Ölkə futbolu
Sosial şəbəkə vasitəsi ilə idarə olunan "Xəzər Lənkəran"
“Xəzər Lənkəran”ın Premyer Liqanın ilk turlarında h…
“Xəzər Lənkəran”ın Premyer Liqanın ilk turlarında hansı heyətlə oynayacağı qeyri-müəyyən olaraq qalmaqdadı. Klubun mətbuat xidmətinin rəhbəri Hüseyn Cəbrayıloğlu saytımıza verdiyi açıqlamada İdman Arbitraj Məhkəməsinin (CAS) Veldin Muharremoviçin etdiyi şikayətə dair qərarının bu gün (dünən – red.) açıqlanacağını dilə gətirmişdi. Daha doğrusu, FİFA-nın iki “transfer pəncərəsi” üçün oyunçu almasına qadağa qoyduğu cənubluların əks şikayətinə CAS aydınlıq gətirməliydi: Qurum ya FİFA-nın qərarını təsdiqləməli, ya da klubun xeyrinə qərar çıxarmalıydı.
Məsələyə axşam saatlarında aydınlıq gələcəyini bildirən klubda çalışan sabiq həmkarımızla saatda bir dəfə əlaqə saxlayaraq, vəziyyətlə bağlı məlumat alırdıq. Ancaq bütün səylərimizə baxmayaraq, Cəbrayıloğlunun hərəkəti ilə bizi şoka saldı. Özünü belə vəziyyətə salmağı şəxsi işidi, “Xəzər Lənkəran”ı da öz gününə qoydu. CAS-ın çıxardığı qərarı hardan oxusaq yaxşıdı? Klub sözçüsünün şəxsi facebook səhifəsindən.
Gözlənildiyi kimi, CAS da FİFA-nın qadağasının düzgün olduğunu, klubun bəzi rəhbər şəxslərinin fırıldağa əl atdığını təsdiqlədi. Ali qurum futbolçunun tərəfini saxlamaqla “Xəzər Lənkəran”ın sahiblərinə həm də klubun idarəçiliyinə bir daha nəzər yetirmək barədə siqnal ötürmüş oldu. Axı neçə vaxtdı klub rəsmiləri heç bir qanun pozuntusuna yol verilmədiyini, futbolçunun onları şərlədiyini deyirdilər.
Belə xəbəri mətbuata birbaşa ötürmək, lənkəranlı azarkeşlərin ciddi izlədiyi klub saytına qoymaq olmazdı. Mətbuat xidməti bu xəbəri elə yaymalıydı ki, ilk öncə “dost jurnalistlər” xəbəri yaysın, onun “zəlzələ dozası”nı azaltsın, sonra isə futbolinfo.az kimi hesabat istəyənlərin yazdığı ciddi təsir qüvvəsinə malik olmasın.
Sən demə, “Xəzər Lənkəran” Cəbrayıloğlunun sosial şəbəkədəki səhifəsinin nüfuzundan da aşağı vəziyyətdədi. Klubun rəsmi saytında məlumatı yerləşdirməyə borclu olan mətbuat katibi bunu heç “Xəzər Lənkəran”ın facebook səhifəsində belə etməyib. Cənubluların faktiki sahibi Mübariz Mənsimovun, prezidenti Mais Mənsimovun “Xəzər Lənkəran”la bağlı strateji məlumatları rəsmi saytdan öncə sosial şəbəkələrdə paylaşmadıqları da hamıya məlumdu. Ancaq artıq özünü klubun sahibi sanan birisinin yəqin bu hərəkətinin də səbəbi var. Uzun müddətdi Muharremoviçlə “müharibə” aparan “Xəzər Lənkəran”ın vitse-prezidenti Tuyqun Nadirova, bəlkə, CAS-a uduzmaq ən sərfəli variant idi? Belədə uğursuz nəticələr göstəriləcəyi təqdirdə mövsümün sonunda ondan hesabat tələb olunduqda cavab verməyə əlinə dəlil düşüb: “Çempionatın ilk 3 oyununda yeniyetmələrlə oynamışıq. Uğursuz nəticələr sonda hədəfimizə çatmağımıza mane oldu”.
Nəyə görə İdman Arbitraj Məhkəməsində qalib gəlmək mümkün olmadı? Hansı müqavilə imzalanıb ki, cənub təmsilçisi bu acınacaqlı vəziyyətə düşüb? Bu sualların cavabı yoxdu. Mübariz Mənsimovun kluba yatırdığı vəsait qeyri-peşəkar səviyyədə idarə olunan klubda dağıdılır, müharremoviçlərə yedirdilir. Elə bu üzdən də “Xəzər Lənkəran” FİFA-nın kəsdiyi cərimələr üzrə Azərbaycan klubları arasında liderdi.
Hüseyn Cəbrayıloğlunun mühüm məlumatı, ən çox izlənilən vasitə ilə çatdırmağa borclu olduğu xəbəri şəxsi səhifəsində paylaşmasının daha bir səbəbi kluba xidmət əvəzinə, şəxsi reytinqinin artmasına çalışmasıdı. O, hesab edir ki, şəxsi facebook səhifəsi “Xəzər Lənkəran”ın rəsmi saytından daha nüfuzludu, daha çox izlənilir. Yəqin elə belə yanaşmanın nəticəsidi ki, cənub klubu rəzil günündədi. Sosial şəbəkə vasitəsi ilə idarə olunan klub FİFA-nın cəzasına məruz qalmağa məhkumdu.
CEYHUN ƏLİYEV