Ölkə futbolu
Elxan Məmmədov Qurban Qurbanovun karyerası ilə oynayır
Berti Foqtsun istefası bir andaca gündəmi dəyişdi. İndi ham?…
Berti Foqtsun istefası bir andaca gündəmi dəyişdi. İndi hamını milli komandanın taleyi düşündürür. Yeni baş məşqçi böyük ölçüdə həm də milli komandaya münasibətin güzgüsü, seçilən strategiyanın mahiyyəti olacaq.
Günün reallığı belədi ki, hələ Foqts burada olarkən də hamı futbolumuzdakı bəd streotipləri dağıdan, Azərbaycan futbolunun heç də rəzil gündə olmadığını isbatlamağı bacaran Qurban Qurbanovu xilaskar kimi görürdü. Elə bunun nəticəsiydi ki, alman məşqçi hər imkan düşəndə ən layiqli əvəzedicisini, potensial xələfini qaralamağa, onu gözdən salmağa çalışırdı. “Qarabağ”ın uğurlarını heyətdəki braziliyalıların adına çıxan Foqts hər dəfə Qurbanovun işini aşağılamağa çalışırdı.
Bütün qıcıq dolu açıqlamalara mərdanə, kişi kimi sakit reaksiya göstərən, Foqtsun qeybətinə əhəmiyyət verməyən Qurbanov izləmişik həmişə… Heç vaxt həmkarına eyni formada cavab verməyən Qurban bəy bununla həm də xarakter, peşəkarlıq göstərib. O, sadəcə, başını aşağı salaraq işini maksimum yüksək səviyyədə görüb ki, deyəsən, elə bu amil onun haqqının tapdalanmasına səbəb olacaq.
Bu gün ölkədə hamı milliyə yerli məşqçinin rəhbərlik etməsini istəyir. Bunu futbol mütəxəssisləri də, ölkəmizdəki əcnəbi futbol adamları da hər açıqlamasında dilə gətirir. Sıravi azarkeşlər isə artıq çoxdan bu addımın intizarındadı. Namizəd isə əvvəlki kimi çox deyil – hamı artıq milli üçün hazır olan Qurbanovun təyinatını gözləyir.
Amma, amma, amma…
…Amma bu ölkədə bir Elxan Məmmədov da var. Az qala südəmər yaşında AFFA-ya hansısa yollarla, kimlərinsə istəyi və təzyiqi ilə təyin olunmuş baş katib…
Nə yazıq ki, bu təyinatadək futbolun neçə nəfərlə oynandığını belə bilməyən bu adam indi Azərbaycan futbolunun, Azərbaycan millisinin başında dəlləklik edir; yığma komandanı piştaxtaya çevirib, özü isə ancaq qazanmaq həvəsindədi. Qazanmaq üçün hər şeyi gözə alıb, insanların qüruru, azarkeşlərin hissləriylə belə oynamağa hazırdı.
Milli komanda hamımız üçün qürur mənbəyidi, ortaq dəyərimizdi, ölkəmizin idman şərəfinin ən ülvi tərənnümçüsüdü, qələbəsi sevincimiz, məğlubiyyəti kədərimizdi. Məmmədov üçün isə milli ilə bağlı bütün başverənlər yeni qazanc layihəsinin təməlidi. Belə ki, yığma udursa, deməli, qazanc üçün böyük perspektivlər var: milli çempionatın təqviminə tüpürülərək keçirilən Almaniya toplanışları, səfərlər, mənasız yoxlama oyunları; yığma uduzursa, bundan kimlərisə “vurmaq” fürsəti kimi yararlanmaq, vəziyyətdən çıxmaq üçün tədbirlər görmək imkanı…
Həmin tədbirlər nədi bəs? Milli komanda uduzanda bəhanələr ortaya çıxır, güclənmək üçün milliləşmələr başlayır, Azərbaycana dəxli olmayan futbolçular heyətə götürülür, məşqçi seçimində də baş rolda Məmmədovdu – o, yalnız onun biznesinə xidmət edəcək adamları seçir.
Foqtsla müqavilənin Sürixdə pozulması sizə adı gəlməsin. Elxan bəy almanın onunla birlikdə etdiklərini açıb-tökəcəyindən qorxaraq bu məşqçinin ağzını bağlamaq, onun kompensasiya tələbini önləmək, gizli sirrləri sandıqda saxlamaq üçün anlaşmanı neytral bir yerdə xətm etdi. Haqqını ödədi, səssini kəsdi…
Bu gün Məmmədov Qurban Qurbanovun karyerası ilə oynayır. Hamının bir nömrəli namizəd saydığı adamı baş katib istəmir. Niyə? Çünki Qurbanov futbol adamıdı, baş katibin adamı deyil. O, futbolçu səviyyəsi yetərli olmayan farsı, ləzgini, PKK-ya dəstək verməkdən çəkinməyən kürdü gətirib “Sumqayıt”da oynadan Elxan bəyin istəyi ilə onları milliyə çağırmayacaq. Axı, millidə oynamaq bu futbolçuların qiymətinin qalxması, harasa satılanda baş katibin daha çox qazanması deməkdi. Qurban bəysə məhz bu xüsusiyyətlərinə görə 7 il postunda saxlanılan Foqtsdan fərqli biridi.
Elə bu səbəblərdən Elxan bəy “Qarabağ”ın gənc baş məşqçisinə şans vermək nədir, heç onun adını gündəmə belə gətirmək istəmir. Məmmədova yaxın mətbuat “imtina etdi” damğasıyla ictimaiyyəti çaşdırmaq istədi, amma Qurbanov çıxıb kişi kimi aşıq danışdı. O, heç bir təklif almadığını, millidə işləməyin şərəf olacağını dedi.
Məmmədov millini müvəqqəti olaraq Mahmud Qurbanova tapşırıb əcnəbi axtarır. Hətta AFFA-nın yeni loqosunu belə atasına çəkdirib qonorarın ailə büdcəsinə getməsini təmin edən baş katib ictimaiyyətin fikrinə görə qazancdan imtina etməz. Qurban Qurbanov milliyə layiqli namizəd ola bilər, amma Məmmədovun biznesi üçün yararlı şəxs deyil. Ona görə də Foqtsun yerinə elə Foqts kimisi gələcək. Elxan Məmmədovun isə bazarını bağlayan tapılmasa, hələ milli qürurumuzun ayaq altına atılmasını çox görəcəyik.
CAVAD