Müsahibə
"Reynaldo ilə Almeydanın oyunu alınsa…"
"Araz Naxçıvan"ın ukraynalı müdafiəçi…
"Araz Naxçıvan"ın ukraynalı müdafiəçisi Ruslan Zubkov ölkəsinin mətbuatına müsahibə verib. Futbolinfo.az saytı sizi həmin müsahibə ilə tanış edir.
– İlk növbədə "Qarabağ"la bağlı ukraynalı azarkeşlər üçün nə deyə bilərsiz? Bu komanda asan rəqibdi, ya onlardan qorxmalıyıq?
– Bütün "Dnepr" və "Qarabağ" azarkeşlərinə baxımlı və yaxşı ədalətli oyun arzulayıram. Çempionatın səviyyəsindən asılı olmayaraq, futbol ən qeyri-adi oyundu. "Qarabağ" bu gün Azərbaycan çempionatının ən güclü komandalarındandı. Onlar sürətli futbolu sevir. Bu səbəbdən də "Dnepr" bu matça ciddi hazırlaşmalıdı.
– Cari çempionatda komandanızın "Qarabağ"la oyunu təxirə salınıb. Buna səbəb nə idi?
– Bəli, "Qarabağ"la 3-cü turdakı matçımız təxirə salındı. Çünki onların Avroliqa oyunu vardı. Bununla bağlı onu deyə bilərəm ki, Azərbaycan komandalarının hələ də iki cəbhədə vuruşmağa gücü çatmır.
– "Qarabağ"ın oyun üslubu haqqında nə deyə bilərsiz? Onların ən çox hansı oyunçularından çəkinmək lazımdı?
– "Qarabağ" haqqında onu deyə bilərəm ki, bu komandanın oyunu 1990-cı illərdəki "Spartak"ı (Moskva) xatırladır. Onlar topu yaxşı saxlayırlar və sürətli əks-hücumlar təşkil edə bilirlər. Bunun üçün də onlarda Reynaldo kimi sürətli hücumçu və mərkəz yarımmüdafiəçisi Almeyda var. Əgər onların oyunu baş tutsa, "Dnepr" müdafiədə çox çətinlik çəkəcək.
– "Qarabağ" ölkə çempionatında 7 matçda 14 xal toplayıb və 2-ci yerdə qərarlaşır. Belə nəticə ürəkaçandı?
– Ola bilər ki, bu gün "Qarabağ"ın 14 xalı var və 2-ci yerdə qərarlaşıb. Amma hələ çempionat yeni başlayıb. Əminəm ki, onlar daha çox xal toplayacaqlar. Hazırda onları liderdən 1 xal ayırır. Hələ onların təxirə salınmış oyunu da var. Bir daha qeyd edim ki, onlar üçün iki cəbhədə oynamaq çətindi. Bu, onlar üçün yeni haldı.
– "Dnepr"in cari mövsümdəki oyunlarını izləmisiz? Markeviçin rəhbərliyi altındakı komanda sizə necə təsir bağışlayır?
– Bəli. "Dnepr"in son turdakı "Çernomorets" matçını izlədim və Markeviçin yetirmələrinin göstərdiyi oyundan xoşum gəldi. Ən çox onların qalib gəlmə arzusu məndə yaxşı təəssürat yaratdı. 0:1 hesabı ilə məğlub durumda olmalarına baxmayaraq, onlar özlərinə inandılar və qalib gəldilər. Markeviçin bi komandada hansısa köklü dəyişikliyini görməmişəm. Sadəcə olaraq, bu komandadakı oyunçuları yaxşı yönləndirmək lazımdı. Belə olan halda onlar həm çempionatda, həm də Avroliqada yaxşı nəticələr qazanacaqlar.
– Azərbaycanda insanlar Ukrayna səfərindən hansı nəticəni gözləyir?
– Burada hamı "Qarabağ"ın qrupdan çıxacağını gözləyir. Amma "Qarabağ"ın "Dnepr" matçından nə gözlədiyini dəqiq bilmirəm. Bundan əlavə, buradakı insanlar bilir ki, "Dnepr" son oyundan sonra çempionatda liderliyə yüksəldi və çətin rəqibdi. Hazırda "Dnepr"də yaxşı ab-hava var və bu səbəbdən "Qarabağ" ciddi mübarizə ilə üzləşəcək.
– Bu qrupda Azərbaycan klubunun və "Dneprin" şanslarını necə dəyərləndirirsiz?
– Şanslara gəldikdə, mən futbolla bağlı proqnoz verməyi xoşlamıram. Çünki bunu nə vaxt etsəm, səhv çıxıram. Ona görə də sadəcə, futbolu izləmək və zövq almaq istəyirəm. "Dnepr" və "Qarabağ"a yaxşı oyun arzulayıram və onlara qrupda uğurlar diləyirəm. Amma əlbəttə ki, mən "Dnepr"ə azarkeşlik edəcəm.
Hazırladı ELMAR VƏLİYEV