2 iyun – “Neftçi”də qərar günü

“Neftçi”də hamı iyunun 2-i gözləyir. Gümüş medalçıda məhz həmin gün bütün suallara aydınlıq gələcək.

Futbolinfo.az xəbər verir ki, ilk öncə müqaviləsi bitmiş baş məşqçi Samir Abasovun postunda qalıb-qalmayacağı dəqiqləşəcək. Ondan sonra isə rəhbərlik heyətdə islahata başlayacaq. Məhz komandanın kimə tapşırılmasından asılı olaraq heyət formalaşdırılacaq.

Futbolçu seçimləri məşqçinin istəyinə əsasən ediləcəyindən, öncə strategiya müəyyənləşməlidi. Çünki Abasovun yola salınması, yerinə əcnəbi məşqçinin gətirilməsi gündəmdədi. Təbii ki, belə olduqda yeni çalışdırıcı heyətin bütünlüklə yenilənməsini istəyə bilər. Xüsusilə legionerlərlə bağlı mühüm qərarlar mümkündü.

Təsadüfi deyil, “Neftçi” ilə müqaviləsi başa çatan Tyaqo Bezzera da yeni sözləşmə üçün gözləmə mövqeyindədir. Braziliyalı futbolinfo.az-a açıqlamasında bunları deyib: “Samir Abasovun klubdakı taleyi hələ bilinmir. Mən də onu gözləyirəm. Bundan sonra danışıqlar barədə söhbət edə bilərik”.

Bezerra gələn ayın ilk günlərini gözləyən yeganə oyunçu deyil. Müqaviləsi bitən bütün futbolçular, xüsusilə əcnəbilər rəhbərliyin hansı qərarı verəcəyini gözləyir.