Premyer-liqa
“Böyük oyun”a doğru: Atmacalar başladı
Aprelin 9-da Topaz Premyer Liqasında növbəti turun oyunları st…
Aprelin 9-da Topaz Premyer Liqasında növbəti turun oyunları start götürəcək. Futbolinfo.az xəbər verir ki, Turun ən böyük maraqla gözlənilən oyunlarından biri “Xəzər Lənkəran” və “Neftçi” arasında baç tutacaq.
“Böyük oyun” adlandırılan qarşılaşmada hər zaman gərginliyi ilə seçilib. Bəzən isə dava-dalaşları ilə yadda qalıb. Əsası 2004-cü ildə qoyulan bu derbidə indiyədək daha nə qalmaqallar yaşanmayıb ki? Düzdü, son illərdə hər iki komandanın vəziyyəti elə də ürəkaçan olmadığı üçün bu üzləşmə əvvəlki tək əzəmətli görünməsə də, hər halda öz prinsipiallığını qoruyur. Artıq matçdan öncə lənkəranlı fanatlar rəqib düşərgəyə ilk atmacanı atıb.
Belə ki, “12-ci oyunçu” fan-klubunun rəhbəri İslam Cabbarov öz blog yazısında “ağ-qaralar”ın yeni seçilmiş müşahidə şurasına söz atıb: “Bu müşahidə bürosunun vəzifələri hələ bəlli olmasa da, ancaq üzvlərinin adları çox şey deyir adama. Zarafat deyil, dünyada əsasən detektiv əsərlərin müəllifi kimi tanınmış bir şəxş bu büroya başçı təyin olunub. Yəqin bildiniz, kimi deyirəm, Çingiz Abdullayevi. İndi o boyda şəxsiyyət elə bilirsiz ki, elə belə müşahidə üçün gəlib, oturub orda? Yox! Mənə elə gəlmir. Əgər dünyada qazanmış olduğu detektiv hörməti bu təzə işində, Bəhram demişkən, yola versə, onda daha nə oldu ki?! Müşahidə bürosu da hava bürosu deyil ki, belə olsun. Bəhram Bağırzadə də bu büroda işini yalnız hansı havada oyun keçirmək olar və bu oyunlarda azarkeşlərin yağışdan, günəşdən necə qorunmalı olduğunu işləyib, hazırlayan bir tribunalar layihəçisi deyil ki?! Siz də yaxşı bilirsiz ki, o özü çılğın azarkeşdi. Özü də rəqib düşərgənin. Azarkeşliyin nə olduğunu yaxşı bilir.
İndi Bağırzadə öz azarkeş hisslərinin təsiri ilə, bizim bu tutulan azarkeşlərimiz haqqında əlbəttə ki, düşünür. Elə bu düşündüklərindən bir hesabat hazırlayıb, büronun rəhbərinə yəqin ki, təqdim edəcək. Dünya şöhrətli detektiv də bu məsələ ilə maraqlanacaq və emosional keçən bir məhkəmə prosesindəki müşahidəçi-müdaxiləçilərin bilməyərəkdən maddələrə tünd rəng qatdıqlarını aşkar edəcək və azarkeşlərin azadlığa çıxmasına öz töhfəsini verəcək. Yoxsa, elə müşahidə bürosu elə hava bürosu kimi bir şey olar da. Bir də ki, Abdullayev dünya şöhrətli bir detektivdi. Yəni dünya onun xidmətlərindən danışır. Bir vətənə də xidmət eləsəydi, biz də onun şöhrətindən ağızdolusu danışa bilərdik. Axı Abdullayev vətəndən çox dünyada tanınır”.