Azərbaycan futzal millisinin üzvü Tofiq Mikayılovun futbolinfo.az saytına müsahibəsi
– Əvvəlcə, Bosniya və Herseqovinada keçirəcəyiniz hazırlıqla bağlı fikirləriniz bildirərdiniz. Toplanışdan əlavə, həm də bu ölkənin yığması ilə oynayacaqsız. Hazırlıq və yoxlama görüşləri komandaya nə qazandıracaq?
– Üç gün Bakıda hazırlıq keçdikdən sonra Bosniya və Herseqovinaya yollanacağıq. Onlarla yoldaşlıq görüşü də keçirəcəyik. Məncə, bizim üçün yaxşıdır. Çünki yeni komandayıq, gənc komandayıq. Heyətdə həm də yeni gələnlər var, ilk dəfə yığmaya dəvət alıblar. Hər oyundan-oyuna irəliləyiş hiss olunur. Şükür, hər şey də zamanla yaxşı olacaq. Bosniya və Herseqovina ilə oyunlarda da əlimizdən gələni edəcəyik ki, yaxşı nəticə qazanaq. Çünki rəsmi oyunlar öncəsi müsbət nəticələr əhval-ruhiyyəni yüksəldəcək.
– Dediyin kimi komanda yenidir. Səncə, bu heyət uğur qazana bilər?
– Əlbəttə ki, qazana bilərik. Hər şey öz əlimizdədir. Güclü qapıçılarımız, yaxşı oyunçularımız var. Məşqçimiz də ambisiyalıdır. Ümid edirəm ki, hər şey istədiyimiz kimi gedəcək.
– Qarşıda bizi İsveçə qarşı rəsmi oyun gözləyir. Avropa çempionatının seçmə mərhələsi çərçivəsində Bakıda keçiriləcək bu matçdan gözləntin nədir?
– Çempionlar Liqasında “Araz-Naxçıvan” İsveçin “Uddevalla” klubu ilə qarşılaşdı. Az-çox onlar haqqında məlumatımız var. Məşqçimiz də analiz edir. Neçə ildən sonra yalnız azərbaycanlılardan ibarət komanda ilə hazırlaşırıq. Yaxşı nəticələrə ümidim böyükdür. Həmin İsveç klubunun demək olar ki, əksər üzvləri onların yığma komandasında oynayır. Bu səbəbdən də güclərinə bələdik.
– Azərbaycan çempionatına da start verilib. Liqada vəziyyət necədir?
– “Baku Fire” olaraq çempionata çox gözəl start vermişik. Rəhbərliyimiz, məşqçilərimiz bizim üçün hər cür şərait yaradıb. Bu il uğur qazanmaq üçün çalışırıq. Çempionatda 3 komanda qızıl medallar uğrunda mübarizə aparır. Digər komandalar isə çox zəifdir. Ötən gün keçirilən tura baxsanız, hər şeyi görəcəksiz. Biz isə daha yaxşısını etməyə çalışırıq. Həm Avropada, Çempionlar Liqasında uğur qazanmaq bizim üçün yaxşı olar. Bu, çempionatımıza da marağı artırar. Federasiya prezidenti Zaur Axundov da əlindən gələni edir.
– Digər komandaların çox zəif olması beynəlxalq turnirlərdə sizin uğur qazanmanıza mane olmayacaq? Çünki rəqabətin olmaması mübarizəni asanlaşdırır…
– Əlbəttə ki, bu belədir. Düz deyirsiz, çox təsiri var. Onun üçün Vitali Borisov komandamlızın daha çox matç keçirməsini istəyirik ki, hazırlıqlı olaq.
AĞA