Digər
158 gün iş başında olmayan “Fernan Magellan” və Elxan Məmmədov
Bu adamların ağlı qaçıb. Yoxsa hansısa səyyahın dünya turuyla bağlı xəbər niyə AFFA-nın rəsmi saytının manşetini bəzəsin ki?
Deyəsən, AFFA-nın icraçı vitse-prezidenti Elxan Məmmədov təlaşa düşüb. “Qarabağ”ın baş məşqçisi Qurban Qurbanovun danışmağa başlaması, özünə qarşı haqsızlıqları qavaş-yavaş dilə gətirməsi; gənclər və idman naziri Fərid Qayıbovun futbola daha çox nüfuz etməkdə olması, futbol azarkeşləri ilə fəal görüşlərə start verməsi onu qarınağrısına salıb. Elə olmasaydı, tələsik kiminlə gəldi fotosessiya edib gündəmə düşmək istəməzdi.
Xəbərin mətni belədi:
“Azərbaycan Çimərlik Futbolu Federasiyasının prezidenti, səyyah Fərid Novruzi dünya səyahətini 158 günə tamamlayıb. Səyahət çərçivəsində o, dünyanın 6 qitəsinə (Asiya, Avropa, Afrika, Şimali və Cənubi Amerika və Avstraliya) səfər etmiş, heç bir hava nəqliyyatından istifadə etmədən 60.000 km məsafə qət etmiş, ekvatoru şimaldan cənuba və cənubdan şimala olmaqla iki dəfə keçmiş, dünyanın iki antoqonist nöqtəsində olmuşdur. Bütün bunları 158 günə tamamlamış Fərid Novruzi daim doğma Azərbaycan bayrağını səyahət etdiyi əksər ölkələrin ən görməli, əhəmiyyətli yerlərində dalğalandırıb.
AFFA-nın icraçı vitse-prezidenti Elxan Məmmədov bu münasibətlə Fərid Novruzi ilə görüşüb, səyahətini müvəffəqiyyətlə başa vurması münasibəti ilə onu təbrik edib”.
Fərid Novruzini hansısa formada futbola calaq ediblər. Deyilənə görə yaxşı oğlandı, onunla işimiz yox, lakin bu adamın dünya səyahətinin futbola nə dəxli? Hətta özünün futbola nə dəxli? Elxan Məmmədovun dostu olmaq vəzifə sahibi olmaq üçün kifayət etməlidimi? Məmmədov ondan 158 gün işinin başında olmamasının hesabatını istəmək əvəzinə qızarmadan fotosessiya da edir.
Futbol bax, belə düşüncədə olan insanların idarəçiliyindədi. Sahə federasiyaları təsadüfi adamlarla, Məmmədovun dostlarıyla doludu. Hələ araşdırsalar, Fərid bəyin turnesinə çəkilən xərclərin müəyyən hissəsinin AFFA-dan/SOCAR-dan getdiyi məlum olar. AFFA-da önəmli post tutan “Fernan Magellan”ın belə reklamı bəlkə də Hesabat Konfransında verəcəyi səs üçün lazımdı?!
Yeri gəlmişkən, Magellan dünyanın kürə formasında olduğunu sübut etmişdi. Yəqin Novruzi də bu səyahətdən sonra Məmmədovu Yerin futbol topu kimi bir şey olduğuna əmin edib. Yaxşı kəşfdi…
CAVAD
P.S.: Xatırladaq ki, Novruzinin AFFA-dakı işini unudub dünya səyahətində olduğu günərdə milli komandamız son 2 matçında Belarusa 1:4, Portuqliyaya 0:6 hesabıyla uduzub.