Premyer-liqa
Emin Quliyev Tahir Süleymanovla razılaşdı
Topaz Premyer Liqasının 10-cu turunda "Simurq"la oyunda d&…
Topaz Premyer Liqasının 10-cu turunda "Simurq"la oyunda dönüş edən (2:1) "Xəzər Lənkəran" oktyabrın 23-də Naxçıvanda Super Kubok uğrunda "Neftçi"yə qarşı mübarizə aparacaq. Futbolinfo.az xəbər verir ki, daha sonra Premyer Liqada ardıcıl olaraq "Qarabağ" və "Neftçi" ilə qarşılaşacaq cənubluların hazırlığının hansı səviyyədə olmasını öyrənmək üçün komandanın məşqçisi Emin Quliyevlə görüşdük.
Quliyev bu məsələlərlə bağlı əməkdaşımızın suallarını cavablandırıb:
– Bir neçə gündən sonra Super Kubok oyunu var. Bu haqda nə deyərdiniz?
– İnşallah maraqlı oyun olmalıdı. Azarkeşlərə ləzzət edən bir futbolun olacağını gözləyirik.
– Klublar Naxçıvana azarkeş aparmır…
– Azarkeşsiz oynamağı heç kim istəməz. Lakin inanırıq ki, Naxçıvanda azarkeşlər hər iki komandaya dəstək verəcək. Bizi həm stadiondan, həm də televiziyadan izləyən azarkeşlər üçün maraqlı oyun göstərməyə çalışacağıq.
– "Simurq"la oyunda çətinliklə də olsa, dönüş etdiniz. Super Kubokda "Neftçi" ilə görüş, daha sonra "Qarabağ"la ev və yenidən "Neftçi" ilə səfər oyununuz var…
– Düzdü, bizi ardıcıl ağır oyunlar gözləyir. Amma komandamız fiziki cəhətdən buna hazırdı. Hər halda birinci hissədə məğlub olub, ikinci hissədə qələbə qazanan komandanın fiziki göstəriciləri yaxşı olmalıdı.
– Nildonun yoxluğu komandanın oyununa nə dərəcədə təsir göstərəcək?
– Nildosuz çətin olacaq. Təbii ki, yeri görünəcək. Çalışacağıq ki, Nildonun yoxluğu oyun zamanı hiss olunmasın. İnşallah, yaxşı olar.
– "Neftçi"nin vitse-prezidenti Tahir Süleymanov "Xəzər Lənkəran"ın hazırda turnir cədvəlində tutduğu yerə görə təəssüf etdiyini bildirib. Lənkəranlıların çempionluq uğrunda mübarizə aparmasını istədiyini söyləyib.
– Tahir Süleymanov düzgün qeyd edib. "Xəzər Lənkəran"ın yeri yuxarı sıralarda olmalıdı. Amma bu, futboldu, futbolda hər şey olur. Biz boş yerə çox xal itirdik. İnanırıq ki, itirilən bu xalları geri qaytarıb çempionluq uğrunda mübarizə aparacağıq.
– Komandanın məşqçisi kimi azarkeşlərə "Xəzər Lənkəran"ın 10 illiyində Super Kubok söz verirsiniz?
– Yenə qeyd etmək istəyirəm ki, futbolda hər şey ola bilər. İnanıram ki, biz Lənkərana kubokla qayıdıb hər kəsi sevindirəcəyik.
RÖVŞƏN ƏHLİMANOĞLU