Ölkə futbolu
Çimərlikdən muzeyə qədər olan "Neftçi"
Elnur Məmmədov Vəli Qasımovu da vurub qoltuğuna Braziliya ç…
Elnur Məmmədov Vəli Qasımovu da vurub qoltuğuna Braziliya çimərliklərini gəzir, hərdən bir şəkil çəkib klub saytına qoymaq üçün göndərir. Adı işgüzar səfərdi, məqsəd yeni oyunçular seçmək.
“Neftçi”nin icraçı direktorunun vətənə nə vaxt dönəcəyi bəlli deyil. Bununla bağlı nə bir rəsmi məlumat var, nə də şayiə-xəbər. Klubun rəsmi saytında işgüzar səfər üçün okeanın o tayına yollandıqları bildirilir, “Marakana”da muzey gəzib, şəkil çəkdirirlər, Banişevskini yada salırlar. Ancaq bu gedişlə “Neftçi” özü muzeylik olacaq.
Bütün bunlar xoş təşəbbüsdü. Ancaq maraqlı olan odu ki, işgüzar səfərə ilin-günün bu vaxtında nə hacət? 2 oyuna qol vura bilməyən, cəmi bir xalla autsayderlər qrupuna dəmir atan komandanın rəhbərliyi indi futbolçuların yanında olmalı, onların, “Neftçi”nin problemlərini çözməlidi.
Həqiqətən Braziliyaya getməyin səbəbi işgüzar görüşlərdisə, zaman düzgün seçilməyib. Ya mövsüm başlayana kimi bunu etmək lazım idi, ya da 3-cü turdan sonrakı fasilə dönəmində. Həm də işgüzar görüş üçün qonşu Rusiyada, qardaş Türkiyədə, daha çox əlaqələrimiz olan digər ölkələrdə variantlar varkən niyə indi hamının çimərliklərinə görə üz tutduğu Braziliya seçilib?
Bildiyimizə görə, idman direktoru Vəli Qasımovun da Məmmədova yoldaş olmasının əsl səbəbi ucuz oyunçu axtarışıdı. “Kəpəz”in ilk turda verdiyi futbol dərsindən sonra Müşahidə Şurası təcili toplanıb və komandanın gücləndirilməsi üçün transferlər edilməsi qərara alınıb. Sonda da Məmmədovla Qasımovun Braziliyaya getməsi məqsədəuyğun bilinib. Adama deyərlər: Siz hara, futbolçu seçmək hara? Hər işi siz görəcəksizsə, komandanın məşqçiləri, əsasən də seleksiyaçısı Bəxtiyar Musayev nəyə lazımdı? “Neftçi” üçün ən faydalı legionerləri – Flavinyonu, Bertuççini, Kanalesi seçmiş Bəxtiyar Bakıda qalır, siz idarəçilər oyunçu seçməyə gedirsiz.
Elnur Məmmədov bu gün dəstək gözləyən Samir Əliyevin yanında olmalıdı. Gənc baş məşqçini sınıq-salxaq heyətlə odun içinə atmaq, tənqidlərlə üz-üzə qoymaq, qəzəbli azarkeşlərin qabağına vermək həm də xəyanətdi. Axı, kluba bu strategiyanı siz seçmisiz, indi sinənizi qabağa vermək lazım ikən haralardasız?
Aydın görünür ki, “Neftçi”nin icraçı direktoru vaxt qazanmağa, “vəziyyəti fırlatmağa” çalışır. 3-cü turda “Sumqayıt”la baş tutacaq oyunda onu stadionda görəcəyinizə əmin olun. Çünki həmin matçda qələbə mütləqdi. AFFA-nın baş katibi Elxan Məmmədovun özəlləşdirdiyi iki klubun görüşündə qələbəyə ən çox ehtiyacı olan bakılılardı və daha böyük tikəni əldən verməmək üçün bu, təmin ediləcək. Yoxsa azarkeşlərin, sabiq prezident Sadıq Sadıqovun gizli təzyiqlərinin qarşısında dayanmaq olmaz. Yəqin ki, Kamran Quliyev də hədiyyə verməkdən imtina etməyəcək. Təki daxil olduqları məlum qrupun ümumi işi irəli getsin.
Yəqin ki, Braziliyaya turist səfərinə gedən cütlük də əlidolu qayıdacaq. Ucuz, ona görə də keyfiyyətsiz olan 1-2 braziliyalı gətirəcəklər. Onların qarşıdakı fasilə dönəmində komandaya uyğunlaşdırılması lazım gələcək. Ondan sonra isə Samir Əliyevin qara günləri başlayacaq. Nəticələr yaxşılaşmasa, rəhbərlik baş məşqçini qabağa verəcək – “oyunçu aldıq, nəticə olmadı” bəhanəsi ilə. Daha o zaman heç kim deməyəcək ki, Braziliyaya Məmmədovla Qasımov getmişdi, məşqçilər yox.
FƏRİD
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…