Ölkə futbolu
Finaldan öncə nostalji dolu “final”
Artıq bu gün ölkə kubokunun finalında "Qarabağ"…
Artıq bu gün ölkə kubokunun finalında "Qarabağ"la "Neftçi" qarşılaşacaq. Azərbaycan derbisi ilk dəfə Qəbələdə baş tutacaq.
Onsuz da bu matçı izləmək və işıqlandırmaq üçün bölgəyə səfər etməyi planlaşdırırdıq. Amma Peşəkar Futbol Liqasının təşəbbüsü lap yerinə düşdü. Belə ki, qurumun jurnalistlərin səfərini təşkil etməsindən sonra əlavə xərcə düşməyimizə ehtiyac qalmadı.
PFL oyunu işıqlandırmaq istəyən jurnalistlərin Qəbələyə səfərini bir gün öncədən təşkil etdi. Avtobus səhər tezdən AFFA-nın inzibati bunasının qarşısından yola çıxdı və təxminən 5 saatdan sonra mənzil başına çatdıq. Final matçından bir gün öncə bu bölgəyə gəlməyimizin isə səbəbi vardı…
İlk olaraq, nahar üçün "Soyuq Bulaq" istirahət mərkəzinə getdik. Burada xidmət o qədər ürəkaçan olmasa da, lap pis də deyildi. Həm də biz axı, bura dincəlməyə yox, işləməyə gəlmişik. Təəssüf ki, işləmək üçün də şərait yerləşdiyimiz "Karvansaray" otelində məhdud idi. Yaxşı ki, müraciətimizdən sonra internetlə bağlı problem yoluna qoyuldu.
…O ki qaldı Qəbələyə bir gün öncə gəlməyimizin əsas səbəbinə, hər şey PFL-in final matçını yaddaqalan etmək üçün göstərdiyi səyə bağlı idi. Qurum kubokun həlledici görüşünü bayrama çevirmək məqsədi ilə bir sıra tədbirlər planlaşdırır ki, onlardan birincisinə artıq şahidlik etdik. Belə ki, dünən iki klubun veteranları arasında görüş reallaşdı.
Açığı, stadionda boş tribunaları gördükdə təəccübləndim. Hətta həmkarlarınızdan kimsə "yəqin oyun başqa meydançada keçiriləcək" dedi. Həqiqətən, belə oyuna marağın az olması çox təəssüfləndirici məqam idi. Axı, meydana sıradan futbolçular yox, 19 il əvvəlki finalın iştirakçıları çıxmışdı. Həmin futbolçular ki, onları bir yerə yığmaq üçün PFL çox əziyyət çəkmişdi. Almaniyada yaşayan İlham Məmmədovu, Rusiyada olan Rasim Abışovu, eləcə də ölkədə müxtəlif yerlərdə və fərqli statusda olan sabiq futbolçuları Qəbələyə toplamaq asan deyildi. PFL isə bunun öhdəsindən gəlmişdi və buna görə qurumun bütün işçilərinə alqış düşür.
Təbii ki, oyuna marağın az olmasında əsas günahkarlar klublar idi. Bayrama rəng qatmaq üçün “Neftçi”ylə “Qarabağ” heç nə etməmişdi. Onlar ən azı rəsmi fan-klublarını bir gün əvvəldən bölgəyə gətirməyə, oyunda klub rəsmiləri səviyyəsində təmsil olunmağa borclu idilər. Ancaq görünür, tarixi unutmağı və bugünlə yaşamağı daha məqsədəuyğun bildilər.
Bu laqeydliyə baxmayaraq, nostalji hisslərlə izlədiyimiz oyun yaxşı keçdi. Sabiq FİFA referisi Tahir Süleymanovla köməkçilərinin də cavanlığını yada saldığı matçı canlı efirdən izləyənlər də təsdiq edər ki, veteranlar gözəl futbol sərgiləməyə çalışdılar. Yaş öz sözünü sürətdə, dinamikada mənfi tərəfdən desə də, ustalıq ən üst səviyyədə idi.
İlk hissədə hesab açılmasa da, fasilədən sonra “Neftçi” ilk qolu vurdu. Xaqani Məmmədovun qolundan sonra cavab üçün irəli atılan ağdamlılar bərabərlik topu üçün çox əziyyət çəkdilər. “Qarabağ”a gah qeyri-dəqiqlik, gah da indi Ağdam klubunda işləyən qapıçı Elxan Həsənovun əla oyunu mane olurdu. O, hətta rəqibin penalti zərbəsini də qaytara bildi. Lakin matçın son dəqiqəsində o da rəqibin fərqlənməsinə "şərait yaratdı". Beləcə matç 1:1 hesablı bərabərliklə başa çatdı.
Oyundan sonra sabiq futbolçular təşkilatçılara bu cür oyun təşkil etdiyinə görə təşəkkürlərini bildirdi. Elə PFL prezidenti Ramin Musayev də AFFA rəhbəri Rövnəq Abdullayevə minnətdarlığını dilə gətirdi. Onu da qeyd edək ki, Ramin bəy matç boyunca "Neftçi"yə azarkeşlik edirdi. Bunu PFL rəhbərinin emosiyalarından da hiss etmək mümkün idi. Bundan başqa, Musayev hər iki komandanın soyunub-geyinmə otağına girib bütün futbolçulara öz təşəkkürünü bildirdi.
Bu matçdan sonra əsas komandaların – bu gün finalda qarşılaşacaq rəqiblərin baş məşqçilərin iştirakı ilə media nümayəndələri üçün mətbuat konfransı oldu. Konfransın ardınca komandalar qapalı məşqə çıxdılar.
Bugünkü oyunadək və matç ərzində də bir sıra sürprizlər olmalıdı. PFL hər nə qədər planlarını gizli saxlasa da, ciddi işlər getdiyi dəqiqdi. Ümid edirik, oyun zamanı da problem ortaya çıxmaz, güclü qalib gələr və bayram əhval-ruhiyyəli günlər eyni qaydada da yekunlaşar.
ELMAR ABDULLA-ZADƏ, Qəbələ