Premyer-liqa
“Simurq”un "fatihə"sini verənlər
Bu gün keçiriləcək qarşılaşmalarla Topaz Premyer Liqa…
Bu gün keçiriləcək qarşılaşmalarla Topaz Premyer Liqasında 2014/2015 mövsümünə yekun vurulacaq. Cari turda ötən günə qədər “Simurq”un “Xəzər Lənkəran”la matça yollanacağı sual altında olsa da, artıq bu məsələyə də aydınlıq gəlib. Ötən gün saytımıza danışan “sarı-qaralar”ın kapitanı İlkin Qırtımov, klub rəhbərliyi tərəfindən hər hansı bir addım atılmasa, səfərə öz hesablarına gedəcəklərini bildirmişdi.
Lakin son anda qərara gəlindi ki, futbolçular Lənkərana klubun hesabına getsin. Təəssüf doğuran məqam odu ki, səfərə əsas heyətdən yalnız İlkin Qırtımovla Rüstəm Məmmədov gedir. Vaxtı ilə komandanın şəninə badə qaldıran, “əlimdən gəldiyi qədər komandama kömək edəcəm” deyən əsas heyətin digər üzvləri isə əlindən gələni bir yana, heç ayağından gələni də etmədilər. Buna baxmayaraq, zaqatalalılar səfərə 18 nəfərlik heyətlə yollanacaq. “Xəzər Lənkəran” qarşısına “sarı-qaralar”ın əvəzedici komandasının üzvləri çıxacaq. Son anda onlara əsas komandadanTural Axundov da qoşulmağa qərar verib.
Bunu saytımıza açıqlamasında komandanı baş məşqçi kimi meydana çıxaracaq əvəzedicilərin çalışdırıcısı Rövşən Babayev deyib. Onun sözlərinə görə, əsas komandadan Mirzağa Hüseynpurdan başqa Lənkərana getməklə bağlı heç kim ona müraciət etməyib: “Uşaqlar gəlir, Şamaxıdadılar. Futbolçuların yarısı da Bakıdadı. Əvəzedici komandanın hər dəfə nahar etdiyi yerdə oturub, çörək yeyəcəyik. Sonra isə yola düşəcəyik. Əsas komandadan İlkin Qırtımovla Rüstəm Məmmədov bizlə Lənkərana gedir. Cavan uşaqların oynamasına qərar verdik. Yalnız Mirzağa Hüseynpur getməklə bağlı gecə mənə zəng etmişdi. Mən də “yox” dedim. Çünki artıq 18 nəfərdən ibarət heyəti hazırlamışdım. Yəni, mənə başqa adam zəng edib, “niyə getmirəm” deyə soruşmayıb. Onsuz da, mövsümün sonudu. Cavanlar oynamağı haqq edir. Klub yaşasa, heyət bu uşaqlardan qurulacaq. Təxminən 14:00 radələrində Bakıdan Lənkərana yola düşəcəyik”.
Düzdü, məcburiyyətdən də olsa, gənclərə şans vermək yaxşı haldı. Onlar bu oyundan özləri üçün az da olsa, təcrübə qazanamış olacaqlar. Bu durumda “Qarabağ”a transfer olunan Vüqar Mustafayevi də, “Qəbələ”yə keçən Samir Zərgərovu da, cəzalı Amil Ağacanovu da, ölkəsinə yollanan legionerləri də, milliləşən Cihan Özkaranı, Əli Gökdəmiri də başa düşmək olar. Onsuz da, Cihanla Əli ölkə futboluna xeyir vermək üçün yox, xeyir qazanmaq üçün bəxş edilmiş “tapıntılar”dı. Meydanda varlıqları ilə yoxluqları bəlli deyildi. Ancaq “Simurq” "son mənzil"ə yola salınarkən getməyənlərə haqq qazandırmaq bir az çətindi – Elnur, Vadim Abdullayevlərə , Rəşad Eyyubova…
EMİN SƏFƏROV