Ölkə futbolu
Dilim-dilim olasan, dilim
Yəqin ki, bundan sonra hər hansı bir yazıçı, şair həddin…
Yəqin ki, bundan sonra hər hansı bir yazıçı, şair həddindən artıq düşünsə, "Araz Naxçıvan" kimi satirik əsər yarada bilməz. Yadınızdadırsa, ötən günlərdə Premyer Liqanın debütantı hay-şüvən qoparıb, PFL-ə hücum çəkmişdi. Guya ki, Topaz Premyer Liqasının 4-cü turunda baş tutan "Sumqayıt" – "Araz Naxçıvan" matçında qonaqları hakim uduzdurub. Halbuki, oyunun təkrarına dəfələrlə baxdıqda hakimin matçın nəticəsinə cidd təsir edəcək hər hansı bir səhvinin olmadığını görürdük.
Debütant "facebook" sosial şəbəkə vasitəsi ilə çempionatdan çəkilməklə bağlı bəyanat yaymışdı. Təbii ki, naxçıvanlıların sözügedən bəyanatını PFL "like" etmədi. Bunu bir növ hədə-qorxu adlandırmaq da olardı. Sanki birinci divizionda olan şouların ardı elitada davam edəcəkmiş. Hətta iş o yerə çatmışdı ki, klub prezidenti Orxan Cabbarov da komandanın baş məşqçisi əsgər Abdullayevlə birgə PFL-prezidenti Ramin Musayevin qəbuluna qədər gedib çıxmışdı. Görüş zamanı Hakimlər Komitəsin sədri Xaqani Məmmədovla Musayev qonaqları necə şirin dilə tutmuşdularsa, Cabbarovla Abdullayev Bakıya qədər gəldiklərinə peşman olmuşdu.
Bizdə olan məlumata görə, görüşün sonunda Xaqani müəllim "Araz Naxçıvan" rəhbərliyinə futbol oyununun qaydaları haqda kitab da bağışlayıb ki, boş vaxtı olanda oxusunlar. İndi həmin görüşdən sonra Naxçıvan təmsilçisi tamam fərqli düşünür. Deyirlər ki, biz elə bir bəyanat verməmişik.
Ay qardaş, bəs, kim verib? Şahqulunun bacısı oğlu Məmmədhəsən kişinin nəvəsi Orucəli? İndi klub saytı vasitəsi ilə yaydıqları bəyanatda bildirirlər ki, qeyd olunan məlumatlarla klubumuzun heç bir əlaqəsi yoxdur və klub buna görə məsuliyyət daşımır.
Ümumiyyətlə, "Araz Naxçıvan"ın Premyer Liqaya gəlməsinə görə kimin məsuliyyət daşıdığı da bilinmir. Yaxşı ki, klubun rəsmi saytında "Müvəqqəti narahatlığa görə üzr istəyirik" yazmayıblar.
İş burasındadı ki, yeni bəyanatla klub rəhbərliyi öz mətbuat xidmətini pis duruma düşürdü. Sözsüz ki, mətbuat xidmətinin rəhbərinin klubun başbilənlərindən icazəsiz addım atıb, əvvəlki bəyanatı yazacağı heç inandırıcı görünmür. Əgər Naxçıvan təmsilçisi mövcud durumla razılşamasaydı, Ramin Musayevin qəbuluna qədər getməzdilər. Sadəcə, onlara həm qulaqburması verilib, həm də elə ictimai qınaqla üzləşiblər ki, indi “dilim-dilim olasan dilim” deyirlər.