Ölkə futbolu
Əhməd Ələsgərova növbəti biganəlik
Yaşım və iş təcrübəm Əhməd Ələsgərov haqqında daha do…
Yaşım və iş təcrübəm Əhməd Ələsgərov haqqında daha dolğun cümlələr yazmağa imkan vermir. Çünki əfsanəvi məşqçi ilə canlı ünsiyyətdə olmamışam, onu görməmişəm. Əvəzində ona qarşı biganəliyi, laqeyidliyi görmüşəm. İlk dəfə Ələsgərov haqqın rəhmətinə qovuşanda, daha sonra isə bu gün AFFA-nın inzibati binasında keçirilən anım mərasimində…
AFFA sağlığında Ələsgərova qiymət vermədi. Maestro canını Allaha tapşıranda da assosiasiyanın ona qarşı biganəliyi davam etdi – dəfn mərasiminə sanballı adam göndərmədi, nəşinin doğulduğu paytaxt Bakıya gətirilməsi təşəbbüsü ilə çıxış etmədi. Yalnız, mətbuatın basqısından sonra müəyyən addımlar atıldı ki, onda da artıq gec idi.
Müsəlman diyarında doğulan Əhməd müəllim xristian adət-ənənəsi ilə son mənzilə yola salındı. Nəhayət, bu gün AFFA 79 yaşında dünyasını dəyişən Ələsgərova anım mərasimi keçirdi. Düşündük ki, əfsanəfi çalışdırıcı layiq olduğu şəkildə anılacaq. Təəssüf ki, bu dəfə də dəyişən heç nə olmadı. Yenə biganəlik, yenə laqeyidlik, yenə, yenə, yenə…
Tədbirdə iştirak edən 2 media nümayəndəsindən biri də bəndəniz idi. Yolda tıxac olduğu üçün anım mərasiminə 2 dəqiqə gecikdim. AFFA-nın binasının girişində sağ tərəfində yerləşən, mərasimin keçirildiyi zala daxil olmazdan öncə bir anlıq dayandım. Təəccüb içində qaldım. Girişində düzülmüş müxtəlif növ şirniyyatları, şirələri görüncə düşündüm ki, kiməsə doğum günü keçirilir və ya hansısa komitənin iclasıdı. Geri qayıdırdım ki, tanımadığım biri mənə “qardaş, tədbir burdadı” dedi. İçəri daxil oldum.
Anım mərasimi Futbol Veteranları İttifaqının sədri Oqtay Abdullayevin çıxışı ilə başladı. O, Rüstəm Rəhimovla birgə Ukraynaya ezam olunmaları, mərhumun dəfn mərasimində iştirak etmələri barədə danışdı. Daha sonra isə Çingiz İsmayılov, Bəşir Əliyev, Vaqif Sadıqov, Böyükağa Hacıyev, Ağasəlim Mircavadov, Fuad Tağızadə, Nağı Babayev kimi futbolumuzun veteranları Ələsgərovla bağlı xatirələrini bölüşdü. Hətta vaxtı ilə onun rəhbərliyi altında çıxış edən İsgəndər Cavadov mərhum haqda danışarkən kövrəldi.
Heç bir televiziya kanalının dəvət olunmadığı, media nümayəndələrinin diqqət göstərmədiyi, AFFA rəhbərliyinin iştirak etmədiyi tədbir bir dəqiqəlik sükutla başa çatdı. Bəli, bəli, tədbir bir dəqiqəlik sükutla başa çatdı. Anım mərasimini o qədər başdansovda yola verdilər ki, mərhum tədbirin əvvəlində yox, sonunda yada düşdü.
Düzdü, bu gün AFFA rəhbərliyi İsveçrənin Sürix şəhərində keçirilən FİFA-nın prezident seçkilərində iştirak edir. Halbuki, tədbir birbaşa onların başçılığı altında keçirilməli idi! Bu sahədə çalışanlar rəhbərliyin qorxusundan, orada görünmək üçün zalı dolduracaqdılar. Belə olsaydı, tək qalan Mikayıl Nərimanoğlu AFFA-nın əksər işçilərini anım mərasiminə gətirmək məcburiyyətində qalmazdı. Bundan başqa hazırda Bakıda olan Peşəkar Futbol Liqasının prezidenti Ramin Musayevin də anım mərasimində iştirak etməməsi onun adına böyük qəbahətdi.
“Neftçİ”nin “xalq komandası” adını qazanmasında müstəsna pay sahibi olmuş Əhməd Ələsgərovun anım mərasimində “ağ-qaralar”ın rəhbərliyindən heç kimin qatılmaması tək mərhuma yox, bütövlüklə Azərbaycan futboluna qarşı təxribatdı. Çünki Maestroya qarşı “Neftçi”nin bu münasibətindən sonra gənc futbolçuların nəvaxtsa hörmət görəcəklərinə son ümid çırağı da söndü.
Tədbir başa çatanda hər kəs zalı tərk etdi. Yarım saatlıq anım mərasimində boğazı quruyanlar çöldə düzülmüş şirniyyatlardan daddı, şirələrdən içdi. Ələsgərovun başçılığı altında çıxış etmiş və onun haqqında danışarkən kövrələn İsgəndər Cavadovun çöpə düzülmüş üzüm dənələrini sanki şişdəki kabab kimi dişinə çəkməsini həqiqətən də görməyə dəyərdi. Üzüm doğrudan da qüvvətverici vasitədi. Deyəsən, Cavadov kövrələrkən çox sarsılmışdı…
Allah sənə rəhmət eləsin, əfsanəvi Əhməd Lətifoviç! Adın qızıl hərflərlə futbolumuzun tarixində və ürəklərimizdə, məzarın isə Odessada qalacaq.
EMİN SƏFƏROV
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Premyer-liqa2024-04-19 18:26
“Turan Tovuz” “Sumqayıt”a böyük hesabla məğlub oldu
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq