Müsahibə
Ruslan Əmircanov: "Milli İtaliya və Xorvatiyaya turist kimi getmir"
Futbol üzrə Azərbaycan millisinin və "Qəbələ" klu…
Futbol üzrə Azərbaycan millisinin və "Qəbələ" klubunun müdafiəçisi Ruslan Əmircanovun futbolinfo.az saytına müsahibəsi
– Zədə səbəbindən Azərbaycan millisinin İtaliya və Xorvatiya ilə oyunlarında iştirak edə bilməyəcəksiz. Hazırda vəziyyət necədi? Müalicəniz davam edir?
– Sol ayağımdan zədələnmişəm. İndi Bakıdayam və 3 gündü ki, müalicə alıram. Həkim deyir ki, bundan sonra da 1 həftə müalicə olunacaqsan. Ondan sonra yavaş-yavaş məşqlərə başlaya bilərəm. Gərək müalicəni sona qədər davam etdirəm ki, zədəm bir də təkrarlanmasın. Məndəki birinci dərəcəli menisk zədəsidi. Ona görə də əməliyyata ehtiyac yoxdu, müalicə ilə sağaltmaq olur
– Millimizin İtaliya və Xorvatiya matçları üçün toplanışında az da olsa iştirak etdiz. Hazırlıqlar necə keçirdi?
– Hər şey yaxşı idi. Məşqçimiz çox fiziki məşq keçmirdi. Çünki görürdü ki, futbolçular fiziki baxımdan əziyyət çəkmir. Gündə bir dəfə məşq edirdik. Toplanış maraqlı keçirdi. Bir gün zooparka getdik, bir gün "Ayntraxt"ın oyununu izlədik. Amma təəssüf ki, mən orada çox qala bilmədim. Məşqə çıxdığım birinci gün ayağımda ağrılar başladı. Heç ağlıma gəlməzdi ki, məndə belə zədə olar. Çünki mənim heç vaxt dizimdə zədə olmayıb. Üç gün orada qalıb, müalicə olundum. Sonra gördülər ki, vəziyyət ciddidi. Mən də qayıdıb gəldim ki, müalicəmi burada davam edim.
– Millimizin növbəti rəqibi İtaliyadı. Belə güclü rəqibə qarşı necə hazırlaşırdız?
– İtaliyanın çox güclü komandası var. Fakt budu ki, onlar bizdən güclüdü. Mən orada olanda start heyət hələ ki, açıqlanmamışdı. Bilinmirdi ki, kim oynayacaq. Yəqin ki, həmişəki qaydada oynayarıq. Artıq 3-4 gündü Bakıdayam. Onlar necə hazırlaşır, xəbərim yoxdu.
– Komandamızın müdafiəsinin sağ cinahında ən çox Mahir Şükürov oynayırdı, o çağırılmadı. Siz də zədələndiz. Belə çıxır ki, oyun zamanı həmin mövqedən problemlər yaşayacağıq…
– Yəqin ki, həmin mövqedə İlkin Qırtımov oynayar. Mahir komandamızın aparıcı üzvlərindən biridi. Açığı, onun çağırılmamasına biz də təəccübləndik. Həmçinin Vaqifin çağırılmamasına da təəccübləndik. Onlar komandamızın aparıcı üzvlərindəndi. Bu, baş məşqçinin qərarıdı. Biz nə deyə bilərik? Yəqin ki, nəsə bir səbəbi var. Amma biz bilmirik. Mən də son vaxtlar yaxşı formada idim. Mahirin yoxluğunda mən o mevqedə oynaya bilərdim. Amma indi o mövqedə ya Elnur Allahverdiyev, ya da İlkin Qırtımov oynayacaq. Həmin mövqenin futbolçularından olan Maksim Medvedev də bu matçda oynaya bilməyəcək. Çünki diskalifikasiyası var. Biz yoxuq, amma Elnur və İlkin oradadı. İnanıram ki, onlar da çıxıb canla-başla mübarizə aparacaqlar.
– Millidə hədəf qrupda 3-cü yeri tutaraq, pley-offa çıxmaqdı. Sizcə, komandamız bunu bacara biləcək? İlk oyunda Bolqarıstana məğlub olduq, növbəti rəqiblərimiz də İtaliya və Xorvatiya kimi nəhənglərdi…
– Düzdü, evdə Bolqarıstana məğlub olduq, amma İtaliya və Xorvatiya ilə hələ oynamamışıq. İstəmirdik, məğlub olaq. Çalışdıq ki, nəsə edək, amma alınmadı. Şans məsələsinə gəldikdə isə, hələ İtaliya və Xorvatiya milliləri ilə oynayaq, sonra hər şey bəlli olacaq. İndidən proqnoz vermək düzgün çıxmaz. Onu deyə bilərəm ki, millimiz İtaliya və Xorvatiyaya turist kimi gəzməyə getmir. Çox şükür ki, uşaqların hamısı da formadadı. Ən azından oradan heç-heçə ilə qayıtmaq istəyirlər. Toplanış zamanı uduzmaq ağlımıza gəlmirdi. Heyətdə yaxşı ab-hava vardı.
– Boqlarıstan yığmasının baş məşqçisi Lyuboslav Penev yerli mətbuata açıqlamasında deyib ki, biz Azərbaycanla oynamışıq. Onların qrupumuzda mərhələ adlamaq şansı yoxdu. Bu fikirlə razısız?
– O, məşqçidi. Öz fikirini bildirə bilər. O da komandaların adlarına, reytinq səviyyələrinə baxıb, deyir. O, da müsahibə verib, öz fikirini bildirir. İndi də demokratiyadı, hər hansı məsələ ilə bağlı fikir söyləyə bilərsən. Buna görə kimsə onun nə dilini kəsməz, nə ağzını tikməz. İndi durub, ona nə deyə bilrik ki? Oyundan sonra hər şey bilinəcək.
ELMAR VƏLİYEV
- Milli komanda2024-05-03 08:00
Vay(ss) bizim halımıza?
- Ölkə futbolu2024-05-02 08:00
Bir aylıq istirahətin şərəfinə… Balaşın ariyası
- Müsahibə2024-05-02 15:51
Dodo “Qəbələ”yə kömək etmək istəyir: I Liqada da oynamağa hazırdır
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə