Ölkə futbolu
Millimizi məyus edən "Qəbələ"li
Bu il ölkəmizi Avropa Liqasında təmsil edəcək “Qəbəl…
Bu il ölkəmizi Avropa Liqasında təmsil edəcək “Qəbələ” heyətini gücləndirməkdə davam edir. Futbolinfo.az xəbər verir ki, əyalət təmsilçisi dünən daha bir futbolçunun transferini reallaşdırıb. Bu, Estoniya milli komandasının hücumçusu Sergey Zeynovdu.
Futbolçu ölkəsinin “Pyarnu”, TFMK, həmçinin Ukryananın “Karpatı”, İngiltərənin “Blekpul”, Rusiyanın “Torpedo” klublarının şərəfini qoruyub. Karyerasının böyük hissəsini “Karpatı”da keçirən hücumçu 6 il Ukrayna klubunun şərəfini qoruyub. Sergey 2008-ci ildən etibarən müntəzəm olaraq ölkəsinin yığma komandasında da çıxış edir. O, bu müddətdə meydana çıxdığı 45 qarşılaşmada 11 dəfə rəqib qapılarına yol tapa bilib.
Zeynovun məyus etdiyi yığma komandalar arasında Azərbaycan da var. Belə ki, 2013-cü ilin noyabrında yığmamıza qarşı keçirilən yoldaşlıq oyununda estonların bərabərlik qoluna məhz sözügedən futbolçu imza atmışdı. Tallində keçirilən qarşılaşma 2:1 hesabı ilə estonların xeyrinə başa çatmışdı. Futbolçunun həmin görüşdə məyus etdiyi qapıçı Anar Nəzirov indi Qəbələ təmsilçisində ehtiyatda oturur. Bu matçda Zeynova qarşı meydana çıxan Ruslan Abışov indi “qırmızı-qaralar”da kapitan sarğısını daşıyır. Hazırda əyalət təmsilçisinin şərəfini qoruyan Ruslan Əmircanov və Cavid Hüseynov isə sözügedən qarşılaşmanı ehtiyat oyunçular skamyasından izləmişdi. 26 yaşlı forvard millsinin San Marinoya qarşı baş tutan son rəsmi matçında da dubl edərək komandasının 2:0 qələbəsində əsas pay sahibi olub. Millimizdən başqa Zeynovun məyus etdiyi yığmalar arasında İtaliya, Belçika və Şimali İrlandiya kimi komandalar göz oxşayır.
Futbolçu çıxış etdiyi klubların heyətində avrokubok həyəcanı da yaşamağa macal tapıb. 2010/11 və 2011/12 mövsümlərində Avropa Liqasının matçlarında meydana çıxan forvard bu görüşlərdə də 2 dəfə fərqlənib. Onun qol vurduğu oyunlardan biri “Qalatasaray” ilə İstanbulda 2:2 hesabı ilə başa çatan görüşə təsadüf edir. Futbolçunun beynəlxalq təcrübəsinin çox olması avrokuboklarda qəbələlilərə çox kömək edə bilər. 1.83 sm boya malik forvard ikinci mərtəbədəki oyunu ilə də seçilir. Bundan əlavə o, gözəl driblinqə də malikdi. Çox güman ki, eston futbolçu mövsüm sonunda komandadan ayrılan Viktor Mendinin boşluğunu doldurmağa çalışacaq.
ELMAR ABDULLA-ZADƏ