Ölkə futbolu
“Neftçi”nin yolunu açan pullar
“Neftçi” ötən mövsüm çətinl…
“Neftçi” ötən mövsüm çətinliklə də olsa, ölkə kubokunu qazana bildi. Həmin dövrdə inamlı təsir bağışlamayan Böyükağa Hacıyevin yetirmələri finala adlamaq üçün öncə yarımfinalda var gücünü kuboka yönəldən “Rəvan” səddini aşmalı idi.
Klub prezidenti Sadıq Sadıqov üçün ölkə kubokunu qazanmaq həm də onun son şansı idi. Belə ki, Sadıqovun rəhbərlik etdiyi “Neftçi” mövsümü uğursuz başa vuracağı təqdirdə o, əyləşdiyi kreslo ilə vidalaşmalı idi. “Bakcell Arena”da keçirilən yarımfinalın ilk qarşılaşmasında “ağ-qaralar” Bayıl təmsilçini məğlub edə bilmədi. Həmin vaxtda komandaya başçılıq edən Güvənc Kurtarın yetirmələri son saniyələrdə hesabı 1:1 edərək, cavab qarşılaşması üçün böyük üstünlük əldə etdi.
Belə ki, “Bayıl Arena” stadionunda keçirilən qarşılaşmada həm qolsuz heç-heçə, həm də istənilən hesablı qələbə “Rəvan”ı finala daşıyacaqdı. Qələbə inandırıcı görünməsə də, ötən mövsüm müdafiə futbolu ilə seçilən komandanın “Neftçi” ilə görüşdə heç-heçə etməsi heç də çətin görünmürdü. Amma cavab qarşılaşmasında tamam başqa bir futbolun şahidi olduq. “Neftçi” rəqibi açıq-aşkar üstələdi. Amma necə…
Bundan əvvəl inamlı oyunu ilə seçilən və Premyer Liqa oyununda “Qəbələ” ilə matçda iki penaltini dəf edən Lukaş Sapela qarşılaşmada iki kobud səhvə yol verərək, topun qapıdan keçməsinə imkan yaratdı. Həmin oyunun təkrarına baxarkən də bunun şahidi ola bilərsiniz. Məlumat üçün bildirək ki, polşalı əlcək sahibi “Rəvan”dan ayrıldıqdan sonra, daha bir Azərbaycan klubunda çıxış etmək imkanı qazanıb. Amma məşqçilər korpusu müəyyən araşdırmalardan sonra Lukaşın oyun alqı-satqısına marağını olduğunu öyrəndikdən sonra, bu fikirdən yayınıblar.
Həmin oyunda daha bir şübhəli məqam nigeriaylı Oke Akpoveta ilə bağlıdı. Belə ki, ölkə kubokunun yarımfinal mərhələsinin cavab qarşılaşmasında meydanda sanki belə bir futbolçu yox idi. 24 apreldə baş tutan qarşılaşmada komandanın əsas silahlarından olan Akpoveta meydanda yarımfinal matçına çıxmış kimi yox, sanki bulvarda gəzirmiş kimi görsəndi. Ümumiyyətlə, çox təhlükəli oyunçu kimi tanınan Oke həmin qarşılaşmada yersiz top itkilərinə, açıq-aşkar mövqe səhvlərinə yol verirdi ki, komandanın hücum planlarını pozsun. İş burasındadı ki, şübhələlərin onun üzərinə cəmlənməsi əbəs yerə deyil. Belə ki, bir müddət öncə “Rəvan”ı çalışdırmış Güvənc Kurtar Azərbaycan mətbuatına müsahibəsində “Neftçi” tərəfindən bir neçə futbolçularının alındığını bildirmişdi. Elə bunun nəticəsi idi ki, həmin matçdan sonra Akpoveta ümumiyyətlə, komandadan qovuldu, ölüm-qalım məsələsinə çevrilən çempionat oyunlarında bir daha “Rəvan” forması geymədi.
Sizə təqdim etdiyimiz şəkil isə Okenin “Rəvan”da çıxış etdiyi vaxtlara təsadüf edir. O, fotoda 35 min dolları nümayiş etdirir. İş burasındadı ki, futbolçu “Rəvan”da çıxış etdiyi zaman bu məbləğdə pulu heç vaxt bir arada görməyib. O, komandaya gələrkən 10 min dollar alıb, aylıq qazancı isə 7500 olub. Okenin Bakı klubunda 3 ay duruş gətirdiyini, hətta son ayın maaşını xeyli gec aldığını, üstəlik də maaşını alan kimi hər dəfə vətəninə, ailəsinə göndərdiyini nəzərə alsaq, 35 min dolların necə bir arada olduğu maraq doğurur. Maraq doğuran məqam isə şəkilin ölkə kubokunun yarımfinal mərhələsində “Neftçi” ilə keçirilən oyun ərəfəsində çəkilib sosial şəbəkəyə yerləşdirilməsidi.
Bu foto “Neftçi”nin Okeni ələ alması faktı kimi qəbul edilməyə bilər. Amma şəkilin sözügedən oyun ərəfəsində çəkilməsi və nigeriyalının həmin matçda zəif oynayıb sonra da “Rəvan”dan qovulması çox mətləblərdən xəbər verir. Deyəsən, “Neftçi”nin prezidenti Sadıq Sadıqovun vaxtında qazanılan bütün titullar kimi sonuncu kubokun “təmizliyi” də sual altına düşür axı…
EMİN SƏFƏROV
P.S.: Məsələ ilə bağlı bütün tərəflərə tribuna verməyə hazırıq.