Avropa Liqasının birinci təsnifat mərhələsi çərçivəsində “Qəbələ”ni öz meydanında qəbul edəcək Tiflis “Dinamo”sunun baş məsqçisi Georgi Gequçadze "Qəbələ İK" qəzetinə eksklüziv açıqlamalar verib. Futbolinfo.az xəbər verir ki, gürcü mütəxəssis açıqlamasında komandasının Avropa Liqasına hazırlığını və bu yarışda imkanlarını dəyərləndirib, “Qəbələ” ilə bağlı fikirlərini bölüşüb.
Bu ilin mayında komandanın “sükanı arxası”na keçən 50 yaşlı gürcü mütəxəssis hazırkı “Qəbələ”nin imkanlarını müfəssəl dəyərləndirməkdə çətinlik çəkib: “Bildiyimə görə, mövsüm bitəndən sonra komandanızın heyətində böyük dəyişikliklər olub. “Qəbələ” avroliqa oyunları ərəfəsində transfer bazarında çox fəallıq göstərib. Heyətinə cəlb etdiyi oyunçuların karyeralarına nəzər salmışam. Yetərincə səviyyəli futbolçulardı. Buna görə ciddi rəqiblə görüşəcəyimizi və bizi çətin sınaq gözlədiyini deyə bilərəm”.
“Dinamo”nun baş məşqçisi “Qəbələ”nin ötən mövsümdəki oyunlarını izləsə də, komanda haqqında yüksək fikirdədi. Gürcü çalışdırıcı belə bir komandanın formalaşmasında baş məşqçinin böyük rolu olduğunu söyləyib: “Ötən mövsüm keçirdiyiniz bəzi oyunlarınızın fraqmentlərinə baxmışam. Mükafata layiq, samballı komandadı, meydanda yaxşı təsir bağışlayır. Həm də komanda yaradıcı oyun göstərməyə çalışır. “Qəbələ” rəqibinə xeyli problem yarada bilən komandadır. Ukraynalı həmkarım Roman Qriqorçukla şəxsi tanışlığım olmasa da, karyerasına əsasən, işinə qiymət verə bilərəm. Məşqçilik fəaliyyəti dövründə çox uğurlar qazanıb. Bildiyimə görə, Qriqorçuk savadlı mütəxəssisdi, məşqçilik işindən yaxşı baş çıxarır. Bu, məndə ona qarşı rəğbət oyadıb. Deməli, biz həm də yüksək səviyyəli mütəxəssislə mübarizə aparmalı olacağıq”.
Tiflis “Dinamo”su Avroliqaya hazırlıq məqsədilə Sloveniyada təlim-məşq toplanışı keçib. Hazırlıqdan razı qalan baş məşqçi indiki heyət barədə də qısa məlumat verdi: “Bizdən də bir neçə futbolçu gedib, əvəzinə yeniləri gəlib. Məsələn, ötən mövsüm əsas qol ümidlərimizdən olan ispan hücumçu artıq sıralarımızda deyil. İstənilən halda, “Qəbələ”dən fərqli olaraq, “Dinamo”da heyətlə bağlı dəyişikliklər çox deyil. Bizim komanda çox gəncdi. Yetirmələrim baxımlı futbol oynamağa çalışırlar. Futbolda nəticəyə hər şey təsir göstərə bilər. Təsadüfi heç nə olmur. Ola bilər ki, təcrübəli futbolçuların çoxluğu “Qəbələ”nin xeyrinə olacaq. Ancaq gənc futbolçuların çoxluğu bizə üstünlük verə bilər. Bir sözlə, hər şeyi oyunlar göstərəcək. Əvvəldən dəqiq söz demək çətindi”.
Gequçadzenin fikrincə, komandasının mövsüm bitəndən sonra gücləndiyini, yoxsa zəiflədiyini “Qəbələ”ylə oyunlar göstərəcək: “Hesab edirəm ki, Avropa Liqasında oyunlar bizim üçün böyük təcrübə olacaq. Turnirdə məqsədimiz imkan daxilində çox irəliləməkdir. “Qəbələ”nin “İnter”lə yoxlama oyunu keçirərək qalib gəldiyini bilirəm. Ancaq “İnter”i çalışdıran həmyerlim Zaur Svanadze, yaxud həmin komandada oynayan gürcü futbolçulardan hazırkı “Qəbələ” haqda məlumat almamışam”.
“Dinamo”nun çalışdırıcısı ilk oyunun harada keçirilməsinin daha münasib olmasıyla bağlı məsələyə də birmənalı cavab verməyib: “Avrokuboklarda evdə başlayıb, ardından səfərdə oynamağın həm üstünlükləri, həm də mənfi cəhətləri var. İlk matçı öz meydanında keçirirsənsə, oyunun strategiyası da dəyişir. Təbii ki, istəyirəm ki, növbəti mərhələyə keçək. Bunun üçün sonadək mübarizə aparacağıq. Kimin favorit olduğunu oyunadək söyləmək çətindir. Bəli, Tiflis “Dinamo”sunun avrokuboklarda təcrübəsi böyükdür. “Qəbələ” isə yalnız ötən il qitəmqiyaslı turnirdə çıxış edib. Ancaq bu, hələ heç nə demək deyil. Komandada təcrübəni futbolçular yaradır. “Qəbələ”də də belə oyunçular çoxdu”.
Qeyd edək ki, 2004/05 mövsümündə “Dinamo”nu UEFA kubokunun qrupuna o vaxt da komandanın bas məsqçisi olmus Georgi Gequçadze çıxarıb.