Premyer-liqa
“Qəbələ”də 6 vida, 2 müqavilə
Topaz Premyer Liqasını bürünc mükafatla başa vuran &…
Topaz Premyer Liqasını bürünc mükafatla başa vuran “Qəbələ”də bir sıra futbolçuların taleyinə aydınlıq gəlib. Futbolinfo.az xəbər verir ki, əyalət təmsilçisi artıq Bəxtiyar Soltanov və Viktor Mendi ilə yolları ayırıb.
Mendi ailəsinə görə Fransaya üz tutsa da, Soltanovun xidmətindən klub maraqlı olmayıb. Bundan başqa Pavol Farkaş, Aleksandru Benqa da gedənlər karvanına qoşulub. Qış transfer dönəmində komandanın hazırkı baş məşqçisi tərəfindən heyətə cəlb olunan 4 futbolçu – Ruslan Fomin, Mixail Sivakov, Dmitri Bezotosnı və Aleksey Qayın da taleyinə aydınlıq gəlib.
Mövsümün sonunda bəlli oldu ki, Qriqorçuk, Fominlə Sivakovun çıxışından narazıdı. Buna görə də adıçəkilən iki futbolçunu növbəti mövsümdə koamdasında görmək istəmir. Hər iki futbolçunun müqavilə müddəti başa çatdığı və onlara yeni sözləşmə təklif edilmədiyi üçün artıq vətəninə yollanıblar. Digər iki ukraynalı Qayla Bezotosnı isə daha 1 il müddətində komandanın uğuruları üçün çalışacaq.
Ötən gün hər iki futbolçu ilə 1 illik müqavilə imzalanıb. Bunu saytımıza açıqlamasında klubun baş meneceri Zaur Əzizov da təsdiqləyib.
Bundan başqa müqaviləsi başa çatan Ruslan Abışovun məsələsi olduğu kimi qalır. Maraq üçün bildirək ki, millimizin üzvünün xidmətindən “Neftçi” də maraqlıdı. Məsələyə yaxın günlərdə aydınlıq gələcəyi gözlənilir. Abışov kimi, müqaviləsi başa çatan Ekiqo Ehiosun da məsələsinə qarşıdakı günlərdə aydınlıq gələcək.
Saytımıza açıqlama verən Əzizov Ekiqoya düşünmək üçün 4 gün vaxt verdiklərini bildirdi: “Uzun müddətdi Ekiqonun zədəsi var. Sintetik meydançalarda oynamaq onun üçün olduqca çətindi. Buna görə də müayinə olunmalıdı. Biz ona şərtlərimizi bildirmişik. Bu şərtlərlə razı olsa, müqavilənin müddəti artırıla bilər. Söhbət maddi şərtlərdən getmir. Yəqin ki, önümüzdəki həftə bununla bağlı yekun qərar verəcəyik. 4 gün ona vaxt vermişik. Futbolçunun özü komandada qalmağa razıdı. Hətta 1 yox, bir neçə illik müqavilə imzalamaq istəyir”.
EMİN SƏFƏROV