Premyer-liqa
Qriqorçukun qərarı Tağızadəni güldürür
Topaz Premyer Liqasının 22-ci turunda “Qəbələ” doğma…
Topaz Premyer Liqasının 22-ci turunda “Qəbələ” doğma azarkeşləri önündə “Neftçi”yə 1:3 hesabı ilə məğlub oldu. Oyun vaxtı ev sahibin müdafiəsində olan boşluqları görməmək qeyri-mümkün idi. Bakılıların məhz bu boşluqlardan istifadə edib, layiqli qələbə qazandığını desək, yanılmarıq.
Maraqlıdı ki, “Qəbələ”nin baş məşqçisi Roman Qriqorçuk ötən günkü qarşılaşmada heyətlə bağlı bir sıra dəyişikliklər etmişdi. Belə ki, ukraynalı çalışdırıcı hücumçu Bəxtiyar Soltanovu müdafiənin sağ cinahında sınadı. Düzdü, Soltanov pis təsir bağışlamasa da, ehtiyatda müdafiəçi ola-ola hüçumçunun bələd olmadığı mövqeydə çıxış etməsi hər halda düşündürücü məqamdı.
Görəsən, adətən müdafiəçiləri aldadıb, qol vurmağa cəhd edən Bəxtiyar Soltanov bu dəfə hücumçulara qarşı oynamasını necə qiymətləndirir?
“Oyuna yaxşı başlasaq da, axırını gətirə bilmədik. İkinci hissədə oyuna nəzarəti itirdik. Bu da məğlubiyyətə səbəb oldu. Avrokuboklara getmək üçün hələ şansımız qalır. Qarşıda kubok və çempionat oyunları var. Yarış hələ davam edir. Qələbə üçün əlimizdən gələni etməliyik. Məğlubiyyət varsa, öz oyunum barədə danışmaq istəməzdim. Müdafiəçi kimi çıxış etməyim baş məşqçinin fikri idi. Hər halda belə məsləhət görmüşdü. Komanda üçün yaxşı olacaqsa, növbəti oyunlarda da müdafiədə çıxış edə bilərəm. Bu baş məşqçinin işdi, nə edim? Bu barədə danışmaq istəməzdim”.
Bəs, son turlarada əsas heyətə düşməkdə çətinlik çəkən müdafiəçi Ruslan Tağızadə necə düşünür? Maraqlıdı, Tağızadə ehtiyat oyunçular skamyasında oturduğu halda, Bəxtiyarın müdafiəçi kimi meydanda olması onu qıcqlandırıbmı?
“Qarşılaşmaya ciddi hazırlaşmışdıq. Çünki ardıcıl iki oyunda məğlubiyyətimiz var idi. İstəyirdik ki, qələbə qazanmaqla həmin məğlubiyyətləti unutduraq. İddialılar sırasına düşmək üçün qələbə çox vacib idi. İlk hissəni qələbə ilə baş vursaq da, ikinci 45 dəqiqədə komanda dayandı. Nə olduğunu bilmədim. Nəsə çaşqınlıq yarandı. Adi səhvlərimizdən qol buraxaraq, məğlub olduq.
Təlim-məşq toplanışında əsas heyətdə çıxış etdim. Nə zədəm, nə də başqa bir problem yoxdu. “Neftçi” ilə matçda əsas heyətdə oynamalı idim. Məşqçinin son qərarına görə heyətdə çıxarılıb, ehtiyat oyunçular sırasına düşdüm. Baş məşqçinin fikrinə hörmətlə yanaşıram. Təki komanda üçün xeyirli olsun. Belə məsləhət imiş. Məşqlərdə çalışıram ki, özümü doğruldam. Baş məşqçinin rəğbətini qazanam. İnanıram ki, növbəti oyunlarda mənə şans verəcək.
Bu, məşqçinin qərarıdı. Belə məsləhət görübsə, heç nə deyə bilmərəm. Elə bir sual verdiniz ki. Bu sualı özüm özümə çox vermişəm. İndi də bu sualı siz mənə verdiniz. Mənə həm gülməli, həm də ağlamalı gəldi. Bir söz deyə bilmərəm. Qərarları baş məşqçi verdiyi üçün, məsuliyyəti də o daşıyır. Qərarı belə veribsə, deməli, düzgün addımdı. Hər bir oyunçu meydanda olmayanda pis olur. Məşqçinin fikrinə etiraz edəsi deyiləm ki?”
EMİN SƏFƏROV