Ölkə futbolu
“Bakı”da rəhbər kimdi?
"Bakı"nın maliyyə problemlərindən çətinlik &cce…
"Bakı"nın maliyyə problemlərindən çətinlik çəkdiyi hər kəsə bəllidi. Futbolinfo.az xəbər verir ki, komandanın bu durumda olması bir sıra söz-söhbətlərin yaranmasına da səbəb olub.
Belə ki, ölkənin idman mətbuatında AFFA-nın "Bakı"nın bu vəziyyətdindən istifadə edərək, paytaxt klubunu daha da pis duruma salmaq istəyi ilə yanaşı, komandaya assosasiya tərəfindən zərbə endirilməsinə dair bir sıra iddialar baş qaldırıb. Saytımıza açıqlama verən "zolaqlılar"ın vitse-prezidenti Yaşar Seyidov bu məsələni yalnış olduğunu, əksinə, AFFA rəhbərliyin "Bakı"ya çətin durumda dəstək olduğunu bildirib:
"Bir sıra mətbuat orqanları var ki, "Bakı"nın dağılması üçün əlindən gələni edir. Bir sıra jurnalistlər klubun pis duruma düşməsi üçün kifayət qədər iş görür. Mən "Bakı" rəsmisi kimi rəsmi bəyan edirəm ki, klubda olan hadisələrin AFFA tərəfindən idarə olunması haqda deyilənlər tamamilə yalnışdı. Bəziləri ən çətin gündə "Bakı"ya dəstək olan AFFA rəhbərliyi ilə klub rəhbərliyinin arasını vurmağa çalışırlar. Ancaq həmin şəxslər istəyinə nail ola bilməyəcəklər. Komanda ilə oteldə iclas keçirildi, futbolçular məşqə qatıldı. Komanda oyuna hazırlaşır və "Sumqayıt"la matça çıxacaqlar”.
Əslində, “Bakı”dakı durumla bağlı digər klub rəsmilərinin də fikrini öyrənmək maraqlı olardı. Hafiz Məmmədov əlçatmazdı, yalnız özü istəyəndə, lazım bildiyi adamlara müsahibə verir. Təbii ki, fərqli suallar eşidəcəyi və çətin vəziyyətdə qalacağı üçün o, məsələn, futbolinfo.az saytına müsahibəyə razılaşmaz. Belədə klubda başqa idarəçi qalmadığından biz də Seyidovla danışmaöa məcburuq. Hə, bir də son günlər klub prezidentinin qardaşı, “Bakı”nın sabiq baş meneceri, klubun müflis olmasının əsas günahkarı Zeynal Məmmədov var. Vaxtilə müsahibə vermədiyi, özünü reklam etmədiyi gün olmayan bu şəxs “Bakı”da işlər pisləşəndən bəri qeybə çəkilib. Son günlər isə bəzi dairələrdə onun özünün klubda söz sahibi kimi təqdim etməsi diqqət çəkir. Düzdü, o, harasa müsahibə verməyib, ancaq haqqında yazılanlardan belə başa düşmək olur ki, Zeynal bəy də “kursdadı”. Bu məsələni də Yaşar bəylə dəqiqləşdirmək istədik:
“Mən bu barədə heç nə deyə bilmərəm. Amma “Bakı"nın dağılması üçün çalışan şəxslərə bəyan edirəm ki, özlərini yığışdırsınlar. Futbolçularla, komanda ilə bağlı bütün qərarlar klub prezidenti Hafiz Məmmədov və mənim onunla məsləhətıəşmələrimdən sonra həyata keçirilir. Mənim klubda rəhbərim birbaşa Hafiz Məmmədovdu. Klub prezidentindən başqa mənim heç bir rəhbərim yoxdu. Ondan başqa klubda tabe olacağım bir şəxs yoxdu. Olsaydı, "Bakı"da bir gün də işləmərəm. Mən qəbul edə bilmərəm ki, klubda Hafiz məmmədovdan başqa mənə kimsə rəhbərlik etsin. Bu, mümkün deyil. Bir daha klubun vitse-prezidenti kimi bildirirəm ki, ən çətin günümüzdə bizim bu vəziyyətdən çıxmağımız üçün "Bakı"ya AFFA-nın prezidenti Rövnəq Abdullayev, assosasiya nın baş katibi Elxan Məmmədov böyük dəstək verib. Bu işlərdə PFL prezidenti Ramin Musayevi də qeyd etməliyəm. Mənim üçün kiminsə nəsə deməsi önəmli deyil. Mən onlardan nə qorxuram, nə də çəkinirəm. Onlar sadəcə, "Bakı"da olan sabitliyi pozmaq istəyirlər. Mən də onları xəbərdar edirəm ki, siz heç nəyə nail ola bilməyəcəksiniz. Qapıçı Aqil Məmmədova gəldikdə isə, onun klub üçün xidmətlərini dana bilmərəm. O, çox ağıllı oğlandı. Sadəcə, komandanın çətinlikləri ilə bağlı narahatlıq hiss edib. Hazırda rəhbərliklə futbolçular arasında çox yüksək münasibət var. Artıq bizim üçün pul ikinci dərəcəli məsələdi. Ona görə də heç kim bu sabitliyi poza bilməyəcək".
Seyidov sualımızdan dolayı yolla yayınmağa çalışsa da, əslində, bəllidi ki, komandada problem heç də təkcə maddi məsələlərlə bağlı deyil. Hafiz Məmmədovun çempionatın startı ərəfəsində üzə çüxüb qeyb olmasından sonra klub yenə Yaşar bəyin ümidinə qalıb. O, müflis olmuş Hafiz bəyin əvəzində komandanın maddi problemlərini həll etməklə yanaşı həm də yalnız yemək ustası olan “daxili düşmənlər”lə mübarizə aparır. Bu vəziyyətdə ayaq üstə durmaq isə çox çətin olacaq.
AĞA
P.S.: Biz Zeynal Məmmədova da tribuna verməyə hazırıq. Danışmağa sözü varsa, məmnuniyyətlə onu dinlər və fikirlərini ictimaiyyətə çatdırarıq.