Premyer-liqa
Sadıqov: "Neftçi" uduzsa, çempionluqdan əlini üzəcək"
Sabah Topaz Premyer Liqasında 23-cü turun oyunlarına start veri…
Sabah Topaz Premyer Liqasında 23-cü turun oyunlarına start veriləcək. Eyni gündə baş tutacaq qarşılaşmaların gərgin və maraqlı keçəcəyi gözlənilir. Nəzərə alaq ki, sabah “Qarabağ” “Neftçi”ni məğlub etsə, çempionluq yolunda əsas rəqiblərindən birini sıradan çıxaracaq. Avrokuboklara vəsiqə qazanmağı hədəfləyən AZAL və “Simurq” isə evdə oynayacaqları qarşılaşmadan maksimum nəticə ilə ayrılmağa çalışacaq. İddiaçılar sırasında düşməkdə çətinlik çəkən “Qəbələ” isə meydana “Xəzər Lənkəran”dan 3 xal almaq üçün çıxacaq.
Tur öncəsi saytımıza danışan Məşqçilər Komitəsinin sədri Vaqif Sadıqov baş tutacaq qarşılaşmalarla bağlı fikirlərini açıqlayıb. AZAL-ın sabiq çalışdırıcı ilk öncə Azərbaycan derbisi haqda danışıb.
“Neftçi” məğlub olsa, çempionluqdan əlini üzəcək”
“Neftçi” intiriqanı qorumaq üçün qələbə qazanmağa çalışacaq. “Qarabağ” da başa düşür ki, çempionluq uğrunda mübarizə aparan komandaların biri ilə görüşür. Qələbə qazanacağı halda çempionluq yolunda inamlı addım atmış olacaq. Bizi çox maraqlı oyun gözləyir. Nəzərə alaq ki, bu iki komandanın görüşü gərgin keçir. Hər zaman sona qədər şansın olduğunu vurğulamışam. Ancaq reallıq onu göstərir ki, “Neftçi” məğlub osla, çempionluqdan əlini üzəcək. Çünki bu iki komandanın arasındakı xal fərqi 13-ə yüksələcək. Son oyunlarda bunu bərpa etmək isə çox çətin görünür. Nə qədər imkan varsa, sona qədər mübarizə aparmaq lazımdı”.
“Qəbələ” fovoritdi”
“Rahat oyun olmayacaq. Bu, dəqiqdi. “Xəzər Lənkəran” nə qədər yaxşı oyun sərgiləsə də, gənc oyunçuların nəticə qazanmaq baxımından hazır olmadığını görürük. Fikrimcə, “Qəbələ” uğursuzluqlara son qoyub, qələbə qazanacaq. Buna inam böyükdü. Qələbədən sonra “qırmızı-qaralar” iddiasını ortaya qoymaq üçün mübarizə aparmalıdı. Əyalətdə baş tutacaq qarşılaşmada “Qəbələ” fovoritdi.
“Şüvəlandakı oyun heç-heçə olacaq”
Ümumiyyətlə, bu komandaların oyunu gərgin keçir. Nəzərə almaq lazımdı ki, AZAL da avrokuboklara vəsiqə qazanmaq üçün mübarizə aparır. “İnter”in qış fasiləsində yaxşı hazırlıq keçməsinə baxmayaraq, bu oyunda qalib görmürəm. “Bankirlər” son oyunda aşkar autsayder “Bakı” üzərində qələbə qazansa da, hələ ki, çempionatda inamlı təsir bağışlamır. Sözsüz ki, Kaxaber Sxadadzenin yetirmələri meydana qələbə əzmi ilə çıxacaq. Ancaq hər iki komandan üçün vacib oyun olduğunu nəzərə almaq lazımdı. Məncə, Şüvəlandakı oyun heç-heçə olacaq”.
“Sumqayıt”dan hər şey gözləmək olar"
“Bilirsiz, “Sumqayıt” elə bir komandadı ki, ondan hər şey gözləmək olar. Gənclərdən ibarət olan komandadı. Qeyri-stabil çıxış etdiyinə görə matçda hər bir nəticə qeydə alına bilər. Favorit “Simurq”du. Zaqatalalılar qələbə qazanacağı halda Avropa Liqasına vəsiqə qazanmaq yolunda inamlı addım atacaq. Çox vacib oyundu. Sevindirici haldı ki, artıq digər komandalar da avrokuboklara vəsiqə qazanmaq üçün mübarizə aparır”.
EMİN SƏFƏROV