Premyer-liqa
“Araz Naxçıvan”ın Elhad nəziri
“Araz Naxçıvan” – Azərbaycan futbolunun şoumeni….
“Araz Naxçıvan” – Azərbaycan futbolunun şoumeni. “Araz Naxçıvan” – hər kəsin gülüş obyekti. “Araz Naxçıvan” – həm gülür, həm də güldürür. Bu, komediyanı izləmək üçün, tamaşaya bilet də tələb olunmur. Yetər ki, bu komandanın daimi izləyicisi olun. Onlar mütləq sizi güldürəcək.
Debütantın bundan əvvəlki çoxseriyalı komediyalarını bir daha təkrar etmək niyyətində deyilik. Bundan əvvəl bir neçə bəyanatla gündəmə gələn Əsgər Abdullayevin komandası ötən həftə də ənənəsinə sadiq qaldı. Naxçıvanlıların “super star” deyə komandanın heyətə cəlb etdiyi Elhad Nəzirinin “Araz Naxçıvan”da heç 40-ı da çıxmadı. Klubla müqavilə imzalayıb, bir həftə sonra oradan qaçanlar sırasına Nəziri də qoşuldu. Digərlərindən fərqli olaraq, Elhadın gedişi elə sürətli oldu ki, “Araz Naxçıvan”, daha doğrusu onun çalışdırıcısı Əsgər Abdullayev radara düşdü. O, məşqçisini oyun satanları meydana buraxmaqda ittiham etdi. Hələlik isə cərimənin kim tərəfindən ödəniləcəyi bəlli deyil.
Nəzirinin bu açıqlaması istər-istəməz ölkənin idman mətbuatında gündəmi zəbt etdi. Amma klubun da mövqeyi gecikmədi. Debütantın rəsmi saytı vasitəsi ilə 9 futbolçusu, bir qədər ağsaqqal hesab olunacaq futbolçuları – Kamal Bayramov, Ramal Hüseynov, Eşqin Quliyev, Bəxtiyar Soltanov, Saşa Yunisoğlu, Aqil Nəbiyev, Tərlan Xəlilov, Emin Cəfərquliyev, Qərib İbrahimov sərt ittihamlarla çıxış edən Elhad Nəzirini cavab atəşi ilə susdurublar. Bildiriblər ki, Elhad oyun satdıqlarını sübut etsin. Əks halda onlara şər atdığına görə aidiyyatı qrumlara müraciət edəcəklər.
Sərt ittihamların ünvanlandığı Əsgər Abdullayev də susmadı. O, saytımıza müsahibəsində məsələ ilə bağlı bunları dedi: "Allah Elhadın canını sağ etsin. Bu barədə danışmaq istəmirəm. Nə lazımdısa, özünə deyilib. Mən elə şeylərdən nifrət edirəm. Həyatım boyu oyun alqı-satqısında iştirak etməmişəm.Hər halda bu onun şəxsi fikridi. Mən sadəcə, oyunçunun bu günkü durumunu nəzərə alıb, meydana buraxıram. Bu barədə məni heç kim ittiham edə bilməz. Futbolçu öz üzərində çalışmalıdı. Komandaya dəvət olunan futbolçu öz üzərində çalışmalıdı. Dəvət olunan futbolçunun yerinə məşqçi oynayası deyil. Hərə günahı özündə axtarmalıdı. Bunlar hamısı yersiz söhbətlərdi. O, səhv edib. Onun yerinə meydana çıxıb mən oynayası deyildim. Onun əlində oyun satqısı ilə bağlı dəlil varmı?”
Maraqlıdı ki, klubun rəsmi saytında yayılan bəyanatda cəmi 9 futbolçu çıxış edib. İş burasındadı ki, həmin 9 futbolçunun hamısı da, Abdullayev tərəfindən komandaya cəlb olunub. Görünür, həmin 9 futbolçu Əsgər bəyə bu bəyanatla onları komandaya gətirdiyi üçün “xəcalətindən” çıxıblar. Digər 16 futbolçunun bu bəyanatda imzasının olmaması isə maraq doğurur. Abdullayev bu məsələyə də aydınlıq gətirdi: "Bu, onların şəxsi işidi. Mən heç vaxt futbolçuları üz-üzə qoymamışam. Ola bilsin ki, onlar nisbətən yaşlı olduqları üçün cavab veriblər. Digər məsələyə gəldikdə isə komandada olan futbolçuların hamısını mən dəvət etmişəm. Mənim fikrimi nəzərə alınıb, komandaya cəlb olunub".
Geridə qalan 5 tur göstərdi ki, “Araz Naxçıvan”da müəyyən qədər boşluqlar var. Komanda hələ də peşakarlaşmayıb. Heç bir peşəkar klubda futbolçu, yaxud da məşqçi komandadan ayrılandan sonra keçmiş həmkarlarını nədəsə ittiham etmir. Ümumiyyətlə, yeni mövsümdə tam hazır olmayan Naxçıvan təmsilçisi çox həyəcanlı görünür. Onların bu həyəcandan verdikləri qərarlar da hər dəfəsində naxçıvanlılara baha başa gəlir. Başa gələn isə çəkilər. Nə etməli? Yaşadıqca, yıxıldıqca, vurulduqxa öyrənirsən. Hələ nə yaşınız var ki?
Klub hər halda belə durumla bir daha qarşılaşmamaq üçün işini öncədən planlamalıdı. İş burasındadı ki, peşəkar komandalar futbolçunu transfer edəndə onun üstünlüklərini nəzərdən keçirəndə, insanı keyfiyyətlərinə də diqqət yetirilər. Bəlkə də “Araz Naxçıvan” Elhad Nəzirini komandadan uzaqlaşdırdıqdan sonra gedib, nəzir də verib. Bunlar nə qədər gülməli olsa da, debütantın tragikomediyasıdı.
EMİN SƏFƏROV
- Premyer-liqa2024-05-17 22:21
“Qarabağ” “Turan Tovuz”a qalib gəldi
- Ölkə futbolu2024-05-17 11:12
Vaqner Silva: “Avropada “Qarabağ”dan qorxurlar”
- Ölkə futbolu2024-05-17 13:38
“Avropanı şoka salmalarına dəqiqələr çatmadı”
- Premyer-liqa2024-05-17 23:50
“Əcnəbi hakimlərinin dəvət olunmasını xoş qarşılamadım” – Qurban Qurbanov