Ölkə futbolu
Oğuz Çətin özü istefa verib
“Xəzər Lənkəran” bu gün Oğuz Çətinlə yo…
“Xəzər Lənkəran” bu gün Oğuz Çətinlə yollarını ayırıb. Futbolinfo.az xəbər verir ki, türk mütəxəssis səhər klubun ofisinə gedərək özü yazılı şəkildə istefa ərizəsini cənub təmsilçisinin prezidentinə təqdim edib. Bunu saytımıza açıqlamasında “Xəzər Lənkəran”ın vitse-prezidenti Tuyqun Nadirov bildirib:
“Bu gün klubun yekun iclası keçirildi. Oğuz bəy özü gəlib klub prezidentinə getmək istədiyini bildirdi. Özü yazılı şəkildə istefasını klub prezidentinə təqdim etdi. O, istefa verəndə mən Klublar Komitəsinin iclasına gəlirdim. Yəqin ki, artıq bu barədə açıqlama olacaq. Oğuz Çətin klubun ona yaratdığı şəraitə görə öz minnətdarlığını bildirdi. Biz də onun əməyini dəyərləndiririk”.
“Yunis Hüseynov komandaya idman direktoru gələndə artıq mətbuatda müzakirələr olurdu ki, o, Oğuz Çətini əvəzləyəcək. Yunis bəyin onu əvəzləməsi nə qədər realdı” sualına isə Tuyqun bəy bu məsələnin müzakirə mövzusu belə olmadığını bildirib: “Yunis Hüseynov komandaya idman direktoru kimi gəlib və o, bu vəzifədə fəaliyyətini davam etdirəcək. Başqa bir məşqçi də gəlsə, o öz vəzifəsində qalacaq. Onun Oğuz Çətini əvəzləməsi müzakirə mövsuzu deyil. Sizi inandırım ki, Oğuz Çətinin istefa verməsinə hazır deyildik. Buna görə də ondan əvvəl məşqçi axtarmamışıq. Yayda “Xəzər Lənkəran” həm yerli, həm də əcnəbi futbolçular dəvət etdi. Amma istədiyimizi ala bilmədik. Məşqçi gəlib öz öhdəliyini götürüb komandanı qurub. Yenə deyirəm, Yunis bəy klubun idman direktorudu. Onun işi çoxdu”.