Premyer-liqa
Çingiz Abdullayevə "narmalni" sual
"Neftçi"nin dava-dalaşı sevən prezidenti Sadıq Sa…
"Neftçi"nin dava-dalaşı sevən prezidenti Sadıq Sadıqov vəzifəsindən uzaqlaşdırılsa da, bakılılar dəyişmək bilmir ki, bilmir. Paytaxt təmsilçisinin Müşahidə Şurasının sədri xalq yazıçısı Çingiz Abdullayev təyin olunduqdan sonra flaqmanın ziyalı klub olacağı gözlənilsə də, kor tutduğundan buraxmadığı kimi, "Neftçi"də intizamsızlığdan əl çəkmir. Halbuki, cənab Abdullayev bu posta gələr-gəlməz intizamsızlıq edənləri komandadan rədd edəcəyini bildirmişdi. Belə işlərdə sərt xasiyyəti olduğunu vurğulayan Çingiz bəy heç kəsə güzəşt etməyəcəyini söyləmiş, ciddi tədbirlər görəcəyini vurğulamışdı.
Biz də sədrin bu açıqlamalrını səmimiyyətlə qarşılamışıq. İnanırıdıq ki, "Neftçi" 180 dərəcə dəyişərək, nümunəvi komanda olacaq. "Ağ-qaralar"ın nümunəvi komanda olacağına dair Çingiz bəy ictimaiyyətə söz vermişdi axı. Bəs nə dəyişdi?
Harada "Neftçi" var, orada söz-söhbət, qalmaqal, qan var. Sanki dəliqanlıların hamısı bu klub ətrafında birləşib. Buna görə də, uzun müddət komandanın üzvlərinin "ağıllı bala" olacağına heç zərrə qədər də olsun belə inam yoxdu. Bu, ehtimal özünü Zaqatalada da doğrultdu. "Simurq" səfərində "Neftçi" özünü qonaq kimi aparmadı.
Meydanda sərgilənən futbol yox, pərdəarxası olaylar qarşılaşmaya damğa vurdu. Azarkeşləri təhqir edən kim, rəqibini vuran kim, formasını yerə çırpan kim. Bu dəfə də hadisələrin mərkəzində “ağ-qaralar”ın futbolçuları idi. Başqa cür olması isə mümkün deyildi. Flaqmanın müdafiəçisi qırmızı vərəqə alacağını bilə-birə rəqibini aşkarcasına vurmaqdan çəkinmir. Bundan başqa braziliyalının çətin Zaqatala səfərində hesab 0:0 olarkən belə hərəkət etməsi sadəcə, biveclikdi, komandaya qarşı biganəlikdi. Nə bilmək olar, bəlkə də, mövsüm sonunda müqaviləsi başa çatacaq futbolçu üçün artıq “ağ-qaralar”ın gələcəyi elə də önəmli deyil. Oyundan sonra saytımıza müsahibə verən bakılıların icarçı direktoru Elnur Məmmədov epizodu tam dəqiqliklə görə bilməyib. Hər halda, videotəkrardan sonra Elnur bəyin hansı addım atacağı da maraqlıdı.
Elə bu hadisədən bir neçə dəqiqə sonra isə növbəti qalmaqala səbəb olacaq daha bir olay yaşandı. Oyunda ilk qolu vuran Nikolas Kanales, qol sevincini formasını yerə çırpmaqla qeyd etdi. Hətta onun tərlətdiyi forma qol sevincini qeyd etməyə gələn futbolçuların bəziləri tərəfindən tapdandı da. O qədər futbolçudan yalnız Flavinyonun ağlına gəlir ki, yerə atılmış formanı götürmək lazımdı. Hər halda, hər bir futbolçu təmsil eldiyi klubun formasına, rəmzlərinə hörmətlə yanaşmalıdı və əksi olanda isə cəzalandırılmalıdı. Qısa bir xatırlatma vermək lazımdı ki, 10 il bundan öncə “Neftçi” – “MKT-Araz” matçında əvəzlənərkən formasını yerə çırpan Elşən Qəmbərov komandadan qovulmuşdu. Düzdü, Kanalesin komandadan qovulacağı indandırıcı görünməsə də, ən azından klubun vəzifəli şəxslərindən biri futbolçulara bu formanın ağırlığını izah etməlidi ki, onlar hər oyun çıxıb, bu cür köklü komandanı gözdən salmasınlar.
Düzü, Çingiz Abdullayevin klubda işi çox çətin olacaq. Belə çıxır ki, intizamsız komandanın üzvləri ilə yenidən məktəbli kimi davranmaq lazımdı. Amma sədr futbolçularla ünsiyyətdə bir qədər ehtiyyatlı olmalıdı. Birdən Araz Abdullayevdən nəsə soruşsa, cavabı onun üçün gözlənilməz olar axı: "narmalni" sual ver, "narmalni" cavab verim də".
ELMAR ABDULLA-ZADƏ