Müsahibə
Ansi Aqolli: "Onlar bizim oyunçuların sifətlərinə təpiklə vurdu"
Futbol üzrə Albaniya yığmasının və "Qarabağ"ın …
Futbol üzrə Albaniya yığmasının və "Qarabağ"ın müdafiəçisi Ansi Aqollinin futbolinfo.az saytına müsahibəsi
– AÇ-2016-nın seçmə mərhələsi çərçivəsində səfərdə Serbiya millisi ilə qarşılaşdınız. Həmin oyunda baş verən hadisələr haqqında nə deyə bilərsiz?
– Onu deyə bilərəm ki, çox arzuolunmaz hadisə idi. İstəməzdim ki, belə olsun.
– UEFA prezidenti Mişel Platini açıqlamasında bu hadisələrə görə alban azarkeşləri və futbolçuları günahkar hesab etdiyini, komandanıza 0:3 hesablı texniki mğlubiyyət verilə biləcəyini deyir. Sizcə, belə qərarın verilməsi ədalətlidi?
– UEFA prezidentinin nə dediyini bilmirəm. Amma əgər deyibsə ki, Albaniyaya 0:3 hesablı texniki məğlubiyyət verilməlidi, bu, düzgün deyil. Biz həmin matçı səfərdə oynayırdıq, Albaniyada yox. Oyunla bağlı təşkilatçılıq çox pis səviyyədə idi. Azarkeşlər futbolçularla döyüşmək üçün meydana daxil oldu. Onlar tribunalardan daş atırdılar. Onlar oyun boyu "albanlara ölüm" deyə qışqırırdılar. Onlar bizim oyunçuların sifətlərinə təpiklə vurdu. Həmçinin polislər də bizimkiləri təpikləyirdi. İndi deyin görüm, yenidən oraya gedib, necə oynaya bilərik?
– Ümumiyyətlə oyunun belə gərgin keçəcəyini gözləyirdiz?
– Əvvəllər Albaniya və Serbiya arasında siyasi problemlər yaşandığını bilirdim. Amma biz oraya sadəcə, futbol oynamağa getmişdik. Matçdan əvvəl biz ancaq meydanda keçiriləcək oyuna köklənmək üçün hazırlaşırdıq. Əvvəlcədən oyunda baş verəcək hər hansı təxribata fikir verməmək üçün yaxşı hazırlaşmışdıq. Amma mən belə olacağını heç gözləməzdim. Heç vaxt düşünməzdim ki, milli marşımız oxunanda onlar özlərini vəhşi kimi aparacaq. Heç vaxt düşünməzdim ki, radikallar tribunalardan meydana daxil olub, bizimlə döyüşəcəklər. Hətta VİP lojadakılar belə himnimizi fitə basdı. Bu, heç bir məntiqə sığmayan bir şeydi. Kolarova "əhsən" demək istəyirəm. İvanoviç və bəzi oyunçular… Onlar kişi kimi hərəkət etdilər. Biz bayrağı alıb, dördüncü hakimə vermək istəyirdik. Meydanda səhv hərəkət etmədik.
– "Qarabağ" bu gün "Qəbələ" ilə qarşılaşacaq. Bu oyundan nə gözləyirsiz?
– Çətin oyun olacaq. "Qəbələ" də iddialı komandalardandı. Amma biz rəqibi evdə qəbul edəcəyik. Ümid edirik ki, yaxşı oyun göstərib 3 xal qazanarıq.
– Azərbaycan millisinin Xorvatiyaya 0:6 hesabı ilə məğlub olduğu matçı izlədiz?
– Xeyr, canlı izləyə bilmədim. Amma nəticədən xəbərim var. İzləmədiyim üçün oyun barədə nəsə deməyim yaşı çıxmaz.
– Bu gün Azərbaycan milli komandasının baş məşqçisi Berti Foqts istefa verdi. Sizcə, onun gedişi millimiz üçün xeyirli olacaq, ya necə?
– Mən dəqiq deyə bilmərəm ki, Foqtsun getməyi milliyə xeyirlidi, ya yox. Sadəcə, onu deyə bilərəm ki, Azərbaycan Futbol Federasiyası çoxlu pullar xərcləyir və çalışır ki, millinin vəziyyəti yaxşılaşsın, amma yenə də komanda pis nəticələr qazanır. Nəticələr pis olanda da həmişə baş məşqçiləri günahkar hesab edirik.
ELMAR VƏLİYEV