Ölkə futbolu
“Mil-Muğan” qalmaqalı: Hakimlər də günahsız deyil
Bu gün AFFA İntizam Komitəsinin keçirilən növbəti…
Bu gün AFFA İntizam Komitəsinin keçirilən növbəti iclasında Azərbaycan çempionatının 1-ci divizionun son turunun “Mil-Muğan” – “Turan-T” matçında ev sahibinin etdiyi saxtakarlığa da baxılıb. Futbolinfo.az xəbər verir ki, İK “Mil-Muğan” komandasının futbolçusu Fərid İbrahimlinin əvəzinə klubun digər futbolçusu Orxan Məhərrəmovun oyunda iştirak etməsini ev sahibinə texniki məğlubiyyət verməklə qiymətləndirib.
Maraq üçün bildirək ki, məlum məsələnin üstü “Turan-T”nin rəsmisi Namiq Məstanovun ayıqlığı nəticəsində açılıb. Belə ki, stadionun diktoru oyun zamanı Orxan Məhərrəmliyə qırmızı vərəqə göstərdildiyi elan edib. Məstanov da protokolda belə bir futbolçunun adının olmadığını görəndə hakimlər briqadasına müraciət edib. Namiq bəy onlardan həmin futbolçunun lisenziyasını gətirməsini xahiş edib. Nəticədə məlum olub ki, lisenziyada olan möhürlə şəkilin üzərindəki möhür üst-üstə düşmür. Amma bunu daha öncə oyuna təyin olunmuş hakimlər briqadası bilməli idi. Çünki oyun başlamamışdan öncə hakimlər briqadası matçın protokoluna daxil edilmiş futbolçuların sənədlərini mütləq yoxlamalıdı. Onlar komandaların rəhbərləri ilə birgə futbolçuların matça buraxılış qaydalarının gözlənilməsi üçün məsuliyyət daşıyır.
Bu isə o deməkdir ki, İntizam Komitəsi “Mil-Mugan” – “Turan-T” oyunun baş hakimi Orxan Məmmədov, eləcə də saxtakarlığa yol verən komandanın rəhbəri də cəzalandırmalıdır. Ancaq gördüyünüz kimi, qərarda belə bir şey yoxdu.
Məsələni dəqiqləşdirmək məqsədi ilə Hakimlər Komitəsinin sədri Xaqani Məmmədovla əlaqə yaratmaq istədik. Amma çoxsaylı zənglərimizə cavab verməyən Məmmədovun bir növ məsələdən yayınmaq istəyini başa düşmək heç də çətin məsələ deyil. Biz də Xaqani bəydən əlimizi üzüb, Hakim İnspektorlar Komitəsinin sədri Gülağa Cabbarovla əlaqə saxladıq. Cabbarov da əməkdaşımızla söhbətində hakimin bu məsələdə məsuliyyət daşıdığını gizlətmədi: “Qarşı komanda kimdənsə şübhələndiyini xəbərdarlıq etməlidi. Sənədə də 4-cü hakim baxır. O, protokolu dolduranda sənədləri yoxlayır. Sənəd də hakimlərin nəzarəti ilə, onların otağında qalır. Hakim-inspektorun sənədlərlə heç bir əlaqəsi yoxdu. Onun vəzifəsi hakimlərin gördüyü işi qiymətləndirməkdi. Hansı sənəd sonradan düzəldilibsə, qarşı tərəf şikayət edəndə yoxlanılır. Qayda belədir ki, protokol doldurulanda 4-cü hakim bütün sənədləri yoxlamalıdı. Başqa cür də ola bilməz. Bütün dünya futbolunda belədi. Bir-bir sənədlər yoxlanılır. Ancaq sənəd sonradan düzəldilibsə, yoxlayan onu necə görə bilər? Kimsə tanıyırsa, şübhəsi varsa, onda üzə çıxır. Əks halda bunu üzə çıxarmaq mümkün deyil. Siz öz sənədinizi düzəltmisizsə, gərək sizi kimsə tanısın ki, bu saxtakarlığı üzə çıxarsın. Mən sizi tanımıramsa, bunu necə üzə çıxara bilərəm?. Belə çıxır ki, bunu ifşa edən şəxs həmin adamı tanıyır. Başqa cür ola bilməz”.
İstənilən halda məsələdə hakimlərin də günahı var. Ümid edirik ki, AFFA Hakimlər Komitəsinin sədri Xaqani Məmmədov da bununla bağlı fikirlərini bildirəcək, ən azı kadrları barədə ölçü götürəcək. Çünki bu boyda biabırçılığı təkcə “Mil-Muğan”ın baş məşqçisini cəzalandırmaqla unutdurmaq olmaz.
EMİN SƏFƏROV