdə ehtiyatlı oynamaq, minimum vəzifə kimi qapını toxunulmaz saxlamaq nəvaxtdan qorxaqlıq sayılır? Binəva Pruidze eşidib ki, “Neftçi”nin heyətində yarımmilyonluq braziliyalılar oynayır, ona görə də ehtiyatı əldən verməyib.
11 gürcü futbolçunun qarşısına bu xalqın komandasını 8 ruhsuz legionerlə çıxardığımıza və qələbə qazana bilmədiyimizə görə hamımız utanmalıyıq. Legionerlə avrokubok oyununa çıxmaq qəbahət deyil. Amma ortada “Qarabağ” nümunəsi var axı. Əcnəbiyə pul verəndə də baxın, görün pulu kimə verirsiz. Reynaldoyla Nforu, Kaueylə Aqolini, Vobayla Almeydanı müqayisə etmək mümkündümü? Bu vecsizlərin hələ də “Neftçi”də əzizlənməsi kimlərinsə şəxsi mənafelərini güdməsindən xəbər verir.
Dünənki biabırçılığa görə mən şəxsən öz adıma xəcalət çəkdim. İnanıram ki, hörmətli oxucularımın arasında da əsəbindən gecəni yata bilməyənlərin sayı kifayət qədər çoxdu. Bəs, onlar neylədi? Sadıq Sadıqov oyundan sonra çox şən görünürdü. Bizə də “narahat olmayın” dedi. Böyükağa Hacıyevin də kefi pozulmamışdı, qələm əhlinə taktika dərsi keçirdi. Eynilə “Şkenderbeu” ilə oyundan sonra olduğu kimi rəqibin öz meydanında guya açılacağını, “Neftçi”nin də rahatlıqla Kvilitayanı məyus edib, mərhələ adlayacağını düşünürlər. Yazmağa söz də qalmayıb, eləcə əlini yelləyib “ay-hay…” demək istəyirsən…
- Ölkə futbolu2024-04-16 13:19
AFFA-da fırtınaqabağı sakitlik: maliyyə yoxlaması davam edir
- Ölkə futbolu2024-04-15 08:00
Hakim kömək etmədi, “Səbail” yenə qələbəsiz qaldı
- Ölkə futbolu2024-04-15 10:17
“Qarabağ” üçün daha iki potensial rəqib
- Ölkə futbolu2024-04-15 10:03
Musanın oynamamasının səbəbi – baş məşqçi açıqladı