Ölkə futbolu
Kimsə şuranı tərk etməlidi!
“Neftçi” ətrafında baş verənlər təkcə hakimi…
“Neftçi” ətrafında baş verənlər təkcə hakimiyyət, qazanc davası deyil. Təbii ki, sonucda bunlar da var. Amma ilk öncə bu, nüfuz məsələsidi: qalib gələn üçün yeni üfüqlər aşılacaq, məğlub olan “vurulmuş” sayılacaq.
Klubun Müşahidə Şurasının sədri Çingiz Abdullayevin son müsahibəsi açıq səmada şimşək effekti verdi. Bundan öncə onun klubun sabiq prezidenti Sadıq Sadıqovla yaxşı münasibətdə olması, hətta AFFA-nın baş katibi Elxan Məmmədov, eləcə də bu şəxs tərəfindən “Neftçi”yə icraçı director göndərilən Elnur Məmmədova qarşı birləşdiyi haqda informasiyalar mətbuata sızdırılırdı. Ancaq Abdullayevin son açıqlamaları göstərdi ki, yazıçının sələfi ilə münasibətləri qaydasında deyil.
Çingiz bəy son aşıqlamalarında faktiki olaraq, Sadıq bəyi özünə qarşı çıxmaqda, “Neftçi” barəsində qərəzli yazılar yazdırmaqda ittiham edib. Onun köhnə rəhbərliyin dövründən 3 milyon dollara yaxın borc qaldığını bildirməsi birbaşa Sadıqova hücumdu: “Əvvəlki prezident Sadıq Sadıqovun arxasınca danışmaq istəmirəm. O, burda böyük işlər görüb. Amma həqiqət odu ki, mən bura gələndə klubun xeyli borcu var idi”.
“Bu hörmətsiz yazılar təkcə bizə qarşı yox, komandaya, sponsorumuza, işçilərimizə qarşıdı… Başa düşürəm ki, sifarişli yazılardı. Amma onlar da başa düşsünlər ki, bizim məhkəməyə vermək, böyük təzminat almaq hüququmuz var… Mətbuat və İctimaiyyətlə Əlaqələr Departamentinin rəhbəri Gündüz Abbaszadə gedəndə mən burda yox idim. Mən burda olmayanda bizə qarşı çox məqalələr yazılıb. Kimin nəyə görə yazdığını, kimin sifariş verdiyini hamı yaxşı bilir. Həmin məqalələrdən sonra Gündüzü çağırıb, niyə cavab vermədiyi soruşulub. O da deyib ki, kimin nə sifariş etdiyini mən də yaxşı bilirəm. Amma məni də başa düşün, bəziləri ilə çörək kəsmişəm, dost olmuşam, onlara qarşı danışa bilmərəm”.
Gündüzün çörək kəsdiyi, dost olduğu insanların keçmiş, onu bu vəzifəyə təyin edən rəhbərlik olduğunu nəzərə alsaq, yenə mənzərə aydındı. Bəlkə də Abdullayevin Sadıqovu mətbuat xidmətinin rəhbərinin bir az da təhrif olunmuş (Gündüz sosial şəbəkədə statusunda bir az fərqli şeylər yazmışdı – red.) fikirləri ilə vurması doğru deyil. Ancaq o, bunu özünə rəva bildi. Hətta daha sonra “Neftçi”nin qazandığı son kuboka görə futbolçulara çatmalı olan mükafatın “yoxa çıxdığını” diqqətə çatdırmaqla Sadıq bəyi pul yeyintisində ittiham etdi.
Borcun, futbolçulara çatmayan pulun həqiqətən “yeyildiyi”, yoxsa sponsor tərəfindən ödənmədiyini bilmirik. Amma yəqin ki, Çingiz bəy indi də komandaya himayədarliq edən SOCAR-ı ifşa etməz, bu riskə getməz.
İstənilən halda ox yaydan çıxıb. Sadıqovun gizli, Abdullayevin açıq müharibəsindən sonra onların bir dam altda yaşaması, Müşahidə Şurasında yanaşı əyləşməsi mümkünsüzdü. İki qoçun başı bir qazanda qaynamaz. Kimsə şuradan getməli olacaq və bu qərarı sponsorlar verəcək. İndiki halda Sadıq bəy bu aqibətə daha yaxın görünür, ancaq sabahın necə açılacağını heç kim bilmir…
FƏRİD