Premyer-liqa
Sumqayıt hadisələri: Yenə cavabdehlərdən başqa hamı eşitdi
AFFA yenə unutdu, yenə görməməzlikdən gəldi, yenə üst…
AFFA yenə unutdu, yenə görməməzlikdən gəldi, yenə üstündən adlayıb keçdi. İzahat da həminkidi, bəhanə də…
AFFA İntizam Komitəsi Topaz Premyer Liqasının 22-ci turu çərçivəsində baş verən hadisələrlə bağlı qərarını açıqlasa da, ən önəmli məqama toxunulmadı. Belə ki, “Kapital Bank Arena”da “Sumqayıt” – AZAL oyununda “təyyarəçilər”in futbolçusu Freddi Mombonqoya qarşı irqçi şüarların səsləndirilməsini hamı gördü, AFFA-nın işçilərindən başqa. Hər halda görsəydilər, ən azı mətbuatda gedən xəbərlərə diqqət etsəydilər, nəticəsini qərarlarda görərdik.
Bütün dünyada irqçiliyə qarşı ciddi mübarizə aparıldığı bir vaxtda Azərbaycanda buna göz yumulur. Həm də bu, ilk belə hadisə olsaydı, “təsadüfdü” deyərdik. İş ondadı ki, Sumqayıtda belə hadisələr tez-tez olur. Noyabrda “Qəbələ”ylə yoxlama oyununda Ekiqo Ehiosun da irqi ayrıçeçkiliyə məruz qalmışdı. Əyalət klubunun üzvü buna etiraz olaraq meydanı tərk etməyə çalışmışdı.
Təbii ki, bu kimi halların davam etməsinin səbəbi cəzasızlıqdı. AFFA vaxtında tədbir görsəydi, “Sumqayıt”ı ev oyunlarını azarkeşsiz keçirməklə cəzalandırsaydı, klub rəsmiləri bu məsələdə daha diqqətli olardı.
Bəhs etdiyimiz son olayla bağlı heç bir qərarın verilməməsinin səbəbini öyrənmək üçün AFFA İntizam Komitəsinin sədri Tofiq Fətullayevlə əlaqə saxlamadıq. Çünki nə deyəcəyini bilirdik. İşi yalnız protokol içində gəzişmək olan bu şəxsdə təşəbbüs vermək, fəallıq göstərmək bacarığı yoxdu. O, sadəcə, icraçıdı – qabağına nəyi qoyurlarsa, onu da boşqaba çəkir.
Bu səbəbdən AFFA Hakim-İnspektorlar Komitəsinin sədri Gülağa Cabbarovun fikirlərini öyrəndik: “Siz hardan bilirsiniz ki, AFFA nümayəndəsi nə yazıb? Oxumusunuz, AFFA nümayəndəsinin qərarını?”
Cabbarovun qeyzli, bir az da ittiham edirmiş kimi danışmasının səbəbini anlamadıq. Düzgün işləyə bilməməsi, işçilərindən hesabat tələb etməyi bacarmaması azmış kimi az qala bizi də günahkar çıxaracaqdı. Onun stadionda olanlar barədə raportu İntizam Komitəsinə göndərdiklərini deməsi isə ağ yalandı. Belə olsaydı, bunun təsdiqini qərarda görərdik.
Maraqlıdı ki, Gülağa bəy bununla bağlı İntizam Komitəsinə lazımi məlumatı ötürdüklərini desə də, “Sumqayıt” – AZAL oyununun hakim-inspektoru olmuş Səfər Haşımov heç bir irqçi süarı eşitmədiyini vurğuladı: “Mən VİP tərəfdə əyləşmişdim. Həmin yerdə də barabanlar, şeypurlar çalınırdı. Hər hansı bir şüarı eşitməmişəm, ona görə fikir bildirə bilmərəm. Mən oyuna baxıram, hakim idarəçiliyinə qiymət verirəm. Onu AFFA nümayəndəsi Ramiz Abdullayevdən soruşun. Əgər nəsə eşidibsə, o, məlumat verə bilər. Mən nəzarətimi tam oyuna yönəldirəm. Hansı hadisə yaranırsa, onu qiymətləndirirəm. İrqçiliklə bağlı şüar heç mənim ağlıma gəlmədi. Orada nə baş veribsə, bunu bilmirəm. Mənim yaşıma yalan danışmaq yaraşmaz”.
Səfər bəy düz deyir – həqiqətən də bunu raportunda AFFA nümayəndəsi Ramiz Abdullayev qeyd etməliydi. Biz isə Haşımovu sadəcə, stadionda olduğu üçün əlavə məlumat almaq həvəsi ilə narahat etmişdik. Ancaq onun kimi Azərbaycanın əməkdar fəxri idman işçisi olan Abdullayev də heç bir şüar eşitmədiyini dedi: “Mən adətən VİP-də oturmuram. Mən oyun boyu meydançanı dövr edirəm. Mən nə olub, Gülağa Cabbarova bildirmişəm. Ondan öyrənə bilərsiz”.
Ramiz bəyin meydan boyu niyə fırlandığını bilmirik, amma hamının eşitdiyi şüarları eşitməməsi adamı şübhəyə salır. Məsləhətdi ki, o, qulaqlarını həkimə göstərsin. Əks halda, növbəti dəfə videofaktla onu utandıracağıq.
ZAMİN ALLAHVERDİYEV