Ölkə futbolu
UEFA: "Qarabağ"la müqayisədə, "Seltik" daha çox narahatdı
UEFA-nın rəsmi saytı bu gün Çempionlar Liqasının 3-c&…
UEFA-nın rəsmi saytı bu gün Çempionlar Liqasının 3-cü təsnifat mərhələsinin cavab qarşılaşmalarına dair yazı dərc edib. Futbolinfo.az xəbər verir ki, qitənin ali futbol qurumu daha böyük marağa səbəb olan oyunlar sırasında “Qarabağ”la Şotlandiya “Seltik”i arasında keçiriləcək görüşü də göstərib.
“Azərbaycanlılar Şotlandiyanın ən güclü klubuna qarşı oyunda “Qarabağ”ın uğur qazanacağına inanırlar. Cavab qarşılaşması öncəsi komandanın baş məşqçisi Qurban Qurbanov mərhələ adlamaqda onlara həlledici yardımçı rolunda azarkeşlərin çıxış edə biləcəyini vurğulayıb. Texnikalı futbola üstünlük verən “Qarabağ”ın meydançanın vəziyyəti “kefinə soğan doğrayır”. Ancaq qonaq komandanın şənbə günü Şotlandiya çempionatında keçirdiyi oyun yorğunluğuna səbəb ola bilər. Üstəlik, saat fərqi də Böyük Britaniya təmsilçisinin əleyhinə işləyən amillərdəndi. Bu da azmış kimi, Azərbaycanda hərarətin 40 dərəcəni keçməsi də “Seltik”in futbolçuları üçün problem yaşada bilər. Onlar sadəcə, belə havada futbol oynamağa öyrəşməyiblər.
Yeri gəlmişkən, “zolaqlılar” Çempionlar Liqası çərçivəsində Azərbaycan klublarına rəqib olan ilk Şotlandiya təmsilçisi olacaq (Əslində nəinki Çempionlar Liqası, ümumiyyətlə, Şotlandiya klubları indiyədək Azərbaycana gəlməmişdi – red.). Qlazqo təmsilçiləri səfərdə vuracağı qolun nə qədər onlar üçün əhəmiyyətli olduğunu gözəl başa düşürlər. Norveç millisinin və “Seltik”in yarımmüdafoəçisi Stefan Yohanssen də eyni qənaətdədi: “Azərbaycanda qol vurmalıyıq. Səfər qarşılaşmasında qolun əhəmiyyətli olan oyunlarda evdə qol buraxmamaq olduqca vacibdi. Biz Şotlandiyada bunun öhdəsindən gəldik. Bəli, üstünlük əldə etmişik, ancaq məqsədimizə hələ nail olmamışıq. Çempionlar Liqası komandamız üçün olduqca önəmlidi, buna görə də hamı “Qarabağ”la oyuna köklənib”.