Premyer-liqa
Qəbələdəki cinayət
Azarkeş stadiona komandasının qələbə qazanmasına kömək, h…
Azarkeş stadiona komandasının qələbə qazanmasına kömək, həm də şahidlik etmək məqsədi ilə yollanır. Yağışda, qışda, qarda, boranda tribunaya gələn fanatı ardıcıl məğlubiyyətlərinlə üzürsənsə, deməli, məsuliyyətə cəlb olunmalısan. Qardaş, şərt deyil ki, kiminsə başını kəsib, evini, maşınını yarasan. Məğlubiyyətinlə azarkeşin bağrını yarmaq da özü bir cinayətdi.
Qanun da bunu tələb edir. Nəzərə alaq ki, törədilən əməl yalnız ictimai təhlükəli sayılmadığı, yəni şəxsiyyətə, cəmiyyətə və yaxud dövlətə zərər yetirmədiyi və ya zərər yetirmək təhlükəsi yaratmadıqda cinayət hesab edilmir. Cinayətə görə cəzanı ağırlaşdıran hallar da o qədərdi ki, saymaqla bitmir. Misal üçün, cinayətin təkrar, qabaqcadan əlbir olmuş bir qrup şəxs, mütəşəkkil dəstə və ya cinayətkar birlik tərəfindən törədilməsi və s.
Milyonlar xərclənilən, əvəzində isə heç bir iddia ilə çıxış edə bilməyən klubun ardıcıl uğursuz nəticələr göstərməsində cinayət tərkibi olub-olmadığı mütləq araşdırmaq lazımdı. Bu məsuliyyəti bəndəniz yox, klub rəhbərliyi öz üzərinə götürməlidi. Hər halda xərclənilən və talan olunan pulları onlar verir. Müəyyənləşdirmək lazımdı ki, uğursuz nəticələrə görə məsuliyyəti kim daşıyır – bir nəfər, qabaqcadan əlbir olmuş bir qrup şəxs, yoxsa mütəşəkkil dəstə?
Yəqin ki, söhbətin “Qəbələ”dən getdiyinin artıq fərqindəsiniz. Fikrimcə, cinayətkarın tapılması üçün klub rəhbərliyinə ipucu verməyə ehtiyac yoxdu. Və mənə elə gəlir ki, “qırmızı-qaralar”ın evdə “Neftçi”yə 1:3 hesabı ilə uduzduğu matçdan sonra Roman Qirqorçukun yerli azarkeş tərəfindən “xirtdəklənməsi” də klub rəhbərliyi üçün növbəti ipuclarından biridi.
Fanatın ukraynalı çalışdırıcıya ünvanladığı “Sənin prinsipial matçda qazandığın nəticə budu” sualı qarşısında ağızı açıq qalan Qriqorçuk mətbuat konfransında da çıxılmaz vəziyyətdə idi. Sanki, toxunsan uşaq kimi ağalayacaqdı. Jurnalistlərə “Zamana ehtiyacımız var, tədricən yaxşı oynayacağıq” kimi cümlələri ilə özünü günahsız göstərən ukraynalıya adamın ürəyi ağrayırdı. Amma bu, onun məsuliyyətə cəlb olunmayacağı anlamına gəlməməlidi.
Bəli, qəbul edirik ki, yeni gələn məşqçiyə vaxt lazımdı. Tez bir zamanda heyəti formalaşdırmaq, öz futbol fəlsəfəsini aşılamaq üçün zamana ehtiyacı var. Amma sən əgər hücumçu Bəxtiyar Soltanovu müdafiənin sağ cinahına çəkirsənsə, deməli, günahkarsan. Ruslan Abışovu zəhləsi getdiyi, öyrəşə bilmədiyi müdafiəni solunda oynamağa məcbur edirsənsə, cinayətkarsan! Oyunda heç nə ilə yadda qalmayan, topu sanki ilk dəfə görürmüş kimi davranan Cavid Hüseynovu 81 dəqiqə meydanda saxlayırsansa, məğlubiyyətə məhkumsan. “Neftçi”nin vurduğu birinci və ikinci qolda Qəbələnin mənzərəsini seyr edən Rafael Santosun yerinə daha istəkli olan və əzmkar oyun nümayiş etdirən Sadiq Quliyevə şans vermirsənsə, taleyinlə indidən barışmalısan. Ürfan Abbasovla Rəşad Sadiqovun ehtiyyatda qalmasına isə heç cür şərh vermək olmur.
Hazırda “Qəbələ”nin müdafiəsində ciddi problemlərin olduğu hər kəsə məlumdu. Hələ də müəyyənləşdirə bilmədik ki, klub rəhbərliyi müdafiəçi almaqdan imtina edib, yoxsa ümumiyyətlə Qriqorçuk arxa xəttə futbolçuya ehtiyac olmadığını bildirib. Hər halda baş məşqçinin güvəndiyi müdafiəçilərin qonaqpərvərliyi ona baha başa gələcək. Bir də gördün ki, klub rəhbərliyi Qriqorçuka mesaj göndrib: “Aff et, el Roman!”.
EMİN SƏFƏROV, Bakı-Qəbələ-Bakı
P.S. Qəbələdəki “cinayət”ə şahidlik etməyimizə imkan yaradan, “Topaz” və Peşəkar Futbol Liqasına təşəkkür etmək lazımdı. Hər halda mən şahid qismində öz izahatımı yazdım. Cinayətkarı da mən tapası deyiləm ki…